ਮੈਟਾ ਗਲਾਸੇਜ਼: ਜਨਤਕ ਥਾਵਾਂ 'ਤੇ ਬਿਨਾਂ ਇਜਾਜ਼ਤ ਦੇ ਲੋਕਾਂ ਦੀ ਵੀਡੀਓ ਬਣਾਉਣਾ ਕਿੰਨਾ ਸਹੀ? ਮੈਟਾ ਗਲਾਸੇਜ਼ ਕਿਵੇਂ ਕੰਮ ਕਰਦੇ ਹਨ?
ਤਸਵੀਰ ਸਰੋਤ, Getty Images
- ਲੇਖਕ, ਓਲਿਵੀਆ ਕੋਪਲੈਂਡ
- ਰੋਲ, ਬੀਬੀਸੀ ਨਿਊਜ਼ ਐੱਨਆਈ
- ਪ੍ਰਕਾਸ਼ਿਤ
- ਪੜ੍ਹਨ ਦਾ ਸਮਾਂ: 8 ਮਿੰਟ
ਇਹ ਤਕਨਾਲੋਜੀ ਦਾ ਨਵਾਂ ਦੌਰ ਹੈ, ਜਿਸ ਨੂੰ ਜਲਦ ਹੀ ਤੁਹਾਡੇ ਆਲੇ-ਦੁਆਲੇ ਦੀ ਸੜਕ, ਪਾਰਕ ਜਾਂ ਚੌਕ 'ਤੇ ਦੇਖਿਆ ਜਾ ਸਕਦਾ ਹੈ। ਪਰ ਸਮਾਰਟ ਚਸ਼ਮਿਆਂ ਦੇ ਭਵਿੱਖ ਨੂੰ ਲੈ ਕੇ ਹਰ ਕੋਈ ਆਸ਼ਾਵਾਦੀ ਨਹੀਂ ਹੈ।
ਇਨ੍ਹਾਂ ਚਸ਼ਮਿਆਂ ਨਾਲ ਲੋਕ ਕਾਲ ਕਰ ਸਕਦੇ ਹਨ, ਏਆਈ ਨਾਲ ਬਿਨਾਂ ਹੱਥ ਲਗਾਏ ਗੱਲ ਕਰ ਸਕਦੇ ਹਨ ਅਤੇ ਫਰੇਮ ਨੂੰ ਛੂਹ ਕੇ ਫੋਟੋ ਅਤੇ ਵੀਡੀਓ ਲੈ ਸਕਦੇ ਹਨ। ਇਸੇ ਕਰਕੇ ਪ੍ਰਾਈਵੇਸੀ ਨੂੰ ਲੈ ਕੇ ਚਿੰਤਾ ਵਧ ਰਹੀ ਹੈ।
ਪੂਰੇ ਬ੍ਰਿਟੇਨ ਵਿੱਚ ਕਰੀਬ 800 ਪੱਬ ਚਲਾਉਣ ਵਾਲੀ ਕੰਪਨੀ ਵੇਦਰਸਪੂਨਜ਼ ਨੇ ਆਪਣੇ ਪੱਬ ਵਿੱਚ ਇਨ੍ਹਾਂ ਚਸ਼ਮਿਆਂ ਨਾਲ ਵੀਡੀਓ ਬਣਾਉਣ 'ਤੇ ਰੋਕ ਲਾ ਦਿੱਤੀ ਹੈ। ਮਹਿਲਾ ਅਧਿਕਾਰ ਕਾਰਕੁਨਾਂ ਨੇ ਵੀ ਇਨ੍ਹਾਂ ਰਾਹੀਂ ਸ਼ੋਸ਼ਣ ਕੀਤੇ ਜਾਣ ਦਾ ਖਦਸ਼ਾ ਜਤਾਇਆ ਹੈ।
ਉੱਥੇ ਹੀ, ਟਿਕਟੌਕ ਅਤੇ ਇੰਸਟਾਗ੍ਰਾਮ ਵਰਗੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਇਨ੍ਹਾਂ ਚਸ਼ਮਿਆਂ ਨਾਲ ਬਣਾਈਆਂ ਗਈਆਂ ਵੀਡੀਓਜ਼ ਦੀ ਲੋਕਪ੍ਰਿਯਤਾ ਵਧ ਰਹੀ ਹੈ। ਅਜਿਹੇ ਵਿੱਚ ਜਨਤਕ ਥਾਵਾਂ 'ਤੇ ਇਨ੍ਹਾਂ ਦੀ ਵਰਤੋਂ ਕਿਸ ਤਰ੍ਹਾਂ ਕੀਤੀ ਜਾਣੀ ਚਾਹੀਦੀ ਹੈ, ਇਸ 'ਤੇ ਬਹਿਸ ਜਾਰੀ ਹੈ।
ਉੱਥੇ ਹੀ, ਟਿਕਟੌਕ ਅਤੇ ਇੰਸਟਾਗ੍ਰਾਮ ਵਰਗੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਇਨ੍ਹਾਂ ਚਸ਼ਮਿਆਂ ਨਾਲ ਬਣਾਈਆਂ ਗਈਆਂ ਵੀਡੀਓਜ਼ ਦੀ ਲੋਕਪ੍ਰਿਯਤਾ ਵਧ ਰਹੀ ਹੈ। ਅਜਿਹੇ ਵਿੱਚ ਜਨਤਕ ਥਾਵਾਂ 'ਤੇ ਇਨ੍ਹਾਂ ਦੀ ਵਰਤੋਂ ਕਿਸ ਤਰ੍ਹਾਂ ਕੀਤੀ ਜਾਣੀ ਚਾਹੀਦੀ ਹੈ, ਇਸ ਨੂੰ ਲੈ ਕੇ ਬਹਿਸ ਜਾਰੀ ਹੈ।
ਪਿਅਰਸ ਵੈਲੇਲੀ ਵੀ ਇਨ੍ਹਾਂ ਕੰਟੈਂਟ ਕ੍ਰੀਏਟਰਾਂ ਵਿੱਚੋਂ ਇੱਕ ਹਨ। ਪੱਛਮੀ ਬੇਲਫਾਸਟ ਦੇ ਬੈਲੀਮਰਫੀ ਦੇ ਰਹਿਣ ਵਾਲੇ 31 ਸਾਲਾ ਪਿਅਰਸ ਸੋਸ਼ਲ ਮੀਡੀਆ 'ਤੇ ਆਪਣੇ ਕੰਮ ਤੋਂ ਪੈਸੇ ਕਮਾਉਂਦੇ ਹਨ।
ਉਹ ਮੈਟਾ ਰੇ-ਬੈਨ ਦੇ ਚਸ਼ਮਿਆਂ ਦੀ ਵਰਤੋਂ ਕਰਦੇ ਹਨ ਅਤੇ ਉਨ੍ਹਾਂ ਦੀਆਂ ਜ਼ਿਆਦਾਤਰ ਵੀਡੀਓਜ਼ ਵਿੱਚ ਸੜਕ 'ਤੇ ਤੁਰਦੇ ਹੋਏ ਉਨ੍ਹਾਂ ਦੇ ਚਸ਼ਮਿਆਂ ਰਾਹੀਂ ਦਿਖਾਈ ਦੇਣ ਵਾਲਾ ਦ੍ਰਿਸ਼ ਹੁੰਦਾ ਹੈ। ਇਨ੍ਹਾਂ ਵੀਡੀਓਜ਼ ਵਿੱਚ ਉਹ ਰਾਹਗੀਰਾਂ ਦਾ ਤੁਕਬੰਦੀ ਵਾਲੇ ਵਾਕਾਂ ਨਾਲ ਸਵਾਗਤ ਕਰਦੇ ਹਨ।
ਬੇਲਫਾਸਟ ਸ਼ਹਿਰ ਦੇ ਕੇਂਦਰ ਵਿੱਚ ਬਣਾਈਆਂ ਗਈਆਂ ਉਨ੍ਹਾਂ ਦੀਆਂ ਸਭ ਤੋਂ ਲੋਕਪ੍ਰਿਯ ਵੀਡੀਓਜ਼ ਵਿੱਚੋਂ ਇੱਕ ਨੂੰ ਟਿਕਟੌਕ 'ਤੇ 600,000 ਵਾਰ ਦੇਖਿਆ ਗਿਆ।
ਉਨ੍ਹਾਂ ਨੇ ਕਿਹਾ ਕਿ ਇਨ੍ਹਾਂ ਵੀਡੀਓਜ਼ ਦੀ ਕਾਮਯਾਬੀ ਇਸ ਗੱਲ 'ਤੇ ਨਿਰਭਰ ਕਰਦੀ ਹੈ ਕਿ ਉਹ ਲੋਕਾਂ ਨਾਲ ਕਿਸ ਤਰ੍ਹਾਂ ਗੱਲ ਕਰਦੇ ਹਨ। ਜੇ ਕੋਈ ਵਿਅਕਤੀ ਮਨ੍ਹਾ ਕਰ ਦੇਵੇ ਤਾਂ ਉਨ੍ਹਾਂ ਨੇ ਕਦੇ ਵੀ ਉਸ ਦੀ ਵੀਡੀਓ ਪੋਸਟ ਨਹੀਂ ਕੀਤੀ ਅਤੇ ਨਾ ਹੀ ਕਦੇ ਕਿਸੇ ਨੇ ਉਨ੍ਹਾਂ ਨੂੰ ਕੋਈ ਵੀਡੀਓ ਹਟਾਉਣ ਲਈ ਕਿਹਾ।
"ਮੈਨੂੰ ਲੱਗਦਾ ਹੈ ਕਿ ਇਸ ਦੀ ਵਜ੍ਹਾ ਇਹ ਹੈ ਕਿ ਮੈਂ ਲੋਕਾਂ ਨਾਲ ਜਿਸ ਤਰ੍ਹਾਂ ਗੱਲ ਕਰਦਾ ਹਾਂ। ਉਨ੍ਹਾਂ ਨੂੰ ਪਤਾ ਹੁੰਦਾ ਹੈ ਕਿ ਮੈਂ ਉਨ੍ਹਾਂ ਨੂੰ ਬੇਵਕੂਫ਼ ਬਣਾਉਣ ਦੀ ਕੋਸ਼ਿਸ਼ ਨਹੀਂ ਕਰ ਰਿਹਾ। ਮੈਂ ਇਹ ਚੰਗੇ ਇਰਾਦੇ ਨਾਲ ਕਰਦਾ ਹਾਂ।"
ਵੈਲੇਲੀ ਜਿਨ੍ਹਾਂ ਮੈਟਾ ਗਲਾਸੇਜ਼ ਦੀ ਵਰਤੋਂ ਕਰਦੇ ਹਨ, ਉਹ ਸਮਾਰਟ ਚਸ਼ਮਿਆਂ ਦੇ ਵਧਦੇ ਬਾਜ਼ਾਰ ਵਿੱਚ ਸਭ ਤੋਂ ਅੱਗੇ ਹਨ। ਕੰਪਨੀ ਮੁਤਾਬਕ, ਹੁਣ ਤੱਕ ਇਨ੍ਹਾਂ ਦੇ 70 ਲੱਖ ਤੋਂ ਵੱਧ ਪੇਅਰਸ ਵਿਕ ਚੁੱਕੇ ਹਨ।
ਤਸਵੀਰ ਸਰੋਤ, Pearse Vallely
ਮੈਟਾ ਗਲਾਸੇਜ਼ ਕਿਵੇਂ ਕੰਮ ਕਰਦੇ ਹਨ?
ਕੁਝ ਸੌ ਪਾਊਂਡ ਵਿੱਚ ਮਿਲਣ ਵਾਲੇ ਇਨ੍ਹਾਂ ਚਸ਼ਮਿਆਂ ਨੂੰ ਮਸ਼ਹੂਰ ਸਨਗਲਾਸ ਬ੍ਰਾਂਡ ਰੇ-ਬੈਨ ਬਣਾਉਣ ਵਾਲੀ ਕੰਪਨੀ ਨਾਲ ਮਿਲ ਕੇ ਤਿਆਰ ਕੀਤਾ ਗਿਆ ਹੈ। ਇਨ੍ਹਾਂ ਵਿੱਚ ਇੱਕ ਛੋਟਾ ਕੈਮਰਾ ਲੱਗਾ ਹੈ, ਜਿਸ ਨੂੰ ਚਸ਼ਮੇ ਨੂੰ ਛੂਹ ਕੇ ਚਾਲੂ ਕੀਤਾ ਜਾ ਸਕਦਾ ਹੈ।
ਕੈਮਰਾ ਚਾਲੂ ਹੁੰਦੇ ਹੀ ਚਸ਼ਮੇ 'ਤੇ ਚਿੱਟੀ ਰੋਸ਼ਨੀ ਜਗਦੀ ਹੈ। ਇਸ ਦਾ ਮਕਸਦ ਆਲੇ-ਦੁਆਲੇ ਦੇ ਲੋਕਾਂ ਨੂੰ ਦੱਸਣਾ ਹੈ ਕਿ ਵੀਡੀਓ ਰਿਕਾਰਡ ਕੀਤੀ ਜਾ ਰਹੀ ਹੈ। ਤਸਵੀਰ ਖਿੱਚਦੇ ਸਮੇਂ ਇਸ ਵਿੱਚ ਫਲੈਸ਼ ਵੀ ਹੁੰਦਾ ਹੈ। ਮੈਟਾ ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ "ਸਮਾਰਟਫੋਨ ਅਤੇ ਹੋਰ ਕੈਮਰਿਆਂ ਵਿੱਚ ਇਹ ਸਹੂਲਤ ਨਹੀਂ ਹੈ।"
ਮੈਟਾ ਨੇ ਹਾਲ ਹੀ ਵਿੱਚ ਚਸ਼ਮਿਆਂ ਨੂੰ ਅਪਡੇਟ ਕੀਤਾ ਹੈ। ਹੁਣ ਜੇ ਕੋਈ ਇਸ ਰੋਸ਼ਨੀ ਨਾਲ ਛੇੜਛਾੜ ਕਰਦਾ ਹੈ ਤਾਂ ਕੈਮਰਾ ਕੰਮ ਕਰਨਾ ਬੰਦ ਕਰ ਦਿੰਦਾ ਹੈ।
ਜੇ ਮੈਟਾ ਵਰਗੇ ਏਆਈ ਅਤੇ ਸਮਾਰਟ ਚਸ਼ਮੇ ਬਣਾਉਣ ਵਾਲੀਆਂ ਹੋਰ ਕੰਪਨੀਆਂ ਦੇ ਉਤਪਾਦ ਵੀ ਲੋਕਪ੍ਰਿਯ ਹੁੰਦੇ ਹਨ, ਤਾਂ ਖੋਜਕਾਰਾਂ ਦਾ ਅਨੁਮਾਨ ਹੈ ਕਿ ਅਗਲੇ ਕੁਝ ਸਾਲਾਂ ਵਿੱਚ ਕਰੀਬ 10 ਕਰੋੜ ਲੋਕ ਅਜਿਹੇ ਚਸ਼ਮੇ ਖਰੀਦ ਸਕਦੇ ਹਨ।
ਵੈਲੇਲੀ ਦੀਆਂ ਵੀਡੀਓਜ਼ ਕੁਦਰਤੀ ਅਤੇ ਆਮ ਗੱਲਬਾਤ 'ਤੇ ਆਧਾਰਿਤ ਹੁੰਦੀਆਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਚਸ਼ਮੇ 'ਤੇ ਜਗਣ ਵਾਲੀ ਰੌਸ਼ਨੀ ਤੋਂ ਲੋਕਾਂ ਨੂੰ ਅਕਸਰ ਪਤਾ ਲੱਗ ਜਾਂਦਾ ਹੈ ਕਿ ਉਹ ਰਿਕਾਰਡਿੰਗ ਕਰ ਰਹੇ ਹਨ।
ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਉਨ੍ਹਾਂ ਨੂੰ ਸਮੇਂ ਸਿਰ ਮੌਕਾ ਮਿਲੇ ਤਾਂ ਰਿਕਾਰਡਿੰਗ ਤੋਂ ਬਾਅਦ ਉਹ ਲੋਕਾਂ ਨੂੰ ਦੱਸਣ ਦੀ ਕੋਸ਼ਿਸ਼ ਕਰਦੇ ਹਨ ਕਿ ਉਨ੍ਹਾਂ ਦੀ ਵੀਡੀਓ ਬਣਾਈ ਗਈ ਹੈ।
ਉੱਤਰੀ ਆਇਰਲੈਂਡ ਵਿੱਚ ਆਮ ਤੌਰ 'ਤੇ ਜਨਤਕ ਥਾਵਾਂ 'ਤੇ ਕਿਸੇ ਦੀ ਚੁੱਪ-ਚਾਪ ਵੀਡੀਓ ਬਣਾਉਣਾ ਗੈਰ-ਕਾਨੂੰਨੀ ਨਹੀਂ ਹੈ। ਇਸ ਦੀ ਵਜ੍ਹਾ ਇਹ ਹੈ ਕਿ ਜਨਤਕ ਥਾਵਾਂ 'ਤੇ ਲੋਕਾਂ ਨੂੰ ਆਮ ਤੌਰ 'ਤੇ ਨਿੱਜਤਾ ਦੀ ਪੂਰੀ ਉਮੀਦ ਨਹੀਂ ਹੁੰਦੀ।
ਹਾਲਾਂਕਿ, ਜੇਕਰ ਵੀਡੀਓ ਬਣਾਉਣਾ ਪਰੇਸ਼ਾਨ ਕਰਨ ਜਾਂ ਪਿੱਛਾ ਕਰਨ ਦੀ ਸ਼੍ਰੇਣੀ ਵਿੱਚ ਆਉਂਦਾ ਹੈ, ਫੁਟੇਜ ਅਸ਼ਲੀਲ ਹੈ ਜਾਂ ਅਜਿਹੀ ਥਾਂ 'ਤੇ ਰਿਕਾਰਡਿੰਗ ਕੀਤੀ ਗਈ ਹੈ ਜਿੱਥੇ ਵਿਅਕਤੀ ਨੂੰ ਨਿੱਜਤਾ ਦੀ ਉਮੀਦ ਹੈ ਤਾਂ ਫਿਰ ਇਸ ਨੂੰ ਗ਼ੈਰ-ਕਾਨੂੰਨੀ ਮੰਨਿਆ ਜਾਂਦਾ ਹੈ।
ਵੈਲੇਲੀ ਨੇ ਕਿਹਾ, "ਕਿਸੇ ਨਾਲ 30 ਸਕਿੰਟ ਦੀ ਗੱਲਬਾਤ ਕਰਨਾ ਠੀਕ ਹੈ।"
"ਮੈਨੂੰ ਲੱਗਦਾ ਹੈ ਕਿ ਤਕਨਾਲੋਜੀ ਦੀ ਵਜ੍ਹਾ ਨਾਲ ਅਸੀਂ ਇਹ ਚੀਜ਼ ਗੁਆ ਰਹੇ ਹਾਂ ਅਤੇ ਮੈਂ ਤਕਨਾਲੋਜੀ ਦੀ ਵਰਤੋਂ ਕਰਕੇ ਇਸ ਨੂੰ ਮੁੜ ਪਟੜੀ 'ਤੇ ਲਿਆਉਣ ਦੀ ਕੋਸ਼ਿਸ਼ ਕਰ ਰਿਹਾ ਹਾਂ।"
ਵੈਲੇਲੀ ਨੇ ਕਿਹਾ ਕਿ ਜੇਕਰ ਲੋਕ ਅਸ਼ਿਸ਼ਟ ਅਤੇ ਬਦਤਮੀਜ਼ੀ ਵਾਲਾ ਵਿਹਾਰ ਕਰ ਰਹੇ ਹਨ ਤਾਂ ਮੈਟਾ ਚਸ਼ਮੇ ਪਹਿਨਣ 'ਤੇ ਪਾਬੰਦੀ ਲਗਾਉਣ ਦੇ ਪਿੱਛੇ ਦੀ ਦਲੀਲ ਨੂੰ ਉਹ ਸਮਝ ਸਕਦੇ ਹਨ, ਪਰ ਉਨ੍ਹਾਂ ਨੇ ਕਿਹਾ ਕਿ ਫਿਲਮ ਬਣਾਉਣ ਪਿੱਛੇ ਦਾ ਇਰਾਦਾ ਮਹੱਤਵਪੂਰਨ ਹੈ।
"ਲੋਕਾਂ ਨੂੰ ਪਤਾ ਹੈ ਕਿ ਇਹ ਮੈਂ ਕਰ ਰਿਹਾ ਹਾਂ, ਜਦਕਿ ਦੂਜੇ ਲੋਕ ਟਰੋਲ ਅਕਾਊਂਟ ਤੋਂ ਅਜਿਹਾ ਕਰਦੇ ਹਨ। ਭਾਵੇਂ ਕੁਝ ਵੀ ਕਾਢ ਕੱਢੀ ਜਾਵੇ, ਲੋਕ ਉਸ ਦੀ ਗਲਤ ਵਰਤੋਂ ਕਰਨਗੇ ਹੀ।"
ਹਾਲਾਂਕਿ, ਵੈਲੇਲੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਕਦੇ ਕਿਸੇ ਦੇ ਵਿਰੋਧ ਦਾ ਸਾਹਮਣਾ ਨਹੀਂ ਕਰਨਾ ਪਿਆ, ਪਰ ਅਜਿਹੀਆਂ ਕਈ ਘਟਨਾਵਾਂ ਸਾਹਮਣੇ ਆਈਆਂ ਹਨ ਜਿਨ੍ਹਾਂ ਤੋਂ ਪਤਾ ਲੱਗਦਾ ਹੈ ਕਿ ਇਨ੍ਹਾਂ ਚਸ਼ਮਿਆਂ ਨਾਲ ਵੀਡੀਓ ਬਣਾਉਣ ਵਾਲਿਆਂ ਅਤੇ ਆਮ ਲੋਕਾਂ ਵਿਚਾਲੇ ਤਣਾਅ ਵਧ ਰਿਹਾ ਹੈ।
ਪਿਛਲੇ ਦਸੰਬਰ ਵਿੱਚ ਨਿਊਯਾਰਕ ਦੀ ਇੱਕ ਸਬਵੇਅ ਵਿੱਚ ਇੱਕ ਮਹਿਲਾ ਨੇ ਇੱਕ ਵਿਅਕਤੀ ਦਾ ਮੈਟਾ ਚਸ਼ਮਾ ਤੋੜ ਦਿੱਤਾ ਸੀ। ਇਸ ਤੋਂ ਬਾਅਦ ਸੋਸ਼ਲ ਮੀਡੀਆ 'ਤੇ ਲੋਕਾਂ ਨੇ ਉਸ ਮਹਿਲਾ ਨੂੰ "ਹੀਰੋ" ਤੱਕ ਕਿਹਾ।
ਜੁਲਾਈ ਵਿੱਚ ਸਕਾਟਲੈਂਡ ਦੀ ਪੁਲਿਸ ਨੇ ਇੱਕ ਟਿਕਟੌਕਰ ਦੇ ਖ਼ਿਲਾਫ਼ ਜਾਂਚ ਸ਼ੁਰੂ ਕੀਤੀ। ਉਸ 'ਤੇ ਇਲਜ਼ਾਮ ਸੀ ਕਿ ਉਸ ਨੇ ਇਨ੍ਹਾਂ ਚਸ਼ਮਿਆਂ ਨਾਲ ਆਮ ਲੋਕਾਂ ਦੀ ਚੁੱਪ-ਚਾਪ ਵੀਡੀਓ ਰਿਕਾਰਡ ਕੀਤੀ ਸੀ।
ਵੇਦਰਸਪੂਨਜ਼ ਦੇ ਇੱਕ ਬੁਲਾਰੇ ਨੇ ਆਪਣੇ ਪੱਬ ਵਿੱਚ ਇਨ੍ਹਾਂ ਚਸ਼ਮਿਆਂ 'ਤੇ ਲੱਗੀ ਪਾਬੰਦੀ ਬਾਰੇ ਕਿਹਾ ਕਿ ਸਮਾਰਟ ਗਲਾਸ "ਗੁਪਤ ਨਿਗਰਾਨੀ ਨੂੰ ਸੰਭਵ ਬਣਾ ਕੇ ਆਮ ਸਮਝ ਦੇ ਖ਼ਿਲਾਫ਼ ਜਾਂਦੇ ਹਨ।"
ਕੌਮਿਕ ਕੌਨ ਨੌਰਦਰਨ ਆਇਰਲੈਂਡ ਦਾ ਆਯੋਜਨ ਕਰਨ ਵਾਲੀ ਕੰਪਨੀ ਮੋਨੋਪੋਲੀ ਇਵੈਂਟਸ ਨੇ ਵੀ ਗੁਪਤ ਰਿਕਾਰਡਿੰਗ ਦੀ ਚਿੰਤਾ ਕਾਰਨ ਆਪਣੇ ਪ੍ਰੋਗਰਾਮਾਂ ਵਿੱਚ ਇਨ੍ਹਾਂ ਚਸ਼ਮਿਆਂ ਦੀ ਵਰਤੋਂ 'ਤੇ ਰੋਕ ਲਗਾ ਦਿੱਤੀ ਹੈ।
ਇਸ ਦਰਮਿਆਨ, ਟਿਕਟੌਕ 'ਤੇ ਅਜਿਹੀਆਂ ਵੀਡੀਓਜ਼ ਵੀ ਪੋਸਟ ਕੀਤੀਆਂ ਜਾ ਰਹੀਆਂ ਹਨ ਜਿਨ੍ਹਾਂ ਵਿੱਚ ਲੋਕ ਔਰਤਾਂ ਕੋਲ ਜਾ ਕੇ ਉਨ੍ਹਾਂ ਦਾ ਨੰਬਰ ਮੰਗਦੇ ਹਨ ਅਤੇ ਉਨ੍ਹਾਂ ਦੀ ਪ੍ਰਤੀਕਿਰਿਆ ਰਿਕਾਰਡ ਕਰਦੇ ਹਨ।
ਅਜਿਹੀਆਂ ਵੀਡੀਓਜ਼ ਅਕਸਰ '#ਹਾਉ ਟੂ ਗੈੱਟ ਗਰਲਫ੍ਰੈਂਡ' ਹੈਸ਼ਟੈਗ ਨਾਲ ਸ਼ੇਅਰ ਕੀਤੀਆਂ ਜਾਂਦੀਆਂ ਹਨ ਅਤੇ ਉਨ੍ਹਾਂ ਨੂੰ ਹਜ਼ਾਰਾਂ ਵਿਊਜ਼ ਮਿਲ ਸਕਦੇ ਹਨ।
ਸ਼ੋਸ਼ਣ ਸਬੰਧੀ ਚਿੰਤਾਵਾਂ
ਮਹਿਲਾ ਸਰੋਤ ਅਤੇ ਵਿਕਾਸ ਏਜੰਸੀ ਵਿੱਚ ਔਰਤਾਂ ਦੇ ਅਧਿਕਾਰਾਂ ਦੀ ਪੈਰਵੀ ਕਰਨ ਵਾਲੀ ਏਲਨ ਕ੍ਰੋਰੀ ਨੇ ਕਿਹਾ ਕਿ ਲੋਕਾਂ ਨੂੰ ਇਹ ਪਤਾ ਹੀ ਨਹੀਂ ਹੁੰਦਾ ਕਿ ਇਨ੍ਹਾਂ ਚਸ਼ਮਿਆਂ ਨਾਲ ਕਦੋਂ ਅਤੇ ਕਿਵੇਂ ਵੀਡੀਓ ਬਣਾਈ ਜਾ ਰਹੀ ਹੈ। ਇਸ ਨਾਲ ਸਹਿਮਤੀ ਨੂੰ ਲੈ ਕੇ ਸਵਾਲ ਉੱਠਦੇ ਹਨ।
"ਹੁਣ ਜੇਕਰ ਕੋਈ ਕੈਮਰੇ ਜਾਂ ਫੋਨ ਨਾਲ ਤੁਹਾਡੀ ਵੀਡੀਓ ਬਣਾ ਰਿਹਾ ਹੈ ਤਾਂ ਆਮ ਤੌਰ 'ਤੇ ਤੁਹਾਨੂੰ ਪਤਾ ਲੱਗ ਜਾਂਦਾ ਹੈ। ਤੁਸੀਂ ਚਾਹੋ ਤਾਂ ਉੱਥੋਂ ਹਟ ਸਕਦੇ ਹੋ। ਪਰ ਤੁਹਾਨੂੰ ਸ਼ਾਇਦ ਪਤਾ ਹੀ ਨਾ ਲੱਗੇ ਕਿ ਤੁਹਾਡੀ ਵੀਡੀਓ ਏਆਈ ਕੈਮਰੇ ਵਾਲੇ ਚਸ਼ਮਿਆਂ ਨਾਲ ਬਣਾਈ ਜਾ ਰਹੀ ਹੈ।"
ਉਨ੍ਹਾਂ ਨੇ ਕਿਹਾ ਕਿ ਇਹ ਚਿੰਤਾ ਵੀ ਹੈ ਕਿ ਇਨ੍ਹਾਂ ਚਸ਼ਮਿਆਂ ਦੀ ਵਰਤੋਂ ਅਜਿਹੇ ਕੰਮਾਂ ਲਈ ਹੋ ਸਕਦੀ ਹੈ ਜੋ ਪਹਿਲਾਂ ਤੋਂ ਗ਼ੈਰ-ਕਾਨੂੰਨੀ ਹਨ, ਜਿਵੇਂ ਕਿਸੇ ਦੀ ਸਕਰਟ ਦੇ ਹੇਠਾਂ ਤੋਂ ਵੀਡੀਓ ਬਣਾਉਣਾ।
ਕ੍ਰੋਰੀ ਨੇ ਕਿਹਾ ਕਿ ਲੋਕ ਸੋਸ਼ਲ ਮੀਡੀਆ ਪਲੇਟਫਾਰਮ ਤੋਂ ਵੀਡੀਓ ਹਟਾਉਣ ਦੀ ਮੰਗ ਕਰ ਸਕਦੇ ਹਨ। ਕੁਝ ਥਾਵਾਂ 'ਤੇ "ਮਾਮਲੇ ਦੇ ਆਧਾਰ 'ਤੇ" ਅਜਿਹੇ ਵੀਡੀਓ ਬਣਾਉਣ 'ਤੇ ਰੋਕ ਵੀ ਲਗਾਈ ਗਈ ਹੈ। ਪਰ ਉਨ੍ਹਾਂ ਦਾ ਮੰਨਣਾ ਹੈ ਕਿ ਕਾਨੂੰਨ ਅਜੇ ਇਸ ਤਕਨਾਲੋਜੀ ਦੇ ਨਾਲ ਕਦਮ ਨਹੀਂ ਮਿਲਾ ਪਾ ਰਿਹਾ ਹੈ।
ਉਨ੍ਹਾਂ ਨੇ ਕਿਹਾ, "ਜੇਕਰ ਕਿਸੇ ਵਿਅਕਤੀ ਦੀ ਸੜਕ, ਬੱਸ ਜਾਂ ਕਲਾਸ ਵਿੱਚ ਵੀਡੀਓ ਬਣਾਈ ਜਾਂਦੀ ਹੈ ਤਾਂ ਉਸ ਕੋਲ ਇਸ ਦੇ ਖ਼ਿਲਾਫ਼ ਕੋਈ ਕਾਨੂੰਨੀ ਰਾਹ ਨਹੀਂ ਹੈ।"
ਉਨ੍ਹਾਂ ਨੇ ਕਿਹਾ, "ਜੇਕਰ ਕਿਸੇ ਵਿਅਕਤੀ ਦੀ ਸੜਕ, ਬੱਸ ਜਾਂ ਕਲਾਸ ਵਿੱਚ ਵੀਡੀਓ ਬਣਾਈ ਜਾਂਦੀ ਹੈ ਤਾਂ ਉਸ ਕੋਲ ਇਸ ਦੇ ਖ਼ਿਲਾਫ਼ ਕੋਈ ਕਾਨੂੰਨੀ ਰਾਹ ਨਹੀਂ ਹੈ।"
ਨਿਆਂ ਵਿਭਾਗ (ਡੀਓਜੇ) ਨੇ ਕਿਹਾ ਕਿ ਮੈਟਾ ਗਲਾਸੇਜ਼ ਦਾ ਨਿਯਮਨ ਸਿੱਧੇ ਤੌਰ 'ਤੇ ਉਸ ਦੇ ਅਧਿਕਾਰ ਖੇਤਰ ਵਿੱਚ ਨਹੀਂ ਆਉਂਦਾ।
ਹਾਲਾਂਕਿ, ਜੇਕਰ ਇਨ੍ਹਾਂ ਚਸ਼ਮਿਆਂ ਦੀ ਵਰਤੋਂ ਕਿਸੇ ਅਜਿਹੇ ਕੰਮ ਲਈ ਹੁੰਦੀ ਹੈ ਜੋ ਅਪਰਾਧ ਦੀ ਸ਼੍ਰੇਣੀ ਵਿੱਚ ਆਉਂਦਾ ਹੈ ਤਾਂ ਮੌਜੂਦਾ ਕਾਨੂੰਨ ਲਾਗੂ ਹੋਣਗੇ। ਇਨ੍ਹਾਂ ਵਿੱਚ 'ਅਪ-ਸਕਰਟਿੰਗ' ਵਰਗੇ ਅਪਰਾਧ ਵੀ ਸ਼ਾਮਲ ਹਨ, ਜੋ ਕਿਸੇ ਦੀ ਨਿੱਜੀ ਤਸਵੀਰ ਜਾਂ ਵੀਡੀਓ ਉਸ ਦੀ ਜਾਣਕਾਰੀ ਤੋਂ ਬਿਨਾਂ ਬਣਾਉਣ ਨਾਲ ਜੁੜੇ ਹਨ।
ਮੈਟਾ ਗਲਾਸੇਜ਼ ਦੇ ਫਾਇਦੇ
ਬੇਲਫਾਸਟ ਵਿੱਚ ਆਪਣੀ ਦੁਕਾਨ 'ਤੇ ਮੈਟਾ ਚਸ਼ਮੇ ਵੇਚਣ ਵਾਲੇ ਨੇਤਰ ਮਾਹਰ ਜਿਓਫ ਮੈਕਕੌਨਵਿਲ ਮੰਨਦੇ ਹਨ ਕਿ ਇਨ੍ਹਾਂ ਦੀ "ਗਲਤ ਵਰਤੋਂ" ਨੂੰ ਲੈ ਕੇ ਚਿੰਤਾ ਹੈ। ਪਰ ਉਨ੍ਹਾਂ ਮੁਤਾਬਕ, ਇਸ ਤਕਨਾਲੋਜੀ ਦੇ ਕਈ ਫਾਇਦੇ ਵੀ ਹਨ।
ਉਹ ਦੱਸਦੇ ਹਨ ਕਿ ਉਨ੍ਹਾਂ ਦੇ ਕੁਝ ਮਰੀਜ਼ ਟੈਕਸਟ-ਟੂ-ਸਪੀਚ ਸਹੂਲਤ ਦੀ ਵਰਤੋਂ ਕਰਦੇ ਹਨ। ਇਸ ਨਾਲ ਉਹ ਏਆਈ ਦੀ ਮਦਦ ਨਾਲ ਅਖ਼ਬਾਰ ਅਤੇ ਸਾਈਨਬੋਰਡ ਪੜ੍ਹ ਸਕਦੇ ਹਨ।
"ਮੇਰੇ ਬਜ਼ੁਰਗ ਅਤੇ ਘੱਟ ਦਿਖਾਈ ਦੇਣ ਵਾਲੇ ਮਰੀਜ਼ਾਂ ਲਈ ਇਹ ਚਸ਼ਮੇ ਬੇਹੱਦ ਲਾਭਦਾਇਕ ਹਨ। ਇਹ ਸ਼ਾਨਦਾਰ ਹਨ।"
ਮੈਟਾ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇਹ ਚਸ਼ਮੇ "ਘੱਟ ਦਿਖਾਈ ਦੇਣ ਜਾਂ ਸੁਣਨ ਵਿੱਚ ਪਰੇਸ਼ਾਨੀ ਵਾਲੇ ਲੋਕਾਂ ਲਈ ਨਵੀਂ ਅਤੇ ਅਹਿਮ ਤਕਨਾਲੋਜੀ ਮੁਹੱਈਆ ਕਰਦੇ ਹਨ। ਇਸ ਤਕਨਾਲੋਜੀ ਦੀ ਵਰਤੋਂ 'ਤੇ ਰੋਕ ਲਗਾਉਣਾ ਇੱਕ ਵੱਡਾ ਕਦਮ ਪਿੱਛੇ ਜਾਣ ਵਰਗਾ ਹੋਵੇਗਾ।"
ਕੰਪਨੀ ਨੇ ਕਿਹਾ, "ਕੁਝ ਥਾਵਾਂ 'ਤੇ ਬਿਲਕੁਲ ਵੀ ਵੀਡੀਓ ਨਹੀਂ ਬਣਾਈ ਜਾਣੀ ਚਾਹੀਦੀ ਅਤੇ ਇਹ ਗੱਲ ਸਮਝ ਵਿੱਚ ਆਉਂਦੀ ਹੈ। ਪਰ ਨਿਯਮਾਂ ਨੂੰ ਹਰ ਥਾਂ ਇੱਕੋ ਤਰ੍ਹਾਂ ਲਾਗੂ ਕੀਤਾ ਜਾਣਾ ਚਾਹੀਦਾ ਹੈ।"
ਹਾਲ ਹੀ ਵਿੱਚ ਇੱਕ ਸਵਾਲ-ਜਵਾਬ ਸੈਸ਼ਨ ਵਿੱਚ ਇੰਸਟਾਗ੍ਰਾਮ ਦੇ ਮੁਖੀ ਐਡਮ ਮੋਸੇਰੀ ਨੇ ਕਿਹਾ ਕਿ ਜੇਕਰ ਲੋਕ ਅਜਿਹੀ ਸਮੱਗਰੀ ਪੋਸਟ ਕਰਦੇ ਹਨ ਜੋ "ਦੂਜਿਆਂ ਦਾ ਫਾਇਦਾ ਉਠਾਉਂਦੀ ਹੈ ਅਤੇ ਉਨ੍ਹਾਂ ਨੂੰ ਪਰੇਸ਼ਾਨ ਕਰਦੀ ਹੈ", ਤਾਂ ਇੰਸਟਾਗ੍ਰਾਮ ਉਸ ਨੂੰ ਹਟਾ ਦੇਵੇਗਾ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
