د سعودي پر څلورو ښارونو د حوثي وسله والو بریدونه؛ "۷۳ کسان ټپيان شوي"
د عکس سرچینه، Houthi Media Center via Getty Images
د سعودي عرب په مشرۍ ائتلاف ويلي چې د ایران له ملاتړه برخمنې حوثۍ ډلې د سعودي عربستان څلور ښارونه د بې پيلوټه الوتکو او توغنديزو بریدونو هدف ګرځولي دي.
دغه ائتلاف وايي د دغو بریدونو په پايله کې لږ تر لږه ۷۳ کسان ټپيان شوی دي.
د ائتلاف وياند ترکي المالکي ويلي چې د ائتلاف ځواکونه به د دغو بې پيلوټه الوتکو او توغنديزو بریدونو ته "پرېکنده" ځواب ورکړي.
په هغو ځايونو کې چې بریدونه پرې شوې، د ابها نړيوال هوايي ډګر، د ملک خالد هوايي اډه او ابها او جيزان په ښارونو کې د دولتي نفتو کمپنۍ ارامکو اړوند تاسيسات هم شامل دي.
په همدې مهال حوثيانو د دوشنبې په ورځ سعودي عربستان تورن کړ چې په يمن کې یې ګڼ هوايي بریدونه کړي چې په وینا یې په هغو کې پر يوه زندان مرګونی برید هم شامل دی چې اوه کسان په کې وژل شوي دي.
د عکس سرچینه، Houthi Media Center via Getty Images
حوثيان چې د يمن تر ټولو ګڼ مېشتې سيمې او د دغه هېواد د شمال يوه لويه برخه تر کنټرول لاندې لري، په جولای مياشت کې د سعودي عربستان پر وړاندې د سمندري کلابندۍ له اعلان راهيسې پر دغه هېواد بریدونه کړي او د سره سمندرګي په سيمه کې یې د هغه هېواد بېړۍ هم په نښه کړې دي.
په يمن کې د سعودي عربستان په مشرۍ د ائتلاف ویاند د جګړو وروستی زياتوالی "خطرناک" بللی او ويلي یې دي چې حوثيانو د نړۍ د نفتور تر ټولو لوی صادرونکي هېواد ملکي او اقتصادي تاسيسات په نښه کړي دي.
هغه په يوه اعلاميه کې چې پر اېکس ټولنيزه شبکه خپره شوې ويلي، "ائتلاف به د دغو ترهګرو ملېشو د مخنيوي او د هغوی د دښمنانه چلند پر وړاندې د پرېکنده مقابلې لپاره ټول اړين عملياتي ګامونه پورته کړي".
د بریتانيا فايننشل ټايمز ورځپاڼې راپور ورکړی و چې په جيزان کې د ارامکو د نفتو تاسيساتو په نويو بریدونو کې په نښه شوې او د اوښتو زيانونو اندازه لا تر څېړنې لاندې ده. ارامکو په دې اړه څه نه دي ويلي.
