Menyw wedi dioddef 'marwolaeth dreisgar' - cwest

Hunlun o Charlene Dowsell - menyw 41 oed gyda gwallt golau at ei hysgwyddau a llygaid glasLlun teulu

Roedd Charlene Dowsell yn 41 oed ac yn fam i bedwar o blant

Mae agoriad cwest wedi clywed am "farwolaeth dreisgar" menyw a gafodd ei thrywanu ar stryd yng Nghasnewydd.

Bu farw Charlene Mary Dowsell, 41, ar 18 Gorffennaf yn dilyn ffrwgwd ger canol y ddinas.

Clywodd Llys Crwner Gwent bod yr heddlu wedi derbyn galwad am 01:37 yn dweud bod "dyn a menyw yn ymladd at Heol St Vincent a bod y fenyw yn gwaedu".

Daeth swyddogion heddlu a pharafeddygon o hyd i Ms Dowsell gerllaw, ac fe gafodd ei chadarnhau'n farw yn y fan a'r lle am 03:15 er gwaethaf ymdrechion i achub ei bywyd.

Mae archwiliad post-mortem wedi nodi casgliad cychwynnol mai achos y farwolaeth oedd anaf trwy drywanu i ochr chwith y cefn, gan niweidio'r ysgyfaint, stumog a'r iau.

Cerbydau a thâp heddlu ar Heol St Vincent, Casnewydd

Cafodd y gwasanaethau brys eu galw wedi adroddiadau o ffrae ar Heol St Vincent ddydd Sadwrn 18 Gorffennaf

Dywedodd y Crwner Rose Farmer bod y cwest yn cael ei ohirio nes canlyniad camau cyfreithiol.

Mae dyn 66 oed o'r ddinas, Albert Williams, wedi cael ei gyhuddo o lofruddiaeth.

Mewn ymateb i'w marwolaeth, dywedodd teulu Ms Dowsell bod y sefyllfa'n dorcalonnus a bod pedwar o blant wedi colli eu mam.

Ychwanegodd eu datganiad: "Rwyt ti mewn hedd nawr, ein merch hyfryd. Wedi ein gadael ond byth yn angof."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Straeon perthnasol