ስደተኞች ከሞሮኮ ወደ ሴዩታ ከመሻገራቸው በፊት የስፔን የደኅንነት ተቋም መረጃ እንደደረሰው ተገለጸ

በአሥር ሺህዎች የሚቆጠሩ ስደተኞች ከሞሮኮ ወደ ስፔን ግዛት ሴዩታ ከመሻገራቸው በፊት የስፔን የደኅንነት ተቋም መረጃ ደርሶት እንደነበረ አዲስ የመንግሥት ሰነድ ይፋ አደረገ።

የስፔን መንግሥት በርካታ ቁጥር ያላቸው ስደተኞች ከሞሮኮ መሻገራቸውን በተመለከተ ተመጣጣኝ እርምጃ አልወሰደም በሚል እየተወቀሰ ሳለ ነው ሰነዶቹን ያወጣው።

በማኅበራዊ ሚዲያ ላይ ስደተኞች የስፔንን ድንበር እንዲሻገሩ ጥሪ የሚያደርጉ ይዘቶች መዘዋወራቸውን በተመለከተ በአውሮፓውያኑ ሐምሌ 29 የስፔን ብሔራዊ ደኅንነት ተቋም ለሞሮኮ እና ሴዩታ ባለሥልጣናት አስታውቋል።

በአሥር ሺህዎች የሚቆጠሩት ስደተኞች ሴዩታ የገቡት ሐምሌ 30 ነበር።

የስፔን ጠቅላይ ሚኒስትር ፔድሮ ሳንቼዝ በበኩላቸው ስደተኞቹ ወደ ሴዩታ ሊገቡ ይችላሉ ብሎ መገመት ከባድ እንደሆነ ገልጸዋል።

"ሊፈጠር የሚችለውን ቀውስ የሚጠቁም መረጃ" እንዳልነበረ በምክር ቤት ቀርበውም ተናግረዋል።

ቢያንስ 72,000 ስደተኞች በሁለት ቀናት ውስጥ ከሞሮኮ ወደ ሴዩታ ተሻግረዋል። በጉዞው ወቅት ቢያንስ 100 ስደተኞች ሞተዋል።

ከስደተኞቹ አብዛኞቹ ወደ ሞሮኮ ቢመለሱም ወደ 5,000 የሚጠጉት በሴዩታ ይገኛሉ።

ስደተኞቹ በጊዜያዊ መጠለያዎች እና ጎዳና ላይ እየኖሩ ነው። የሴዩታ ነዋሪዎች የደኅንነት ስጋት እንዳለባቸው በመግለጽ ጊዜያዊ መጠለያዎች ላይ ጥቃት አድርሰዋል፤ እርዳታ ለስደተኞች እንዳይቀርብም አግደዋል።

በዋትስአፕ እና ፌስቡክ ላይ ስደተኞች ወደ ስፔን ለመግባት "የብረት አጥር መሻገር ወይም በዋና ውቅያኖስ ማቋረጥ" እንዳለባቸው የተሰራጨውን መረጃ በተመለከተ ለስፔን የደኅንነት ተቋም መረጃ መድረሱ ተገልጿል።

መልዕክቱ 180,000 ለሚደርሱ ሰዎች እንደተላከ መንግሥት ይፋ ያደረገው ሰነድ ይጠቁማል።

ሞሮኮ ስደተኞቹ ወደ ሴዩታ እንዲሻገሩ እንደደገፈች እና ጠቅላይ ሚኒስትሩም ጉዳዩን ችላ እንዳሉት በመግለጽ በርካቶች ተቃውሞ አሰምተዋል።

ጠቅላይ ሚኒስትሩ ግን ሞሮኮ እጇ እንዳለበት የሚያሳይ ማስረጃ እንደሌለ ተናግረዋል።

ተቃዋሚ ፓርቲዎች ስደተኞቹ ወደ ሴዩታ ሊሻገሩ እንደሚችሉ መረጃ እንደነበረ በመግለጽ ጠቅላይ ሚኒስትሩን ኮንነዋል።

የስፔኑ ወግ አጥባቂው ፒፕልስ ፓርቲ አባል ኤስተር ሙኔዝ "መረጃው ነበራቸው፤ ሴዩታ ለመወረሯ እና ሰዎች ለመሞታቸው በቀጥታ ተጠያቂ ናቸው" ብለዋል።

የቀኝ ዘመሙ ቮክስ ፓርቲ ኃላፊ ጆርግ ቡክሴድ ጠቅላይ ሚኒስትሩ እና "የወንጀል ቡድናቸው በአገር መክዳት እና ደኅንነትን ባለመጠበቅ በሠሩት ወንጀል ጠቅላይ ፍርድ ቤት መቅረብ አለባቸው" ብለዋል።

የስፔን መንግሥት ባገኘው መረጃ ላይ ተመርኩዞ ተገቢውን እርምጃ እንደወሰደ በተደጋጋሚ ገልጿል።

የውጭ ጉዳይ ሚኒስትር ሆዜ ማኑኤል አልባሬስ "ሐምሌ 30 የተፈጠረውን ያልተጠበቀ ክስተት የተመለከተ መረጃ አልነበረኝም" ብለዋል።

አንድ የስፔን መንግሥት ምንጭ በበኩላቸው አሁን ላይ ይፋ የተደረጉት ሰነዶች ስደተኞች በብዛት ድንበር ሊሻገሩ እንደሚችሉ ለመገመት "በቂ መረጃ" ስለመኖሩ አይጠቁሙም ሲሉ ተናግረዋል።