ቀጥታ, ኬንያ ኣብ ልዕሊ ስደተኛታት ተፈጢሩ ዘሎ ዓቢይ ስክፍታ

ቀጥታዊ ሸፈነ

1. ቅድሚ ሓደ ሰዓትኬንያ፡ ኣማኢት ብሩንዳያውያን ካብታ ሃገር ንምውጻእ ይጓየዩ

   

   ምንጪ ስእሊ, Reuters

   ኣብ ኬንያ ዝነብሩ ኣማኢት ዜጋታት ብሩንዲ፡ እቲ መንግስቲ ፍቓድ ንዘይብሎም ኣብ ንኣሽቱ ንግዲ ንዝነጥፉ ወጻእተኛታት ዝገብሮ ስጕምቲ ቅድሚ ምጅማሩ፡ ካብታ ሃገር ንምውጻእ ናይ ጕዕዞ ሰነዳት ንምድላው ይጓየዩ ኣለዉ።

   ፕረዚደንት ኬንያ ዊልያም ሩቶ፡ እቶም ፍቓድ ዘይብሎም ወጻእተኛታት ነቲ ንዜጋታት ኬንያ ጥራይ ዝተሓዝአ ንኡስ ዕዮታት ካብ ሰኑይ ደው ከብሉ ገደብ ምንባሩ ይፍለጥ።

   ምኒስትሪ ንግዲ ኬንያ፡ ገለ ወጻእተኛታት ብቪዛ ወፍሪ ወይ ምብጻሕ ኣትዮም፡ ነቲ ሕጊ ብምጥሓስ ኣብ ንኣሽቱ ዕዮታት ይነጥፉ ከም ዘለዉ ገሊጹ።

   በዚ ምኽንያት፡ ሓያሎ ብሩንዳውያን ናብ ዓዶም ንምምላስ ኣብ ናይሮቢ ኣብ ዝርከብ ኤምባሲ ሃገሮም ተሰሪዖም ህጹጽ ሰነዳት ጕዕዞ ክረኽቡ ይጽዕሩ ኣለዉ። ገሊኦም ድማ ንብረቶም ብምዕሻግ ትኬት ኣውቶቡስ ንምዕዳግ ኣብ ታህዋኽ ይርከቡ።

   ምኒስትሪ ጉዳያት ወጻኢ ብሩንዲ ኤድዋርድ ቢዚማና፡ ኣብ ኬንያ ዝነብሩ ዜጋታቶም ንዝዀነ መጥቃዕቲ ክቃልዑ ከም ዘይብሎም ኣጠንቂቑ። ኬንያ ንድሕነት ዜጋታት ብሩንዲ ተሓታቲት ምዃና ዝገለጸ እቲ ምኒስተር፡ ፕረዚደንት ሩቶ ብወገኑ፡ ወጻእተኛታት ኣውፈርቲ፡ ዕድል ዕዮ ክፈጥሩ እምበር ኣብ ንኣሽቱ ንግድታት ክዋፈሩን ምስ ኬንያውያን ክወዳደሩ ከም ዘይግባእ ገሊጹ።

   እዚ ሓድሽ ስጕምቲ ጽልኢ ወጻእተኛታት ከይቅስቅስ ስግኣት ዝፈጠረ ኰይኑ፡ ገለ ሰበ-ስልጣን ኬንያ ግን ሕጋዊ ፍቓድ ስራሕ ዘለዎም ወጻእተኛታት ዕዮታቶም ክቕጽሉ ከም ዝኽእሉ ገሊጾም ኣለዉ።

   እዚ ኵነታት’ዚ፡ ዜጋታት ኬንያ እውን ኣብ ጐረባብቲ ሃገራት ምብራቕ ኣፍሪቃ ተመሳሳሊ ዕዮታት ዝሰርሑ ብምዃኖም፡ ኣብቲ ዞባዊ ምትእስሳር ዓቢ ጸቕጢ ክፈጥር ከም ዝኽእል ተንተንቲ ይሕብሩ።

2. ቅድሚ ሓደ ሰዓትኣመሪካ፡ ድሕሪ ሓደጋ ነፋሪት ኣማዞን መመዝገቢ መሳርሒታት በረራ ተረኺቦም

   

   ምንጪ ስእሊ, Reuters

   ኣብ ኣመሪካ ግዝኣት ፍሎሪዳ፡ ማያሚ ዓለምለኻዊ መዓርፎ ነፈርቲ፡ ድሕሪ ዘጋጠመ ምሕምሻሽ ናይ ጽዕነት ነፋሪት ኣማዞን፡ ናይ በረራ መመዝገቢ መሳርሒታት (black box) ከም ዝተረኽቡ ሰብ-መዚ ገሊጾም።

   ይዅን’ምበር፡ ኣብዚ እዋን’ዚ ንሬሳታት ግዳያት ናይ ምውጻእ ስራሕ ቀዳምነት ተዋሂብዎ ከም ዘሎ ሃገራዊ ቤት ምኽሪ ድሕነት መጓዓዝያ ሓቢሩ።

   እታ ብኩባንያ '21 Air' እትመሓደር ቦይንግ 767-300 ዝዓይነታ ነፋሪት፡ ካብ መስመር በረራ ብምውጻእ ምስ ክልተ ተሽከርከርቲ ድሕሪ ምግጫዋ፡ ሓሙሽተ ሰባት ክሞቱ ከለዉ፡ ካልኦት ሓሙሽተ ድማ ከቢድ መጕዳእቲ ወሪድዎም ኣሎ። እታ ነፋሪት ካብቲ መዓርፎ ነፈርቲ ወጻኢ ንሓንቲ ሸውዓተ ሰባት ዝጸዓነት ቫንን ሓንቲ ንእሽቶ መኪናን ከም ዝሃረመት ተገሊጹ።

   ሓላፊት ናይቲ መንገዲ ኣየር ጀኒፈር ሆመንዲ፡ ጠንቂ እቲ ሓደጋ ንምፍላጥ ገና ኣብ "ምእካብ ሓበሬታ" ከም ዘለዉ ገሊጻ። እቲ መጽናዕቲ፡ ንታሪኽ በረራ፡ ተመኵሮ ኣባላት በረራን ኵነታት ኣየርን ዘጠቓልል ክኸውን እዩ።

   ብተወሳኺ’ውን፡ እቲ መዓርፎ ነፈርቲ ካብ መስመር ንዝወጽኣ ነፈርቲ ንምዕጋት ዘገልግል ዘመናዊ መሳርሒ (EMAS) ክህልዎ ይግባእ ነይሩዶ ዝብል ነጥቢ ሓደ ካብቶም ቀንዲ መርመራ ዝካየደሎም ጉዳያት ክኸውን እዩ።

   እቲ ሓደጋ ኣብ ኣመሪካ ብዙሕ ምንቅስቓስ ዝርኣየሉ ናይ 'መዓልቲ ሰራሕተኛታት' ዕረፍቲ ኣብ ዝነበረሉ ግዜ ዘጋጠመ ኰይኑ፡ ኩባንያ ኣማዞን በቲ ዘጋጠመ ህይወት ምጥፋእ "ልቡ ከም ዝተሰብረ" ገሊጹ ኣሎ።

   ኩባንያ '21 Air' ብወገኑ፡ ንቤተሰብ ግዳያት ምስጋናኡ ብምግላጽ ምስቲ መርመራ ዝገብር ዘሎ ትካል ምሉእ ብምሉእ ይተሓባበር ከም ዘሎ ኣፍሊጡ።

3. ቅድሚ ሓደ ሰዓትሩስያን ሰሜን ኮርያን ዘራኽብ ቀዳማይ ድልድል ተመሪቑ

   

   ምንጪ ስእሊ, Reuters

   ሩስያን ሰሜን ኮርያን ኣብ መንጎአን ዝርከብ ፈለግ ቱመን ብምቍራጽ ዘራኽብ ናይ መጀመርታ ድልድል ብወግዒ ኣመሪቐን። እዚ ድልድል’ዚ ክልተአን ሃገራት ጽዕነትን ተጓዓዝትን ብዝያዳ ንኽለዋወጣ ዝሕግዝ ኰይኑ፡ ንርክበን ናብ ሓድሽ ምዕራፍ ዘሰጋግር ግደ ከም ዘለዎ ተገሊጹ።

   ቀዳማይ ምኒስተር ሩስያ ሚካኤል ሚሹስቲን ነቲ ድልድል ከም "ሓድሽ ምልክት ዕርክነት" ክገልጾ ከሎ፡ ሰሜን ኮርያ ድማ "ታሪኻዊ ፍጻመ" ኢላቶ።

   ይዅን’ምበር፡ ኣብ ዩክረይን ዝርከቡ ተመራመርቲ፡ እቲ ድልድል "ብምስጢር ወተሃደራዊ ኣጽዋርን ሰራዊትን ንምምልላስ" ዝዓለመ ከም ዝዀነ የጠንቅቑ።

   እዚ ስጕምቲ እዚ፡ ሰሜን ኮርያ ኣብ ኲናት ዩክረይን ንሩስያ ትህቦ ዘላ ደገፍ ንምስፋሕ ዝሕግዝ "ናይ ወተሃደራዊ ሎጂስቲክስ መስመር" ክኸውን ከም ዝኽእል ተመራመርቲ ይሕብሩ።

   ብመሰረት ጸብጻብ ማዕከን ዜና ታስ፡ እቲ ድልድል ብመዓልቲ ክሳብ 300 ተሽከርከርትን ልዕሊ 2,300 ሰባትን ናይ ምትእንጋድ ዓቕሚ ኣለዎ።

   ቅድሚ ሕጂ እዘን ክልተ ሃገራት ብባቡርን ኣየርን ጥራይ ይራኸባ ከም ዝነበራ ዝፍለጥ ኰይኑ፡ ቀጥታዊ ርክበን ግን ኣብ ልዕሊ መስመር ባቡር ብዝተነጽፈ ግዝያዊ መንገዲ ጥራይ እዩ ነይሩ።

   እቲ ንዓመትን ኣርባዕተ ወርሕን ዝወሰደ ሓድሽ ድልድል፡ ሰሜን ኮርያ ንሩስያ ብቢልዮናት ዶላራት ዝግመት ኣጽዋርን ኣሽሓት ወተሃደራትን ትሰድድ ኣብ ዘላትሉ እዋን እዩ ተዛዚሙ።

   ተንተንቲ ከም ዝሕብርዎ፡ እዚ ርክብ እዚ ክልተኣን ሃገራት ኣብ 2024 ዝኸተማኦ ስትራተጅያዊ ምሕዝነት ተግባራዊ ንምግባር ዝተወሰደ ወሰንቲ ስጕምታት ሓደ እዩ።

4. 3 መስከረም 2026ትራምፕ ምስሉ ኣብ ሳንቲም ዝተቐረጸ ፈላሚ ህሉው ፕረዚደንት ኣመሪካ ኮይኑ

   

   ምንጪ ስእሊ, Reuters

   ምስሊ ፕረዚደንት ዶናልድ ትራምፕ ኣብ ሓደ ዶላር ሳንቲም ኣመሪካ ተሓቲሙ።

   ንሳነቲም ኣመሪካ ዝሰርሕ ትካል 'ሚንት' ከምዝበሎ፡ እቲ ገጽ ትራምፕ ዝሓዘ ዶላር ናብ ዕዳጋ ዝቐርብ ዘይኮነ፡ ከም ቅርሲ ዝተሓዝ እዩ።

   እቲ ስጉምቲ መቐጸልታ ናይቲ ትራምፕ ኣብ ትካላትን ቅርስታትን ኣመሪካ ሓድጉ ንምውቃር ክወስዶ ዝጸንሐ ተበግሶታት ምዃኑ ይግለጽ።

   ብመሰረት ሕጊ እታ ሃገር ብህይወቱ ዘሎ ፕረዚደንት ምስሉ ኣብ ዝኾነ ባጤራ (ገንዘብ) እታ ሃገር ክሕተም ፍቚድ ኣይኮነን።

   ቢቢሲ ብዛዕባ'ቲ ጉዳይ ተወሳኺ መብርሂ ንምርካብ ነቲ ትካል፡ ክፍሊ ፋይናንስ፡ ከምኡ'ውን ዋይት ሃውስ ተወኪስዎም ኣሎ።

   ብረቡዕ ናይ ፈለማ ሕታም ምስ ወጸ ቀልጢፉ ከምዝተወድአን፡ ተወሳኺ ሳነቲም ክሕተም ምዃኑን ሚንት ሓቢሩ'ሎ።

   ን25 ምስሊ ትራምፕ ዘለዎ ሳነቲም 61 ዶላር፡ ን100 ሳነቲም ድማ ብ154.5 ዶላር ይሽየጥ ከምዘሎ'ዩ ተፈሊጡ ዘሎ።

5. 3 መስከረም 2026ልዕሊ 80 ናብ ኣውሮጳ ክሰግሩ ዝፈተኑ ስደተኛታት ሞይቶም ክኾኑ ከምዝኽእሉ ተገሊጹ

   

   ምንጪ ስእሊ, Reuters

   ብኣንፈት ኣትላንቲካዊ ናብ ኣውሮጳ ክሰግሩ ካብ ዝተበገሱ ስደተኛታት 80 ሞይቶም ክኾኑ ከምዝኽእሉ ጸብጻባት ሓቢሮም።

   ኣብታ ንኣስታት ሓደ ወርሒ ኣብቲ ውቅያኖስ ጠፊኣ ዝጸንሐት ጃልባ ዝነበሩ ሓደ ህጻን ዝርከቦም 83 ሰባት ክሞቱ እንከለዉ፡ 44 ዕድለኛታት ግን ድሒኖም ኣለዉ።

   እታ ኣብ ፈለማ ወርሒ ነሓሰ ካብ ምዕራብ ኣፍሪቃዊት ሃገረ ጋምቢያ ዝተበገሰት ጃልባ 127 ሰባት ጽዒና ምንባራ ይፍለጥ።

   ስጳኛዊ መድሕን ባሕሪ (ስፓኒሽ ማሪታይም ረስክዩ) ዝተባህለ ማሕበር ከምዝበሎ፡ እታ ጃልባ ሓሙሽተ ሬሳታትን 44 ሰባትን ሒዛ ኣብ ገማግም ደሴታት ካናሪ እያ ተረኺባ።

   ብሰንኪ ሕማቕ ኲነታት ነቲ ሬሳታት ካብታ ጃልባ ከግዕዝዎ ከምዘይክኣሉ'ውን እቲ ማሕበር ሓቢሩ።

   ንዓመታት በዚ ሓደገኛ መስመር እዚ ክሰግሩ ዝፈተኑ ብዙሓት ስደተናታት ተመሳሳሊ ዕጫ ከምዘጋጠሞም ይፍለጥ።

6. 3 መስከረም 2026ዓለም 'ተራእዩ ዘይፈልጥ ኢል ኒኖ' ኣንጻላልዩዋ ከምዘሎ ሕቡራት ሃገራት ኣጠንቂቚ

   

   ምንጪ ስእሊ, Getty Images

   ዓለም ኣብ "ሓደገኛ ምዕራፍ ዝኸፍአ ኲነታት ኣየር" ከምዝበጽሐትን ሳዕቤናት ኢል ኒኖ ንመላእ ዓለም ከምዝጸሉ ዋና ጸሓፊ ሕቡራት ሃገራት ኣንቶንዮ ጉተረዝ ኣጠንቂቚ።

   ውድብ ሜትሮሎጂ ዓለም ዘውጽኦ ሓድሽ ጸብጻብ ከምዘመልክቶ፡ እቲ ኣንጸላልዩ ዘሎ ሓያል ኲነታት ኣየር ኣብ ዝሓለፈ 70 ዓመታት ንፈለማ ዝኽሰት ክኸውን ይኽእል'ዩ።

   እቲ ኲነታት፡ ዋዒ ፕላነት ምድሪ እናወሰኸ ኣብ ዝኸደሉ እዋን ይመጽእ ምህላዉ'ውን ነቲ ስግኣት ኣዕብይዎ ኣሎ።

   እቲ 'ኢል ኒኖ' ተባሂሉ ዝፍለጥ ክስተት ዘይርጉእን ተቐያያሪን ኲነታት ዝፈጥር ኮይኑ ኣብ ገለ ዞባታት ዓለም ደርቂ፡ ኣብ ካልእ ድማ ህቦብላታትን ዕልቕልቓትን ዘስዕብ'ዩ።

   ፈለማ ኣብ ሰላማዊ ውቅያኖስ ምስ ማዕበለ ንኣንፈታት ንፋስ ብምዝባዕ ውዑይ ማይ ናብ ምብራቕ ብምድፋእ ዋዒ ናብ ጠፈር ክዓርግ ይገብር።

7. 2 መስከረም 2026ቅትለት ቻርሊ ኪርክ፡ ተኸሳሲ ክሒዱ ናይ ሞት መቕጻዕቲ ድማ የንጸላልዎ

   

   ምንጪ ስእሊ, Reuters

   እቲ ንቻርሊ ኪርክ ብምቕታል ዝተኸሰሰ ወዲ 23 ዓመት መንእሰይ ታይለር ሮቢንሰን፡ ንዝቐረበሉ ክሲ ቅትለት "በደለኛ ኣይኰንኩን" ክብል ክሒዱ።

   ዳኛ እቲ ጉዳይ፡ ዓቃቢ ሕጊ ኣብቲ ኣብ ቀረባ ግዜ ዝካየድ መስርሕ ፍርዲ ናይ ሞት መቕጻዕቲ ክሓትት ከም ዝተፈቐደሉ ተገሊጹ።

   መስራቲ 'ተርኒንግ ፖይንት ዩኤስኤ' ዝዀነ ወዲ 31 ዓመት ቻርሊ ኪርክ፡ ብ10 መስከረም 2025 ኣብ ዩኒቨርሲቲ ዩታ ቫሊ መደረ እናሃበ እንከሎ እዩ ብተዅሲ ክሳዱ ተወቒዑ ተቐቲሉ።

   ጠበቓታት ተኸሳሲ፡ እቲ ናይ ሞት መቕጻዕቲ ካብቲ ክሲ ክእለ እኳ እንተ ሓተቱ፡ ዓቃቢ ሕጊ ግን እቲ ተኸሳሲ ቈልዑ ኣብ ዝነበርሉን ህዝቢ ኣብ ዝተኣከበሉን ቦታ ብምትኳሱ፡ እቲ ገበን ከቢድን ናይ ሞት መቕጻዕቲ ዘውህብን ምዃኑ ተኻቲዑ ኣሎ።

   ዓቃቢ ሕጊ ቻድ ግሩናንደር፡ "ታይለር ሮቢንሰን ንቻርሊ ኪርክ ካብ ዝቐትሎ 356 መዓልታት ኰይኑ ኣሎ፡" ብምባል ፍርዲ ክወሃብ ጸዊዑ።

   ኣብቲ ጉዳይ ቀሪቦም ዘለዉ መርትዖታት ከም ዘመልክትዎ፡ እቲ ተኸሳሲ ቅድሚቲ መጥቃዕቲ ምፍጻሙ ነቲ ዩኒቨርሲቲ ተደጋጋሚ ግዜ ይከታተሎ ከም ዝነበረን፡ ነቲ ጠመንጃ ንምሕባእ ክዳውንቱ ቀይሩ ብምምጻእ ነቲ ገበን ከም ዝፈጸሞን ተገሊጹ።

   ብተወሳኺ፡ ኣብቲ መጥቃዕቲ ዝወዓለ ጠመንጃ ዲኤንኤ እቲ ተኸሳሲ ከም ዝተረኽቦን ንመዳቕስቱ "ገበን ፈጺመ" ኢሉ ከም ዝተናዘዘሉን ተሓቢሩ።

   እዚ ጉዳይ ብ23 ጥቅምቲ ዳግማይ ኣብ ቤት ፍርዲ ዝርአ ኰይኑ፡ ኣብኡ ድማ እቲ ቀጥታዊ ናይ መጋባእያ ዕለት ክውሰን ትጽቢት ይግበር።

   

   ምንጪ ስእሊ, EPA/Shutterstock

8. 2 መስከረም 2026ዛምብያ፡ ፕረዚደንት ሂቺለማ መናሓንሕቱ ኣብ ቀይዲ ኣብ ዝርከበሉ ቃለ-መሓላ ፈጺሙ

   

   ምንጪ ስእሊ, Reuters

   ፕረዚደንት ዛምብያ ሃካይንደ ሂቺለማ፡ ኣብ ዝተኻየደ ሃገራዊ ምርጫ ብዝተፈጥረ ምስሕሓብ ቀንዲ መናሓንሕቱ ብገበን "ጥልመት ሃገር" ተኸሲሱ ኣብ ትሕቲ ቀይዲ ኣብ ዘለወሉ፡ ንኻልኣይ ናይ ሓሙሽተ ዓመት ስልጣን ቃለ-መሓላ ፈጺሙ።

   ኣብቲ ብ13 ነሓሰ ዝተኻየደ ምርጫ፡ ሂቺለማ 60% ድምጺ ብምርካብ ከም ዝሰዓረ ወግዓዊ ውጽኢት እኳ እንተ ሓበረ፡ 38% ድምጺ ዝረኸበ መናሓንሕቱ ብራያን ሙንዱቢለ ግን "ውጽኢቱ ተደናጊሩ እዩ" ብምባል ይቃወም።

   ሕብረት ኤውሮጳ እውን ኣብቲ መስርሕ ኣጸዋውዓ ድምጺ ሕቶታት ከም ዘለዎም ኣመልኪቶም ኣለዉ።

   ድሕሪ ምርጫ፡ ሓይልታት ጸጥታ ብዘካየድዎ ወፍሪ ሓደ ምኒስተር ነበር ክቕተል እንከሎ፡ ሙንዱቢለ ዝርከቦም ሓያሎ ተቓወምቲ ፖለቲከኛታት "ዕልዋ ንምክያድ ተዳልዮም" ብዝብል ክሲ ኣብ ትሕቲ ቀይዲ ውዒሎም ኣለዉ።

   ሂቺለማ ኣብ ናይ ቃለ-መሓላ መደረኡ ብዛዕባ እቲ ማእሰርቲ ዝበሎ ነገር እኳ እንተ ዘየሎ፡ "ስልጣን ንምሓዝ ዝግበር ህርፋን ንሰላምን ምርጋእን ሃገር ኣብ ሓደጋ ከውድቕ የብሉን፡" ክብል ኣተሓሳሲቡ።

   ንቝጠባ እታ ሃገር ንምርጋእ ብዝገበሮ ጻዕሪ ዝንኣድ ሂቺለማ፡ ኣብ ናይ መጀመርታ ዘመኑ "ዝዓነወት ሃገር" ከም ዝተረከበ ብምግላጽ፡ ሕጂ ግን ካብቲ ዝነበረ ናይ ምርጋእ ስጕምቲ ናብ ዕብየት ቍጠባዊ ብልጽግናን ክሰጋገር ምዃኑ ቃል ኣትዩ።

   እቲ ቃለ-መሓላ መራሕቲ ሃገራት ኣፍሪቃ ኣብ ዝተረኽብሉ ስነስርዓት ዝተፈጸመ ኰይኑ፡ ኣብዚ ሕጂ እዋን ዋጋ ነሓስ ብምውሳኹ ሰብ ሃብቲ ኣብ ቍጠባ ዛምብያ ተስፋ ከም ዘለዎም ይግለጽ።

9. 1 መስከረም 2026ጀርመን ኣብ መዓርፎ ነፈርታ ዝተፈጸመ መጥቃዕቲ ድሮን ኢድ ሩስያ ኣለዎ ትብል

   

   ምንጪ ስእሊ, Getty Images

   ኣብ ዝሓለፈ ወርሒ ኣብ መዓርፎ ነፈርቲ ዝተኻየደ መጥቃዕቲ ድሮን ሩስያ ዝፈጸመቶ ምዃኑ ጀርመን ከሲሳ።

   ብ4 ነሓሰ ሓንቲ ነተጒቲ ዝጸዓነት ሰብ-ኣልቦ ነፋሪት ኣብ መዓርፎ ነፈርቲ ከተማ ላይፕዚግ/ሄል ኣብ ጥቓ ሓንቲ ዩክሬናዊት ናይ ጽዕነት ነፋሪት ከምዝጸንሐት ይፍለጥ።

   እታ ድሮን ብሰንኪ ዘጋጠማ ጸገማት ክትፍንጀር ከምዘይክኣለት ዝገለጹ ጀርመናውያን መርመርቲ፡ ካልኣይቲ ድሮን ግን ምስ ካልእ ናፊረት ከምዝተጋጨወት ተዛሪቦም። ሳልሰይቲ ድሮን'ውን ድሕሪ 10 መዓልታት ኣብ ጥቓ እቲ መዓርፎ ነፈርቲ ተረኺባ ነይራ።

   ሚኒስተር ጉዳያት ወጻኢ ጀርመን ጆሃን ቫደፉል ንጋዜጠኛታት ኣብ ዝሃቦ መብርሂ፡ ኣብ ቦን ዝርከብ ቤት ጽሕፈት ቆንስል ሩስያ ከምዝዓጽዎ ኣፍሊጡ።

   ኣፈኛ ጉዳያት ወጻኢ ሩስያ ማሪያ ዛካሮቫ ብወገና "በርሊን ንሽበራ ትድግፍ ኣላ" ክትብል ብምኽሳስ ሞስኮ ተመሳሳሊ ስጉምቲ ከምእትወስድ ኣጠንቂቓ።

10. 1 መስከረም 2026ዛምቢያ፡ ፕረዚደንት ሂቺለማ ቃለማሕላ ፈጺሙ

    

    ምንጪ ስእሊ, Reuters

    ፕረዚደንት ዛምቢያ ሃካይንደ ሂቺለማ ካልኣይ እብረ ስልጣን ንምፍላም ኣብ ርእሰከተማ ሉሳካ ቃለማሕላ ፈጺሙ።

    ሂቺለማ፡ ኣብ ዝሓለፈ 13 ነሓሰ ኣብ ዝተኻየደ ኣካታዒ ምርጫ 60% ብምርካብ'ዩ ስልጣኑ ኣጽኒዑ ዘሎ።

    እቲ 38% ረኺቡ ዝተባህለ ቀንዲ መቐናቕንቱ ዝነበረ መራሒ ተቓዋሚ ሰልፊ ብራያን ሙንዱቢለ ድሕሪ'ቲ መረጻ ብክድዓት ሃገር ተኸሲሱ ኣብ ቀይዲ ኣትዩ ይርከብ።

    ወዲ 64 ዓመት ፕረደዚንት ቺለማ ናብ ስልጣን ካብ ዝመጽእ ንደሓር "ዓንዩ ጸኒሑና" ዝበሎ ቊጠባ እታ ሃገር ከመሓይሽ ብምኽኣሉ ይንኣድ እዩ።

    ሕብረት ኣውሮጳ ዝርከቦም ተዓዘብቲ ናይቲ ምርጫ ዋላ'ኳ ብሰላም ዝተወድአ እንተነበረ፡ ኣብ ምቚጻር ድምጺ ጸገማት ከምዝነበሮ'ዮም ገሊጾም።

    እታ ልዕሊ 22 ሚልዮን ህዝቢ ዘለዋ ደቡብ ኣፍሪቃዊት ሃገር፡ ኣብ ጥቅምቲ 1964 ናጽነታ ካብ ብሪጣንያ ካብ እትረክብ ንድሓር ሸውዓተ መራሕቲ ከምዝሸመት ይፍለጥ። ብፍላይ ድሕሪ'ቲ ካብ 1964 ክሳብ 1991 ዝመርሓ ኬነት ካውንዳ ሃገራዊ መረጻታት ብምክያድ መራሕታ ክትቀያይር ጸኒሓ እያ።

11. 1 መስከረም 2026እስራኤል ሓደ ላዕለዋይ መራሒ ሓማስ ከምዝማረኸት ገሊጻ

    

    ምንጪ ስእሊ, AFP via Getty Images

    እስራኤል ሓደ ካብ ላዕለዎት መራሕቲ ሓማስ ከምዝማረኸት ሚኒስተር ምክልኻል እታ ሃገር ሓቢሩ።

    እስራኤል ካትዝ ከምዝበሎ፡ ፍሉይ ኣሃዱ ሰራዊት እስራኤልን ብእስራኤል ዝድገፉ ሚሊሻ ቓዛን ኣብ ዘካየድዎ ስርሒት'ዩ እቲ መንነቱ ዘይተገልጸ ወተሃደራዊ ኣዛዚ ናይቲ ጉጅለ ተታሒዙ።

    ኣብቲ እዋን ኣብ ዝተፈጸመ መጥቃዕቲ ኣየር ክልተ ቆልዑን ሓንቲ ጓልኣንስተይቲን ከምዝሞቱ ሰብሞያ ጥዕና እታ ወሽመጥ ገሊጾም። ሳልሳይ ቆልዓ'ውን ካብቲ ከባቢ ወጻኢ ኣብ ዝርከብ ማእከል ቓዛ ተቐቲሉ ኣሎ።

    "ኣቐድም ኣቢሉ፡ ላዕለዋይ ኣሸባሪ ሓማስ ተኣሲሩ ኣሎ- ፖሊሲና እዚ'ዩ፡ ስግኣታት ኣይንጽበን ኢና፡ ግና ንኣሸበርቲ ሓማስ ክንሃድኖም ኢና፡ ንትሕተቅርጺ ሽበራታቶም'ውን ከነፍሽሎን ከነዕንዎን ኢና" ክብል'ዩ እቲ ሚኒስተር ኣጠንቂቑ።

12. 31 ነሓሰ 2026ኢራን፡ ነቲ ብኣመሪካ ዝተነብረላ ሓድሽ ቍጠባዊ እገዳ "ፕሮፓጋንዳ" ክትብል ነጺጋቶ

    

    ምንጪ ስእሊ, Reuters

    ዋሽንግተን ንቴህራን ብዝያዳ ንምንጻልን ንመሻርኽታ ንምጥቃዕን ዝዓለመ ሓድሽ ናይ እገዳ ዘመተ ካብ 24 ነሓሰ ጀሚራ ድሕሪ ምእዋጃ፡ ኢራን ዳግማይ ሓያል ቍጠባዊ ጸቕጥታት የጋጥማ ኣሎ።

    ምኽትል ምኒስተር ጉዳያት ወጻኢ ኢራን ካዘም ጋሪባባዲ፡ ነቲ ብወገን ኣመሪካ ዝቐረበ ክስታት ከም "ፕሮፓጋንዳዊ" መታለሊ ገሊጽዎ።

    ሰበ-ስልጣን ኢራንን መርበባት ዜና እታ ሃገርን፡ እዚ ስጕምቲ እዚ ኣመሪካ ኣብቲ ዝካየድ ዘሎ ግጭት ንዘጋጠማ ወተሃደራዊ ውድቀት ንምሽፋን ዝተገብረ ቀጻሊ ጻዕሪ’ዩ ክብሉ የቃልሕዎ ኣለዉ።

    ብዘይካ’ዚ፡ ኣመሪካ ነቲ ንሰደድ ነዳዲ ኢራን ንምዕጋት ዝዓለመ ባሕራዊ ከበባ ትቕጽሎ ኣላ።

    ማእከላይ እዚ ሰራዊት ኣመሪካ ብቐዳም ኣብ ዘውጽኦ መግለጺ፡ ከም ኣካል እቲ ዕጽዋ ንሰለስተ መራክብ ካብ ኣገልግሎት ወጻኢ ከም ዝገበረን፡ ንኽልተ መራኽብ ብምቍጽጻር ንኻልኦት 82 ድማ ኣንፈተን ከም ዘቐየረን ሓቢሩ።

    እቲ ኣብ መንጎ ኣመሪካ፡ እስራኤልን ኢራንን ብ28 ለካቲት ዝጀመረ ኵናት፡ ሕጂ መበል ሽዱሽተ ወርሑ ኣቑጺሩ ኣሎ። እዚ ግጭት`ዚ ነቲ ስትራተጅያዊ ኣገዳስነት ዘለዎ መጻብቦ ሆርሙዝ ንመጓዓዝያ መራኽብ ዕጽው ኰይኑ ከም ዝጸንሕ ገይሩዎ ኣሎ።

13. 31 ነሓሰ 2026ዩክረይን፡ ትምህርቲ ክጅምር ሓደ ሰሙን ኣብ ዝተረፎ ሩስያ ብዘውረደቶ መጥቃዕቲ 12 ሚልዮን መጻሕፍቲ ዓንዩ

    

    ዩክረይን ሓድሽ ዓመተ ትምህርቲ ንምጅማር ኣብ ትዳለወሉ ዘላ እዋን፡ ሩስያ ኣብ ልዕሊ ኣብያተ-ሕትመትን መኽዘናትን ብዘውረደቶ ደብዳብ ሚሳይል፡ 12 ሚልዮን ዝዀኑ መጻሕፍቲ ከም ዝዓነዉ ተገሊጹ።

    እዚ መጥቃዕቲ እዚ፡ ሓደ ሲሶ ካብቲ ኣብዛ ሃገር ኣብዚ ዓመት ዝተሓተመ መጻሕፍቲ ዘዕነወ ኰይኑ፡ ንመስርሕ ትምህርቲ እታ ሃገር ኣብ ከቢድ ስግኣት ኣውዲቕዎ ይርከብ።

    ሓደ ካብቶም ቀንዲ ግዳይ ዝዀኑ ትካላት ኣብ ወሰን ከተማ ኪቭ ዝርከብ ቤት-ማሕተም ኰይኑ፡ 1.3 ሚልዮን መጻሕፍቲ ትምህርቲ ንምዝርጋሕ ኣብ ምድላው ኣብ ዝነበረሉ እዋን’ዩ ብሚሳይል ተሃሪሙ።

    እዚ ድማ 10 ሚእታዊት ካብ ጠቕላላ ንተምሃሮ ዩክረይን ተባሂሉ ዝሕተም ዝነበረ መጻሕፍቲ ምዃኑ ተፈሊጡ ኣሎ።

    ምኒስትሪ ባህሊ ዩክረይን ከም ዝሓበሮ፡ እዚ ስጕምቲ እዚ ኣካል እቲ ንመንነትን ታሪኽን ዩክረይን ንምድምሳስ ዝዓለመ ስትራተጅያዊ ኵናት’ዩ።

    ክሳብ ሕጂ፡ ሩስያ ንልዕሊ 2,000 ባህላዊ ትካላትን 1,900 ታሪኻዊ ቅርሰታትን ከም ዘዕነወት ይግለጽ። ብዘይካ’ቲ ኣብ ኪቭ ዝዓነወ ሓደስቲ መጻሕፍቲ፡ ጥንታውያን ገዳማት፡ ቤተ-መዘክራትን ኣብያተ-መጻሕፍትን እውን ግዳይ ደብዳብ ድሮንን ሚሳይልን ኰይኖም ኣለዉ።

    ክረምሊን ብወገኑ፡ ኣብ ልዕሊ ስቪላዊ ሸቶታት ኰነ ኢሉ ዝፈጸሞ መጥቃዕቲ ከም ዘየሎ ብምግላጽ ነቲ ክሲ ይነጽጎ።

    ኣብ ዓዲ እንግሊዝ ዝርከብ ኤምባሲ ሩስያ ንቢቢሲ ኣብ ዝሃቦ መግለጺ፡ ዩክረይን ንባህላዊ ቦታታት ንወተሃደራዊ ንጥፈታት ትጥቀመሉ ኣላ ክብል ወቂሱ።

    ይዅን`ምበር፡ ኣብ መላእ ዩክረይን ዝካየድ ዘሎ ደብዳብ ኣብ ልዕሊ ህዝባዊ ትካላትን መንበሪ ኣባይትን ከቢድ ዕንወት የውርድ ምህላዉ ይፍለጥ።

14. 31 ነሓሰ 2026ኣማኢት ዜጋታት ካልኦት ሃገራት ክሳብ ሕጂ ደሃዮም ኣይተፈልጠን

    ካብ መላእ ዓለም ዝመጹ በጻሕቲ ንኣኽራናታን ቅዱሳት ቦታታትን ኔፓል ንምብጻሕ ይኸዱ እዮም።

    ጸብጻባት ናይቶም ዝጠፍኡ ሰባት እዞም ዝስዕቡ የጠቓልል፤

    ህንዲ - ብውሕዱ 320 ህንዳውያን ዜጋታት ደሃዮም ጠፊኡ ከምዘሎ ምኒስትሪ ጉዳያት ወጻኢ እታ ሃገር ካብ ደልሂ ሓቢሩ።

    ቻይና - ምኒስትሪ ጉዳያት ወጻኢ ቻይና ኣብ ኔፓል ኣስታት 100 ቻይናውያን ዜጋታት ደሃዮም ከም ዝጠፍአ ገሊጹ።

    ኣሜሪካ - 90 ኣሜሪካውያን ክሳብ ሕጂ ደሃዮም ከምዘይጠፈልጥ ምኒስትሪ ጉዳያት ወጻኢ ኣሜሪካ ኣመልኪቱ።

    ዩክረይን - 62 ዜጋታት ዩክረይን ደሃዮም ጠፊኦም ክብል ፖሊስ ኔፓል ሓቢሩ።

    ማሌዥያ - 51 ማሌዥያውያን በቲ ውሕጅ ተወሲዶም ክዀኑ ከምዝኽሉ ሰበስልጣን ገሊጾም።

    ኣውስትራልያ - 41 ኣውስትራሊያውያን ደሃዮም ከምዘለየለ ተሓጋጋዚ ምኒስተር ኢሚግሬሽን እታ ሃገር ገሊጹ።

    ዓባይ ብሪጣንያ - ፖሊስ ኔፓል 33 ዜጋታት ብሪጣንያ ደሃዮም ጠፊኦም ከምዘሎ ገሊጹ’ሎ። ቻይናዊ መንግስታዊ ፈነወ ሲሲቲቪ እውን 15 ዜጋታት ብሪጣንያ ካብቶም ኣብ ቲቤት ዝጠፍኡ ምዃኖም ጸብጺቡ - ካብዚኦም ክንደይ ኣብቲ ኔፓል ዝጸብጸበቶ ኣሃዝ ከምዝተኻተቱ ንጹር ኣይኰነን።

    ካናዳ - 30 ካናዳውያን ጠፊኦም ከምዘለዉ ምኒስትሪ ጉዳያት ወጻኢ እታ ሃገር ገሊጹ።

    ካብ ደቡብ ኮርያ፡ ደቡብ ኣፍሪቃ፡ ፖርቱጋል፡ ሆላንድን ኒውዚላንድን ዝመጹ ውሑዳት ገያሾ’ውን ካብቶም ዝጠፍኡ’ዮም።

    

    ምንጪ ስእሊ, Reuters

15. 31 ነሓሰ 2026ብስእሊ፡ ወተሃደራት ኣብ ስርሓት ህጹጽ ረዲአት

    ስድራቤታት ብሓደጋ ንዝጠፍኡወን ኣባላታት ብሓዘን ይዝክራ፤ ሰራሕተኛታት ህይወት ኣድሕን ነቲ ብረቡዕ ዝተኸስተ ሓደጋታት ስዒቡ ኣብ ጽዑቕ ስራሕ ተዋፊሮም ኣለዉ።

    እዋናዊ ኣሳእል፤

    

    ምንጪ ስእሊ, Reuters

    

    ምንጪ ስእሊ, Reuters

    

    ምንጪ ስእሊ, Reuters

    

    ምንጪ ስእሊ, Reuters

    

    ምንጪ ስእሊ, Reuters

16. 31 ነሓሰ 2026ኣብ ኔፓል ብውሕዱ 275 ህንዳውያን ደሃዮም ጠፊኦም ኣለዉ

    ኣብ ኔፓል ብውሕዱ 275 ህንዳውያን ዜጋታት ክሳብ ሕጂ ደሃዮም ጠፊኡ ከምዘሎ ምኒስትሪ ጉዳያት ወጻኢ ህንዲ ኣፍሊጡ። ካልኦት 128 መበቆል ህንዲ ዝኾኑ ሰባት እውን ደሃዮም ኣይተረኽበን ዘሎ።

    እቲ ምኒስትሪ፡ 403 ዜጋታት ህንዲ ካብ ቻይና ናብ ኔፓል ከም ዝሰገሩ፡ ካልኦት 500 ድማ ኣብ ቻይና ኣብ ውሑስ ኵነታት ከምዘለዉ ሓቢሩ። ብድምር ክሳብ ሕጂ 149 ሰባት ድሒኖም ኣለው።

    ህንዲ፡ ኣብ ኔፓል ንዝካየድ ስርሒታት ህይወት ኣድሕን እውን ደገፍ ኣሐይላ ኣላ። 19 ኣባላት ዝሓቘፈ ፍሉይ ፎረንሲክ ጕጅለ ኣብ ካትማንዱ ስራሕ ጀሚሩ፡ ኣብ ምልላይ ግዳያት ይሕግዝ ኣሎ።

    

    ምንጪ ስእሊ, RSS

17. 31 ነሓሰ 2026ብውሕጅ ኔፓል ቍጽሪ ዝጠፍኡ ሰባት ናብ 4,247 ክብ ኢሉ፡ 900 ድማ ሞይቶም ኣለው

    ኣብ ኔፓል ጻዕርታት ህይወት ኣድሕን ናብ ሻድሻይ መዓልቲ ኣብ ዝኣትወሉ ዘሎ እዋን፡ ቍጽሪ ናይቶም ዝጠፍኡ ሰባት ኣብ ኣዝዩ ወሲኹ።

    ቍጽሪ ናይቶም ዝጠፍኡ ሰባት 4,247 በጺሑ ከምዘሎ ሃገራዊ በዓል መዚ ምንካይን ምሕደራን ሓደጋታት እታ ሃገር ይሕብር።

    እቶም ጠፊኦም ዘለው ሰባት መን እዮም?

    • 3,655 ዜጋታት ኔፓል
    • 592 ወጻእተኛታት

    ገለ ካብኣቶም

    • 933 ሰራሕተኛታት ሓይሊ ኤሌክትሪክ
    • 102 ወተሃደራት ኔፓል፡ፖሊስን ጉምሩክን

    ኣብ ነፍሲ ወከፍ መዓልቲ ቍጽሪ ሬሳታት እናወሰኸ ይኸይድ ኣሎ። ኣብ ኔፓል ቍጽሪ ዝሞቱ ሰባት ዛጊት 903 በጺሑ ኣሎ።

    ኣብቲ ቤት ኣብዚ እዋን’ዚ ቍጽሪ ዝሞቱ 16 ከምዝዀነ መንግስታዊ ማዕከናት ዜና ቻይና ሓቢረን።

    

    ምንጪ ስእሊ, Reuters

18. 30 ነሓሰ 2026ኣይስላንድ፡ ውፅኢት ህዝበ-ውሳነ ንኣባልነት ሕብረት ኤውሮጳ ይነፅግ

    

    ምንጪ ስእሊ, Reuters

    ኣይስላንድ፡ ምስ ሕብረት ኤውሮጳ ዳግማይ ዝርርብ ንምጅማር ኣብ እትዳለወሉ እዋን፡ ህዝቢ ኣንጻር ኣባልነት ኣድሚፁ፤ ናይ ሓደ ጣብያ መረፃ ጥራይ ዘይተቘፀር ተሪፉ።

    ክሳብ ሕጂ ካብ ዝተቖጽሩ 188,496 ድምጽታት፡ 52.5 ሚኢታዊት ንእማመ’ቲ መንግስቲ ክነጽግ እንከሎ፡ 47.5 ሚኢታዊት ድማ ናይ ምፅምባር ድሌት ኣንፀባሪቝ።

    ቀዳማይቲ ሚኒስተር ክሪስትሩን ፍሮስታዶቲር እትመርሖ መንግስቲ፡ ክሳብ 2027 ህዝበ-ውሳነ ከካይድ ምዃኑ ቃል ኣትዩ'ኳ እንተነበረ፡ ፕረዚደንት ኣመሪካ ዶናልድ ትራምፕ ኣብ ልዕሊ ግሪንላንድ ዘስመዖ ናይ ምጥቕላል ምፍርራሕ ሓዊሱ፡ ዓለማዊ ወጥሪ፡ ንቕድሚት ከምፀኦ ኣገዲዱዎ።

    ይኹን እምበር፡ ኣብዛ ኣስታት 400 ሽሕ ህዝቢ ዝነብረላ ደሴታዊት ሃገር፡ እቲ ጉዳይ፡ ንጸጥታዊ ስክፍታታት ዘይኰነስ፡ ኣብ ኢንዱስትሪ ምግፋፍ ዓሳኣ ዘተኰረ እዩ ነይሩ።

    ድሮ ኣካል ናይቲ ሓደ ዕዳጋ ሕብረት ኤውሮጳን ነፃ-ቪዛ ሸንገንን ዝኾነት ኣይስላንድ፡ ሙሉእ ኣባልነት ሕብረት ኤውሮጳ ሓደ ዓይነት ጉምሩክን ዩሮን ክትጥቀም ከኽእላ ይኽእል እዩ።

19. 30 ነሓሰ 2026ኔፓል-ቲቤት፡ ፃዕርታት ህይወት ምድሓን ምስ ፅንኩር ኩነታት ኣየር ይቕፅል, ኣስታት 3 ሽሕ ሰባት ደሃዮም ኣይተረኽበን

    

    ምንጪ ስእሊ, Getty Images

    ሰበስልጣን ኔፓል፡ እቲ ብረቡዕ ዘጋጠመ ውሕጅ ስዒቡ፡ ዛጊድ 734 ሰባት ከምዝሞቱ ኣረጋጊፆም። ብህይወት ዝተረኽበ ውፃእ መዓት የለን።

    መንግስታዊ ማዕከናት ዜና ቻይና፡ ብወገን ቲቤት ብዝሒ ዝሞቱ ናብ 16 ከምዝዓበየ ይሕብራ።

    ቻይና ሓበሬታ ብጥብቂ ስለእትቈፃፀር፡ ብወገን ቲቤት ክብደት ናይቲ ሓደጋ ንምግምጋም ኣፀጋሚ ገይሩዎ ከምዘሎ ይግለፅ።

    

    ምንጪ ስእሊ, Getty Images

    ብወገን ኔፓል ልዕሊ 2,400 ሰባት ዛጊድ ደሃዮም ኣይተፈልጠን፡ ቻይና ድማ 261 ወጻእተኛታት ዜጋታት ዝርከብዎም 546 ሰባት ደሃዮም ከምዘይተረኽበ ኣፍሊጣ ኣላ።

    ናብቲ ከባቢ ሓገዝ ክኣቱ ጀሚሩኳ'ኳ እንተነበረ፡ ሕማቕ ኣቀማምጣ መሬትን ዘየቋርፅ ዝናብን ግን ምብጻሕ ኣዝዩ ኣጸጋሚ ይገብሮ ከምዘሎ ውድብ ሕቡራት ሃገራት ሓቢሩ።

    ኣብ ኔፓል፡ ቀትርን ለይትን ዝሰርሑ ዘለዉ ሰራሕተኛታት ረድኤት፡ ኣብቶም ብውሕጅ ዝተሃስዩ ከባቢታት፡ ኣብ ታንከራትን ሃይድሮኤሌክትሪክን ተዓጽዮም ንዝርከቡ ሰራሕተኛታት ንምብፃሕ፡ ምስ ፅንኩር ኩነታት ኣየር ይቃለሱ ኣለዉ።

    

    ምንጪ ስእሊ, Reuters

20. 28 ነሓሰ 2026ፍሉጥ ኣፍሪቃዊ ሙዚቀኛ ናይ ደቡብ ኣፍሪቃ ዑደቱ ሰሪዙዎ

    

    ምንጪ ስእሊ, Andalou Agency via Getty Images

    ፍሉጥ ኣፍሪቃዊ ሙዚቀኛ ሳሊፍ ከይታ ብሰንኪ ኣንጻር ስደተኛታት ዝግበር መጥቃዕትታትን ጐስጓሳትን ናብ ደቡብ ኣፍሪቃ ክገብሮ ዝሓሰበ መደብ ከምዝሰረዘ ኣፍሊጡ።

    ከይታ ኣብ ኣውራጃ ፍሪ ስቴት ከካይዶ መዲብዎ ዝነበረ ምርኢት ምስራዙ ከምዘጉሃዮም ሰብመዚ እቲ ዞባ ገሊጾም ኣለዉ።

    እቲ ወዲ 77 ዓመት ድምጻዊ፡ ብዛዕባ'ቲ ጉዳይ ኣብ ዝሃቦ መብርሂ "ኣንጻር ኣፍሪቃውያን ኣሕዋትናን ኣሓትናን ዝግበር ጽልኢ ንዝገልጽ ጸብጻባት ዕሽሽ ከምዘይብሎ" ኣነጺሩ።

    "ስደተኛታት ክጥቅዑ ክርኢ እንከለኹ፡ 'ፖለቲካ' ኣይራኣየኒን እዩ። ስራሕ፡ ውሕስነትን ክብረትን ዝደለዩ ሰባት'ዮም ዝራኣዩኒ" ይብል እቲ "ወርቃዊ ድምጺ ኣፍሪቃ" ተባሂሉ ዝፍለጥ ስነጥበባዊ ስለምንታይ ነቲ ስጉምቲ ከምዝወሰደ ኣብሪሁ።

    ኣብ ደቡብ ኣፍሪቃ ኣንጻር ኣፍሪቃውያን ስደተኛታት ዘነጻጸረ መጥቃዕትታትን ጽልእን ንብዙሕ ዓመታት ክቕጽል ዝጸንሐ'ኳ እንተኾነ፡ ኣብዚ ቀረባ እዋን ውዱብ ተቓውሞታትን ጐስጓሳትን ክካየድ ምጽንሑ ግን ንማሕበረሰባት ስደተኛታት ዓቢ ስግኣት ኮይኑ ይርከብ።

    ገለ ሃገራት ኣፍሪቃ'ውን ዜጋታተን ካብ ደቡብ ኣፍሪቃ ከውጽኣ ምጽንሐን ይዝከር።