වෑන්ස්ගේ ස්විට්සර්ලන්ත සංචාරය අවලංගු වීමත් සමග ඇමරිකා එක්සත් ජනපද-ඉරාන සාකච්ඡා කල් දැමෙයි

ඉරාන නියෝජිතයින් සමග සාකච්ඡා සඳහා ඇමරිකා එක්සත් ජනපදයේ උප ජනාධිපති ජේ. ඩී. වෑන්ස් අද දින [ජූනි 19] ස්විට්සර්ලන්තයට නොයන බව ධවල මන්දිරය තහවුරු කර ඇත.

ධවල මන්දිර ප්‍රකාශකයෙකු බ්‍රහස්පතින්දා සවස [ජූනි 18] වාර්තාකරුවන්ට පැවසුවේ උප ජනාධිපති ජේ.ඩී. වෑන්ස් සිය ප්‍රවෘත්ති සාකච්ඡාවේදී පැවසූ පරිදි තාක්ෂණික සාකච්ඡා තවමත් අවසන් වී නොමැති බවයි. එක්සත් ජනපද දූත පිරිස ඕනෑ ම වේලාවක පිටත්ව යාමට සූදානම් නමුත් සාකච්ඡාවේ මෙහෙයුම් සහ සැපයුම් කටයුතු පිළිබඳ තවමත් අවසන් තීරණයක් ගෙන නොමැති බවයි. එහි ප්‍රතිඵලයක් ලෙස උප ජනාධිපතිවරයා සිකුරාදා [ජූනි 19] ස්විට්සර්ලන්තයට නොයනු ඇති බව ද කියා සිටියේය.

බ්‍රහස්පතින්දා උදෑසන, එක්සත් ජනපද උප ජනාධිපතිවරයා වාර්තාකරුවන්ට පැවසුවේ තමා ස්විට්සර්ලන්තයට යාමට සූදානම් බව යි. කෙසේ වෙතත්, සංචාරය පිළිබඳ නිශ්චිත තොරතුරු තවමත් නොදන්නා බැවින්, සංචාරය සෙනසුරාදා හෝ ඉරිදා සිදුවිය හැකි බවත් ඔහු පැවසීය.

බ්‍රහස්පතින්දා අලුයම එක්සත් ජනපද සහ ඉරාන ජනාධිපතිවරුන් අවබෝධතා ගිවිසුමට අත්සන් කිරීමෙන් පසු, වැදගත්ම ප්‍රශ්නය වූයේ අද ස්විට්සර්ලන්තයේ කුමක් සිදුවේද යන්න ය.

අවබෝධතා ගිවිසුමට නිල වශයෙන් අත්සන් තැබීමේ උත්සවයක් අපේක්ෂාවෙන් ස්විට්සර්ලන්තයට පැමිණ සිටින පාකිස්ථානය ඇතුළු අනෙකුත් රටවල මාධ්‍යවේදීන් විසින් ද මෙම ප්‍රශ්නය අසනු ලැබේ.

අවබෝධතා ගිවිසුමට නිල වශයෙන් අත්සන් තැබීමේ උත්සවයක් අපේක්ෂාවෙන් ස්විට්සර්ලන්තයට පැමිණ සිටින පකිස්ථානය ඇතුළු අනෙකුත් රටවල මාධ්‍යවේදීන් විසින් ද මෙම ප්‍රශ්නය අසනු ලැබේ.

බීබීසී උර්දු සේවයේ වාර්තාකරුවන් වන ඕමාර් දරාස් නන්ජියානා සහ කාලිද් කරමාත් ද ස්විට්සර්ලන්තයට ගොස් සිටිති.

ස්විට්සර්ලන්තයේ සිටින පකිස්ථාන රාජ්‍ය තාන්ත්‍රික මූලාශ්‍රයක් බීබීසී කණ්ඩායමට පැවසුවේ ජූනි 19 වන දින කිසිදු නිල උත්සවයක් නොපැවැත්වෙන බව පකිස්ථාන ජ්‍යෙෂ්ඨ නිලධාරීන් තමන්ට දන්වා ඇති බව යි. පකිස්ථාන රාජ්‍ය තාන්ත්‍රික කාර්ය මණ්ඩලය දැන් "ආපසු යාමට සූදානම් වන බව" ද එම මූලාශ්‍රය පැවසීය.

තවත් ජ්‍යෙෂ්ඨ පකිස්ථාන රාජ්‍ය තාන්ත්‍රික මූලාශ්‍රයක් පැවසුවේ මෙම උත්සවය පවත්වන බවට පකිස්ථානයට අවබෝධයක් තිබූ බවයි. මැදිහත්කරුවන් ලෙස කටයුතු කරන පකිස්ථානය, එක්සත් ජනපදය සහ ඉරානය අතර අවබෝධතා ගිවිසුමට නිල වශයෙන් අත්සන් තැබීම බර්ගන්ස්ටොක්හිදී පැවැත්වීමට නියමිත බව එම මූලාශ්‍රය පැවසීය. මේ හේතුව නිසා පකිස්ථානය උත්සවය සඳහා පුළුල් ලෙස කටයුතු සූදානම් කර තිබූ බව ද ඔහු පැවසීය.

ස්විට්සර්ලන්තයේ සිටින බීබීසී උර්දු සේවයේ කණ්ඩායමට අනුව, පකිස්ථානයේ සහ තවත් බොහෝ රටවල මාධ්‍යවේදීන් උත්සවය ආවරණය කිරීම සඳහා එහි ගොස් තිබිණි. කෙසේ වෙතත්, ඔවුන්ගෙන් බොහෝ දෙනෙකුට උත්සවය නොපැවැත්වීමට ඉඩ ඇති බව දැනුම් දී ඇත්තේ ඔවුන් එරටට පැමිණීමෙන් පසුව ය.

ස්විට්සර්ලන්ත බලධාරීන් මෙම උත්සවය සඳහා කටයුතු සූදානම් කර ඇති බවත්, මාධ්‍ය සඳහා ද පහසුකම් සූදානම් කර ඇති බවත් ඔවුහු පැවසූහ.

එක්සත් ජනපදය සහ ඉරානය අතර තාක්ෂණික සාකච්ඡා අද ආරම්භ කිරීමට හැකි වේ ද යන්න මේ අවස්ථාව වන විට පැහැදිලි නැත.

කෙසේ වෙතත්, අනෙක් පසින් ස්විට්සර්ලන්ත විදේශ අමාත්‍යාංශය බ්‍රහස්පතින්දා [ජූනි 18] රාත්‍රියේ පැවසුවේ එක්සත් ජනපදයේ සහ ඉරානයේ නියෝජිතයින් ජුනි 19 වන දින ස්විට්සර්ලන්තයේදී මූලික සාකච්ඡා සඳහා හමුවනු ඇති බව යි.

"එක්සත් ජනපදය සහ ඉරානය හා මැදිහත් වන රටවල් වන පාකිස්ථානය සහ කටාර් සහ අනෙකුත් රටවල් සමග එක්ව, ගිවිසුම ක්‍රියාත්මක කිරීම පිළිබඳ මූලික සාකච්ඡා සඳහා හෙට බර්ගන්ස්ටොක්හිදී හමුවීම වර්තමාන සැලැස්මයි. මෙම රැස්වීමේ න්‍යාය පත්‍රය සහ විස්තර පිළිබඳව මේ අවස්ථාවේ වැඩිදුර තොරතුරු ලබා දිය නොහැක," යනුවෙන් ඔවුන්ගේ ප්‍රකාශයේ සඳහන් විය.

නිල වශයෙන් අත්සන් කිරීමේ උත්සවය අවලංගු කිරීම

අවබෝධතා ගිවිසුමට අත්සන් තැබීමේ නිල උත්සවය ස්විට්සර්ලන්තයේදී පැවැත්වෙන බවත් පකිස්ථානය උත්සවයේ සත්කාරකයා වනු ඇති බවත් පකිස්ථාන අගමැති ෂෙබාස් ෂරීෆ් මැයි 15 වන දින ජාතික සභාව අමතමින් කියා සිටියේ ය.

ඉන්පසු දිනයේ, ජනාධිපති ට්‍රම්ප් ද පැවසුවේ එක්සත් ජනපදය වෙනුවෙන් ස්විට්සර්ලන්තයේ පැවැත්වෙන නිල වශයෙන් අත්සන් කිරීමේ උත්සවයට උප ජනාධිපති ජේ.ඩී. වෑන්ස් සහභාගී වන බව යි. ඉරාන පාර්ලිමේන්තුවේ කථානායක මොහොමඩ් බගර් ගලීබාෆ් ද උත්සවයට සහභාගී වන බව ඉරානය පැවසීය.

කෙසේ වෙතත්, බදාදා අලුයම 3ට පමණ, ජනාධිපති ට්‍රම්ප් අවබෝධතා ගිවිසුමට ඊ-අත්සනක් තැබූ බව ධවල මන්දිරය නිවේදනය කළේ ය. ප්‍රංශ ජනාධිපතිවරයා ඉදිරියේ ප්‍රංශයේ වර්සයිල්ස් මාලිගාවේදී අත්සන් කිරීම සිදු වූ බවත්, අත්සන් කිරීමේ වීඩියෝවක් ද නිකුත් කළ බවත් එහි සඳහන් විය. පසුව, ජනාධිපති මසූඩ් පෙසෙෂ්කියන් ගිවිසුමට අත්සන් කළ බව ඉරානය ද තහවුරු කළේ ය.

මෙම පුවත පළවීමෙන් ටික වේලාවකට පසු, පාකිස්ථාන අගමැති ෂෙබාස් ෂරීෆ් 'X'හි සටහනක් තබමින් දෙපාර්ශවයන්ට සුබ පැතූ අතර, 'සම-මැදිහත්කරු වන කටාර් රාජ්‍යයේ සහාය ඇතිව, පකිස්ථානය 2026 ජුනි 19 වන දින ස්විට්සර්ලන්තයේදී මෙම වැදගත් සන්ධිස්ථානය සැමරීමට සහ ඒ සමග ම තාක්ෂණික මට්ටමේ සාකච්ඡා ආරම්භ කිරීමට නියමිත නිල උත්සවයක් පවත්වනු ඇත,' යනුවෙන් සඳහන් කළේ ය.

කෙසේ වෙතත්, ටික වේලාවකට පසු ඔහුගේ ගිණුමෙන් එම සටහන මකා දමන ලද අතර, ජුනි 19 පිළිබඳ සඳහන යාවත්කාලීන කළ සටහනේ ඉවත් කර තිබිණි.

මෙම අවස්ථාවට සහභාගී වීම සඳහා ෂාබාස් ෂරීෆ් බ්‍රහස්පතින්දා [ජූනි 18] ස්විට්සර්ලන්තය බලා පිටත්ව යාමට නියමිතව සිටි නමුත් පසුව එම සංචාරය කල් දමන බව නිවේදනය කරන ලදී.

බීබීසී උර්දු සේවයේ රෝහන් අහමඩ් සමග අදහස් දක්වමින් පකිස්ථාන නියෝජ්‍ය අගමැති සහ විදේශ අමාත්‍ය ඉෂාක් දාර්, සංචාරය කල් දැමීම තහවුරු කළ අතර, එක්සත් ජනපද සහ ඉරාන ජනාධිපතිවරුන් ඉලෙක්ට්‍රොනික ලෙස ලේඛනයට අත්සන් කර, ෂෙබාස් ෂරීෆ් මැදිහත්කරුවෙකු ලෙස එය ස්ථිර කිරීමෙන් පසුව උත්සවය අවලංගු කළ බව පැවසීය.

අනෙක් පසින්, බ්‍රහස්පතින්දා රාත්‍රියේ [ජූනි 18] පණිවිඩයක් නිකුත් කරමින් ඉරානයේ උත්තරීතර නායක මොජ්තාබා කමේනි, ඉරාන බලධාරීන්ට එක්සත් ජනපදය සමඟ සෘජු සාකච්ඡා පැවැත්වීමට අවසර දුන් නමුත්, "ඉදිරි සෘජු සාකච්ඡාවල අරමුණ සතුරාගේ ස්ථාවරය පිළිගැනීම නොවන" බව පැවසීය.