Spòrs

Coinnichidh an dà sgioba a bha sa chuairt dheireannaich de Chupa Valerie Fhriseil an-uiridh san iar-chuairt dheireannaich am-bliadhna.

Rinn Bàideanach an gnothach 2-0 air Loch Abar sa gheama mhòr an-uiridh gus an cupa a thogail.

Ged a tha Bàideanach air a bhith a' dol nas fheàrr air an t-seusan seo, rinn na h-Abraich a' chùis orra 3-0 an t-seachdain sa chaidh.

• Cupa Valerie Fhriseil air ais am Bàideanach

San iar-chuairt dheireannaich eile bidh GMA an aghaidh Cheann Loch Seile no Camanachd an Eilein Sgitheanaich.

Chaidh an geama eadar nàbaidhean a' Chosta an Iar a chur dheth aig an deireadh-sheachdain.

Tha an taghadh agus dà thaghadh eile a rinneadh Diluain mar a leanas:

Cupa Valerie Fhriseil - geamaichean air an 26mh den Iuchar

• Bàideanach - Loch Abar

• GMA - Ceann Loch Seile/An t-Eilean Sgitheanach

An Cupa Dùbhlan - geamaichean air an 26mh den Iuchar

• Srath Ghlais - Dùn Ad

• GMA - Obar Dhobhair

Cupa nan Sgiobaidhean Singilte - geamaichean air a' 5mh den Iuchar

• Dùn Ad - Srath Spè/Tatha is For

• Lòbhat - Gleann Urachadain

Chaidh na Hearadh, an Taobh Siar agus an Rubha air adhart dhan iar-chuairt dheireannaich de Chupa Eilean an Fhraoich agus tadhail gu leòr anns na geamaichean oidhche Luain.

Bha na Hearaich ann an suidheachadh gu math doirbh às dèidh dhaibh call 4-1 ri sgioba nan Loch sa chiad gheama bho chionn cola-deug.

Abair gun do thionndaich iad cùisean mun cuairt ann an stoidhle air an Tairbeart ge-tà - is iad a' pronnadh nan nàbaidhean Leòdhasach aca 7-1.

'S iad Seumas MacEanraig (2), Yahya Mohammed (2), Morgan MacLeòid (2) is Anndra Moireasdan le breab-peanais a bha air an targaid dha na Hearaich is iad troimhe 8-5 thairis air an dà gheama.

Bha geama iongantach ann eadar an Taobh Siar is Càrlabhagh bho chionn cola-deug is na Siaraich air thoiseach 5-1 faisg air an deireadh, mus d' fhuair Càrlabhagh trì tadhail air ais gus dòchas a thoirt dhaibh fhèin 'son an dàrna geama.

Chaidh an dòchas sin a dhubhadh às ann am Barbhas oidhche Luain.

Chuir Luke MacAoidh an Taobh Siar 1-0 suas sa chiad leth agus san dàrna leth thàinig barrachd thadhal bho Scott 'Tiger' MacArtair (3), Ali 'Barbhas' MacLeòid, is AJ Moireasdan.

6-0 dha na Siaraich air a' cheann thall agus 11-4 thairis air an dà gheama.

Bha Nis 1-0 air thoiseach air an Rubha a' dol a-steach dhan gheama ann an Garrabost ach bha na Deargaich ro mhath dhaibh - tadhail bho Josh Mac a' Ghobhainn, Darren Wilson, Aonghas Dòmhnallach agus Ethan MacAdam gun cur troimhe 4-1 thairis air an dà gheama.

Bha am Bac mar-tha air a dhol dìreach dhan iar-chuairt dheireannaich.

Tha iar-chuairt dheireannach mar a leanas:

• Na Hearadh - An Rubha

• An Taobh Siar - Am Bac

Bidh na geamaichean ann air an 13mh is an 20mh den Iuchar.

Ghluais Baile Ùr an t-Slèibh is Ceann a' Ghiùthsaich nas fhaide air thoiseach aig mullach Prìomh Lìog nam fear às dèidh dhaibh soirbheachadh air an deireadh-sheachdain.

Bha e teann dhan Bhaile Ùr is iad a' buannachadh 2-1 sa Ghearasdan.

Aig an dearbh àm bha Ceann a' Ghiùthsaich a' toirt pronnadh 7-0 air Camanachd an Òbain - na tadhail uile sa chiad leth.

Bidh sùil a-nise air a' gheama mhòr eadar nàimhdean Bhàideanach ann an cuairt dheireannach Chupa MhicThàmhais Disathairne seo tighinn.

Thàinig an naidheachd mhòr eile air an deireadh-sheachdain ann an Còmhghall far an do bhuannaich Caol-Gleann sa Phrìomh Lìog 'son a' chiad uair.

'S e 4-2 a bh' ann dhaibh an aghaidh Loch Abair is dòchas às ùr aig sgioba Ghleann Da-Ruail gun urrainn dhaibh fuireach an àirde am-bliadhna.

San dà gheama eile sa Phrìomh Lìog rinn tadhal anns na diogan mu dheireadh an gnothach do Cheann Loch Seile an aghaidh nan Sgitheanach ann am Port Rìgh 2-1, agus 's e an dearbh rud is an dearbh sgòr a bh' ann do Chabar Fèidh ann an Taigh na Bruaich an aghaidh Chaoil Bhòid.

Ann an iomain nam ban chaidh an geama mòr ann an Cupa Valerie Fhriseil eadar Ceann Loch Seile is An t-Eilean Sgitheanach a chur dheth air sgàth na sìde.

Chaidh Bàideanach air adhart 12-0 an aghaidh Inbhir Nis ge-tà is 's e 5-0 a bh' ann do GMA an aghaidh Ghleann Urchadain.

Bha Loch Abar mar-tha air a dhol troimhe dìreach gun geama a chluich.

Shoirbhich gu mòr a-rithist le Cuach na Cloinne is an fharpais air a bhith a' comharrachadh gu bheil 20 bliadhna bho thòisich i.

Air a' cheann thall 's iad Bun-sgoil Ghàidhlig Inbhir Nis a shoirbhich air breaban-peanais sa chuairt dheireannaich Diciadain.

Thog Barraigh na ciad phuingean aca den t-seusan oidhche Mhàirt nuair a rinn iad a' chùis air Beinn na Faoghla 5-1.

Thàinig tadhail Bharraigh bho Ally MacAonghais (2), Ally Caimbeul, James Davidson is Sean MacNèill is Sean Caimbeul air an targaid do Bheinn na Faoghla.

Tha seo a' fàgail gur e Èirisgeigh a-mhàin san lìog nach eil air puingean a leigeil seachad.

Air tìr-mòr chaidh an Gearasdan air adhart dhan iar-chuairt dheireannaich de Chupa Rois oidhche Mhàirt nuair rinn an gnothach 3-0 air Caol Àcainn.

'S iad Ryan Jamieson is Gordy Jamieson (2) a fhuair tadhail a' Ghearasdain.

Tùs an deilbh, Island Footie

Shoirbhich leis a' Bhac is Càrlabhagh ann an geamaichean mòra an aghaidh nan nàbaidean aca ann an Lìog Leòdhais is na Hearadh oidhche Luain.

Chuir Connor MacAoidh am Bac 1-0 air thoiseach an aghaidh an Rubha aig Garrabost agus sin mar a dh'fhuirich cùisean domhain a-steach dhan dàrna leth.

Fhreagair na Rubhaich le 20 mionaid air fhàgail is tadhal aig Josh Mac a' Ghobhainn bhon spot.

Thàinig an tadhal a bhuannaich an geama dhan Bhac le sia mionaidean air fhàgail is John 'Mashie' MacLeòid a' cur a' bhuill dhan lìon às dèidh bùrach sa bhocsa.

Tha am Bac a-nise dìreach dà phuing air cùl an Rubha aig mullach na lìge is iad air geama nas lugha a chluich.

Bha na tadhail a' frasadh a-steach ann am Barbhas far an do chuir an Taobh Siar fàilte air Càrlabhagh.

Thòisich Càrlabhagh gu làidir is iad air thoiseach às dèidh dìreach dà mhionaid le breab-peanais bho Robbie MacCoinnich.

Ged a chuir Ali 'Barbhas' MacLeòid an Taobh Siar co-ionnan, dh'fhàg dà thadhal bho Hamish Dòmhnallach Càrlabhagh 3-1 air thoiseach aig lethach-slighe.

Fhuair Luke MacAoidh tadhal air ais dha na Siaraich tràth san dàrna leth is le seachd mionaidean air fhàgail chuir an dearbh chluicheadair tadhal eile gus an geama fhàgail co-ionnan 3-3.

Bha ùine fhathast 'son tadhail eile ge-tà, agus 's e Kenny 'Dokus' Dòmhnallach a fhuair e dha Càrlabhagh is iadsan a' buannachadh 4-3.

Bha cùisean nas chofhurtaile sa gheama eile is Aths a' buannachadh 4-0 an aghaidh na Hearadh.

Tha Aths ann an suidheachadh làidir is iad air na trì geamaichean aca gu seo a bhuannachadh is gun tadhal a leigeil a-steach fhathast.

Air Taobh Siar na Gàidhealtachd tha aona gheama ann oidhche Mhàirt is Caol Àcainn a' dol an aghaidh a' Ghearasdain ann an Cupa Rois.

Agus tha geama mòr ann an Lìog Uibhist is Bharraigh is na Barraich gus fàilte a chur air Beinn na Faoghla.

Chaidh an aon sgioba bhon Lìog Nàiseanta a tha air fhàgail ann an Cupa na Camanachd a thaghadh sa chairteal chuairt-dheireannaich air falbh an aghaidh na sgioba a bhuannaich an cupa an-uiridh.

Chuir Gleann Urchadain Loch Abar a-mach às a' chupa air buillean-peanais Disathairne ach tha duais gu math doirbh aca le turas a-nise gu Baile Ùr an t-Slèibh.

Faisg air làimh aig an Dell cuiridh Ceann a' Ghiùthsaich - a bhuannaich ann an 2022, 2023 is 2024, fàilte air Ceann Loch Seile, a bhuannaich ann an 2021.

• Baile Ùr an t-Slèibh air Cupa na Camanachd a bhuannachadh

Tha geama doirbh aig na Sgitheanaich an aghaidh a' Ghearasdain ach bidh iad toilichte co-dhiù gu bheil iad aig an taigh.

Sa gheama eile nì Cabar Fèidh an rathad chun an Òbain 'son cluich an aghaidh na h-aon sgioba à deas a tha air fhàgail.

Tha an taghadh mar a leanas:

• Camanachd an Òbain - Cabar Fèidh

• Baile Ùr an t-Slèibh - Gleann Urchadain

• Camanachd an Eilein Sgitheanaich - An Gearasdan

• Ceann a' Ghiùthsaich - Ceann Loch Seile

Bidh na geamaichean ann Disathairne an 11mh den Iuchar.

Tùs an deilbh, Cupa Amaitearach na Gàidhealtachd

Chaidh an taghadh a dhèanamh airson nan cuairtean mu dheireadh de Chupa Amaitearach na Gàidhealtachd - ged nach eil mòran sgiobaidhean bhon Chosta an Iar a-nise air fhàgail ann.

Chaill an Taobh Siar 9-1 ri Lerwick Spurs agus 's e 5-1 a bh' ann do Whalsay an aghaidh United Steòrnabhaigh.

Rinn Wick Groats a' chùis air an Rubha 4-1 agus chaill Barraigh 3-0 ri Golspie Stafford.

Bha deagh naidheachd ann do dh'Aths, a rinn a' chùis air Whitedale air breaban-peanais às dèidh dhaibh crìochnachadh 1-1, agus do Mhalaig, a rinn an gnothach 3-1 air Culloden United.

Chaidh an geama eadar am Bac is Slèite agus an Srath a chur dheth leis nach do nochd bus a' Bhac.

Tha an taghadh 'son na h-ath chuairt mar a leanas:

• Baile a' Chaisteil - Abhach

• Stromness Athletic - Athletic Steòrnabhaigh

• Fortrose & Rosemarkie Union - Malaig

• Blackrock Rovers - Pentland United

• Lerwick Spurs - An t-Inbhir

• Slèite is an Strath/Am Bac - Golspie Stafford

• Kirkwall Thorfinn - Wick Groats

• Àrd nan Saor - Whalsay

Bidh na geamaichean ann Disathairne an 20mh den Ògmhios.

Gheibhear an taghadh 'son nan ìrean às dèidh sin an seo, taobh a-muigh.

Bidh a' mhòr-chuid de na prìomh sgiobaidhean ann an iomain nam fear san taghadh Diluain 'son cairteal cuairtean deireannach Chupa na Camanachd - ged nach robh cùisean furasta do chuid aca.

Às dèidh dhaibh geama teann a thoirt do Cheann a' Ghiùthsaich ann an Còmhghall bho chionn beagan sheachdainnean, 's ann a chuir Caol-Gleann an t-eagal air Kings ann am Bàideanach fhèin.

Chuir Neily MacNeachdain Caol-Gleann air thoiseach tràth agus 's e 1-0 a bh' ann fhathast aig lethach slighe - is cuid a' faighneachd an robh sgòr cho iongantach 's a bha ann an iomain ann an ginealachean gu bhith ann.

Fhuair Dylan Borthwick tadhal air ais tràth san dàrna leth ach 's ann dìreach sa mhionaid mu dheireadh a thàinig an tadhal a chuir Ceann a' Ghiùthsaich troimhe - sin a' tighinn bho Savio Genini gus cridheachan sgioba Chòmhghaill a bhriseadh.

Ann an Drochaid an Aonachain bha Loch Abar 3-0 suas air Gleann Urchadain is le coltas gun robh iad a' dol troimhe mus do thill sgioba a' Ghlinne orra is an geama a' crìochnachadh 3-3.

'S iad an sgioba bhon Lìog Nàiseanta a rinn an gnothach air buillean-peanais is gàirdeachas ga dhèanamh ann an Druim na Drochaid.

Thug Lòbhat geama doirbh dhan Ghearasdan ach air a' cheann thall chaidh na h-Abraich air adhart 3-2.

Bha e faisg ann an Inbhir Aora cuideachd is tadhal bho Ros Gòrdan le cairteal na h-uaireach air fhàgail a' cur nan Sgitheanach troimhe 1-0 an aghaidh sgioba a' Bhaile Rìoghail.

Ann an geamaichean eile eadar a' Phrìomh Lìog is an Lìog Nàiseanta 's e 4-2 a bh' ann do Cheann Loch Seile an aghaidh GMA is 3-1 dha Camanachd an Obàin an aghaidh na Manachainn.

Agus bha cùisean nas fhasa sa gheama eile eadar Bàideanach is Còmhghall is Baile Ùr an t-Slèibh a' buannachadh 5-0 an aghaidh Chaoil Bhòid ann an Taigh na Bruaich.

Ann an Siabost chaidh na Leòdhasaich a-mach à Cupa Shrath Èireann nuair a chaill iad 5-0 ri dàrna sgioba a' Ghearasdain.

Iomain nam ban

Tha cùisean inntinneach dha-rìribh aig mullach na Prìomh Lìge ann an iomain nam ban is coltas ann gu bheil fìor rèis gu bhith ann.

Bha Loch Abar air sreath gheamaichean a chall anns na seachdainnean mu dheireadh is a h-uile coltas ann gun robh iad mar-thà air cothrom a chall air greim a chumail air an tiotal - ach thàinig aiseirigh orra Didòmhnaich.

Rinn na h-Abraich an gnothach 3-0 air Bàideanach is na tadhail a' tighinn bho Leah Maxtone (2) is Missy Howie.

A' chiad turas a tha Bàideanach air call san lìog am-bliadhna is dòchas dha na sgiobaidhean eile.

'S iad na Sgitheanaich is Ceann Loch Seile as fhaisge orra - chrìochnaich geama air leth eatorra ann am Port Rìgh 3-3.

Chuir Maura NicCoinnich Ceann Loch Seile air thoiseach ach fhreagair na Sgitheanaich le dà thadhail bho Abby NicIlleathain.

Chuir Lorna NicRath Ceann Loch Seile co-ionnan is bha na sgiobaidhean glaiste aig 2-2 a' dol a-steach dha na mionaidean mu dheireadh.

Bha coltas ann gun robh Abby NicIlleathain air an geama a bhuannachadh dha na Sgitheanaich ach bha ùine ann fhathast do Mhaura NicCoinnich tadhal a chur do Cheann Loch Seile is an geama a' crìochnachadh 3-3.

Tha coltas ann gu bheil blàr 'son an tiotail gu bhith ann eadar Bàideanach, An t-Eilean Sgitheanach is Ceann Loch Seile - agus 's dòcha nach eil Loch Abar fhèin builleach a-mach às.

San aon gheama eile sa Phrìomh Liog rinn GMA an gnothach 1-0 air Inbhir Nis.

Tùs an deilbh, SNS

Ged a bhios aire mhòran air Cupa na Cruinne an toiseach, rinn an SPFL an taghadh feasgar Diciadain airson ìre nam buidhnean ann an Cupa na Lìge.

Bidh Caley Thistle ann am Buidheann F còmhla ri St Johnstone, Morton, East Fife is Linlithgow Rose.

Chaidh Ross County a thaghadh ann am Buidheann D còmhla ri Dùn Dè, Airdrieonians, Cluaidh is Annan Athletic.

Tha Brora Rangers san fharpais cuideachd às dèidh dhaibh Lìog na Gàidhealtachd a bhuannachadh ann an 2025/26.

Chaidh Brùra a chur ann am Buidheann A còmhla ri Obar Dheathain, Queen's Park, Queen of the South agus Kelty Hearts.

Tòisichidh an fharpais air an deireadh-seachdain an 11mh den Iuchar.

Gheibhear an taghadh gu lèir an seo, taobh a-muigh.

Tùs an deilbh, SNS

Thuirt Brian Greumach gun robh e gu mòr 'son tilleadh gu Ross County ged a bha clubaichean eile air cùmhnantan a thabhainn air.

Tha na Staggies air dearbhadh gun till am fear-aghaidh, 38, nuair a thig an cùmhnant aige leis an Eaglais Bhric gu ceann.

Chluich an Greumach do Chounty an toiseach ann an 2015/16 nuair a bha e na phàirt den sgioba a bhuannaich Cupa na Lìge.

Thàinig e air ais ann an 2018 is chluich e dha na Staggies nuair a bhuannaich iad an Championship is an Cupa Dùbhlain.

Às dèidh dha Inbhir Pheofharain fhàgail an dàrna turas bha còig bliadhna aige le Partick Thistle is an uairsin seusan sa Phrìomh Liog leis an Eaglais Bhric.

A dh'aindeoin is gu bheil County air tuiteam gu Lìog 1 is gun robh clubaichean eile ga iarraidh, thuirt an Greumach gun robh e ag iarraidh air ais gu tuath.

"Tha e cho math a bhith air ais, às dèidh dhomh bruidhinn ris a' mhanaidsear thachair a h-uile dad gu math luath.

"Chan eil an cluba 'son a bhith ann an Lìog 1 is bhruidhinn e rium mu dheidhinn cultar a' chluba a chur air ais mar a bha e is cuid de na cluicheadairean òga a chuideachadh.

"Tha mi eòlach air a' chluba seo, bha mi soirbheachail an seo roimhe is tha mi 'son a bhith soirbheachail an seo a-rithist".

Tha Malaig agus Slèite is an Srath a-nise còmhla aig mullach Lìog Thaobh Siar na Gàidhealtachd às dèidh dhaibh le chèile buannachadh gu furasta oidhche Mhàirt.

Rinn Malaig an gnothach 9-0 air Loch Aillse agus 's e 7-0 a bh' ann do Shlèite an aghaidh Chàoil Àcainn.

Fhuair Freddie Patterson trì do Mhalaig is bha dà thadhal aig Anndra Sneddon.

Thàinig na tadhail eile bho Sam MacCoinnich, Michael Doherty, Connor MacFhionghain is Tom Benfield.

Air an targaid do Shlèite an aghaidh nan nàbaidhean aca bha Cameron Macleòid (3), Ruairidh 'Spod' MacLeòid (2) agus Cameron Moireasdan is Daniel Dòmhnallach.

Bidh an lìog na tàmh Disathairne is grunn de na sgiobaidhean a' cluich ann an Cupa Amaitearach na Gàidhealtachd.

Tùs an deilbh, Ian MacNicol

Dh'ainmich Caley Thistle Inbhir Nis gu bheil Graeme Shinnie, a bha na sgiobair nuair a bhuannaich an sgioba Cupa na h-Alba an 2015, a' tilleadh chun a' chluba.

Thuirt ICT gu bheil Shinnie air ainm a chur ri ro-chùmhnant dà bhliadhna ann an Inbhir Nis agus gun till e chun a' chluba aon uair is gun tig an t-aonta aige le Obar Dheathain gu ceann.

Tha cha mhòr 11 bliadhna ann chun an là bho chluich Shinnie mu dheireadh do Chaley Thistle, is iad a' dèanamh a' ghnothaich air an Eaglais Bhric ann an cuairt dheireannach Chupa na h-Alba 2-1.

Chluich e 187 turas dhan chluba mus do ghluais e a dh'Obar Dheathain an 2015.

Dh'fhàgadh e Obar Dheathain airson cluich do Derby County agus an uairsin Wigan Athletic mus do thill e chun nan Dons ann an 2023, air iasad an toiseach mus do chur e ainm ri cùmhnant leantainneach.

B' e an sgiobair nuair a thog Obar Dheathain Cupa na h-Alba an-uiridh airson a' chiad turas ann an 35 bliadhna.

"Thòisich mi mo dhreuchd-cluiche an seo agus tha cuimhneachain fìor mhath agam," thuirt Shinnie.

"'S ann an seo far an do chluich mi a' chiad gheam agam, far an tàinig mi troimhe mar bhalach òg, agus an uairsin dh'fhàg mi le bhith a' buannachadh Chupa na h-Alba - cha b' urrainn na b' fheàrr na sin.

"Tha e sgoinneil a bhith air ais agus tha mi a' dèanamh fiughair ri cluich dhan sgioba a-rithist," thuirt e.

Bha oidhche thrang ann am ball-coise ionadail Diluain is Cupa Eilean an Fhraoich 2026 a' tòiseachadh.

Bha cùisean teann sa chiad leth eadar Càrlabhagh is an Taobh Siar is tadhal bho Ali 'Barbhas' MacLeòid a' cur nan Siarach 1-0 suas.

'S ann a thòisich na tadhail a' frasadh a-steach san dàrna leth.

Chuir Luke MacLeòid Càrlabhagh co-ionnan ach dh'fhàg dà bhreab-peanais taobh a-staigh còig mionaidean bho Luke MacAoidh an Taobh Siar 3-1 air thoiseach.

Bha Ross Dòmhnallach an uairsin air an targaid dha na Siarach is chuir an dearbh chluicheadair tadhal eile le deich mionaidean air fhàgail gus an sgioba aige a chur 5-1 air thoiseach is ann an suidheachadh fìor làidir.

Cha robh an gnothach seachad ge-tà.

Fhreagair Stuart 'Bubble' Dòmhnallach dha Càrlabhagh agus anns na mionaidean mu dheireadh fhuair Connor Macleòid is Kenny Dokus dà thadhal eile dhaibh.

5-4 air a' cheann thall is na tadhail sin aig an deireadh a' fàgail dreach gu math eadar-dhealaichte air cùisean a' dol dhan dàrna gheama ann am Barbhas ann an cola-deug.

Cha robh ann ach aon tadhal aig na Còig Peighinnean - thàinig sin bho Mhurchadh MacRisnidh bhon spot is Nis a' buannachadh 1-0 an aghaidh an Rubha.

Bidh dùil ri geama teann eile air ais ann an Garrabost.

Sa gheama eile bha oidhche air leth aig Friseal Moireach is e a' cur nan tadhal air fad dha na Lochan is iad a' buannachadh 4-1 an aghaidh na Hearadh.

Obair mhòr aig na Hearaich ma tha iad gus cùisean a thionndadh mun cuairt.

Bidh dà gheama ann an Lìog Thaobh Siar na Gàidhealtachd oidhche Mhàirt.

Cuiridh Caol Àcainn fàilte air na nàbaidhean aca Slèite is an Srath is bidh Malaig aig an taigh an aghaidh Loch Aillse.

Thog Athletic Steòrnabhaigh a' chiad dhuais den t-seusan ann an Leòdhas is na Hearadh nuair a rinn iad an gnothach 2-1 air an Taobh Siar gus Cupa ABC a bhuannachadh.

Ged a bha Kenny Mitchell air an Taobh Siar a chur air thoiseach tràth, thàinig Aths air ais is tadhail bho Luke Moireasdan is Aonghas Moireach a' buannachadh a' chupa dhaibh.

Bha dà gheama lìge air a bhith ann oidhche Haoine: bhuannaich an Rubha 2-1 anns na Hearadh agus 's e 2-1 a bh' ann cuideachd do Chàrlabhagh an aghaidh nan Loch.

Oidhche Luain bidh Cupa Eilean an Fhraoich a' tòiseachadh.

Bidh Nis an aghaidh an Rubha, Càrlabhagh an aghaidh an Taobh Siar, is na Lochan an aghaidh na Hearadh.

Fhuair Lìog Uibhist is Bharraigh gu dol thairis air an deireadh-sheachdain agus sa gheama mhòr fhuair Saints an Ìochdair dìoghaltas air Barraigh.

Seachdain às dèidh do Bharraigh a' chùis a dhèanamh orra 4-0 gus Cupa Stailearan Bharraigh a thogail, rinn Saints an gnothach an turas seo 5-1.

Anns na geamaichean eile rinn Èirisgeigh a' chùis 5-0 air Uibhist a Tuath agus 's e 9-2 a bh' ann do Bheinn na Faoghla an aghaidh Southend.

Cha robh ach aona gheama ann an Lìog Thaobh Siar na Gàidhealtachd air an deireadh-sheachdain ach bha tadhail gu leòr ann is Malaig a' buannachadh 6-5 an aghaidh a' Ghearasdain.

Thuirt manaidsear Lòbhat gun robh Ceann a' Ghiùthsaich "nan smàl" às dèidh dhaibh ochd tadhal a chur seachad air an sgioba aige san iar-chuairt dheireannaich de Chupa MhicThàmhais.

Thàinig na tadhail sin uile sa chiad leth - agus seachdain às dèidh do Cheann a' Ghiùthsaich 17 a chur seachad air Caol Bhòid.

"Chluich Ceann a' Ghiùthsaich sàr-iomain ach dh'iarr mi air na balaich againn aig lethach slighe beagan spiorad a shealltainn is fhuair mi sin bhuapa san dàrna leth," thuirt Iain MacNeacail.

Bidh Kings an aghaidh nan nàbaidean aca Baile Ùr an t-Slèibh sa chuairt dheireannaich ach bha geama gu math nas dorra acasan aig Caisteal Leòid.

Ged a bha am Baile Ùr air thoiseach 2-0 is 3-2 air Cabar Fèidh - thill Cabers gach turas is an geama a' dol gu buillean-peanais air a' cheann thall.

Bha 18 dhiubh sin ann mus deach am Baile Ùr air adhart 3-2.

Aig deas bidh Camanachd an Òbain an aghaidh Ghlaschu Meadhan Earra-Ghàidheal sa chuairt dheireannaich den Chupa Cheilteach.

Bha e furasta gu leòr do sgioba an Òbain an aghaidh Inbhir Aora aig Mossfield is iad a' dol air adhart 6-1.

Bha Caol-Gleann 2-0 air thoiseach air GMA ann an Gleann Da-Ruail is iad ag amas air a' chuairt dheireannach a ruighinn 'son a' chiad air.

Thill GMA ge-tà le trì tadhail ann an còig mionaidean gus a' chùis a dhèanamh 3-2.

Bha aona gheama sa Phrìomh Lìog is An Gearasdan a' buannachadh 3-0 an aghaidh Chaoil Bhòid.

Agus tha Camanachd Leòdhais ann an iar-chuairt dheireannach 'son a' chiad uair a-riamh às dèidh dhaibh a' chùis a dhèanamh air Tatha is For 4-1 ann an Dùn Èideann.

Bidh na Leòdhasaich is Loch Carran a-nise a' strì 'son àite sa chuairt dheireannaich de Chupa a' Chinn-chinnidh.

Là math do Chean Loch Seile is na Sgitheanaich

Ann an iomain nam ban tha oidhirp Loch Abair greim a chumail air tiotal na Prìomh Lìge cha mhor seachad mar-thà.

Chaill na h-Abraich 4-1 aig an taigh Didòmhnaich is Ceann Loch Seile cus ro mhath dhaibh.

'S i Lorna NicRath a fhuair na tadhail uile aig Ceann Loch Seile is iadsan a-nise dìreach dà phuing air dheireadh air Bàideanach a th' aig mullach na lìge.

Tha na Sgitheanaich cuideachd gu mòr an sàs san rèis aig a' mhullach.

Thug iadsan droinneadh 10-0 air Inbhir Nis aig Pàirc a' Bhucht.

Thàinig còig de na tadhail sin bho Sarah Yoxon.

Tha geama mòr a-nise san amharc is na Sgitheanaich is Ceann Loch Seile gus coinneachadh aig Pàirc nan Laoch Disathairne seo tighinn.

Tùs an deilbh, SNS

Seachdain às dèidh briseadh-cridhe do Hearts ann am Prìomh Lìog nam fear, tha boireannaich Tynecastle ag amas air a dhol ceum nas fhaide agus eachdraidh a dhèanamh dhaibh fhèin le Prìomh Lìog nam ban a bhuannachadh.

Chan eil Hearts gu seo riamh air an fharpais a thogail.

Tha na Jambos a' dol a-steach dhan gheama mu dheireadh Didòmhnaich dà phuing air thoiseach air Rangers.

Leis gun robh làmh an uachdar aig Hearts an aghaidh Rangers anns na geamaichean eatorra air an t-seusan, gheibheadh iad an tiotal nam biodh na sgiobaidhean a' crìochnachadh co-ionnan air puingean.

Tha sin a' ciallachadh gun dèanadh puing an gnothach do Hearts an aghaidh Hibs aig Meadowbank, ge bith dè thachras eadar Glasgow City is Rangers.

A' bruidhinn air Aithris na Maidne Dihaoine, thuirt Màiri Anna Chaimbeul gur e sàr chothrom a tha seo, ged nach bi e furasta.

"Na nàimhdean aca Hibernian, cha bhi iadsan ag iarraidh gum bi cothrom sam bith aig Hearts seo a bhuannachadh is mar sin bidh geama gu math duilich romhpa.

"Ach tha làn fhios aca gu bheil a h-uile sìon nan làmhan fhèin agus gu bheil cothrom air leth aca.

"A' tighinn sìos dhan gheama mu dheireadh a-rithist, 's e sgeulachd inntinneach a th' ann a-rithist airson geama nam ban ann an Alba."

Chìthear Hibs an aghaidh Hearts beò air BBC ALBA Didòmhnaich bho 1f.