Abubuwan da ke faruwa a Najeriya da sauran sassan duniya

Rahoto kai-tsaye

Isiyaku Muhammed da Abdullahi Bello Diginza

1. Sa'a 1 da ta wuceMayaƙan Houthi sun ƙwace iko da gaɓar Tekun Maliya a Yemen

   Rahotanni na cewa 'yan tawayen Houthi masu samun goyon bayan Iran sun ƙwace iko da bakidaya gabar tekun Maliya ta Yemen, sannan sun kwace ikon muhimman tsibirai uku da ke mashigar Bab al-Mandeb.

   Jami’ai daga gwamnatin Yemen mai samun goyon bayan Saudiyya sun ce mayaƙan Houthi sun ƙwace tsibirin Mayyun, da kuma manyan da ƙananan tsibiran Hanish, lamarin da ya ƙara tabbatar da ikonsu a kan muhimmiyar hanyar jiragen ruwa da ke haɗa Turai da Asiya.

   Tun da farko, mayakan sun ƙwace tsibirin Perim, kwana guda bayan da suka mamaye birnin Mokha.

2. Sa'a 1 da ta wuceZa mu kawo ƙarshen yaƙin Iran - Sakataren tsaron Amurka

   Sakataren Tsaron Amurka, Pete Hegseth, ya ce nan ba da jimawa Amurka za ta kawo ƙarshen yaƙin Iran.

   Yayin da yake jawabi a wajen bikin tunawa da harin 11 ga Satumba (9/11) da aka gudanar a Pentagon, hedikwatar Ma'aikatar Tsaron Amurka, Mista Hegseth ya ce "Za mu kai wannan yaƙi zuwa ga ƙarshe."

   A cikin jawabin nasa, Mista Hegseth ya ce:

   "A cikin watanni shida da suka gabata, mun murƙushe babbar ƙasar da ta fi kowacce ɗaukar nauyin ta'addanci a duniya. Dakarunmu sun fafata da wata ƙasa ta Musulunci da ta shafe kusan rabin ƙarni tana fatan mutuwarmu, kuma ta yi maraba da harin 11 ga Satumba. Wannan gwamnati ce da ta daɗe tana ɗaukar nauyin hare-haren ta'addanci kan Amurkawa tsawon shekaru da dama, tare da kashe dubban mutane ciki har da kawayenmu a Iraki da Afghanistan."

   Mista Hegseth ya kuma yaba wa Shugaban Amurka, Donald Trump, yana mai cewa Amurka ta samu nasarori a wannan yaƙi.

   "Amurka ta kawar da shugabanninsu (na Iran) tare da lalata rundunar sojojinsu ta sama. Yanzu rundunar ruwansu tana ƙasan teku, yayin da tsarin kariyarsu ya rushe. Za mu ci gaba da aika 'yan ta'adda zuwa lahira, mu kuma nutsar da jiragen dakon man fetur dinsu a cikin teku. Haka kuma za mu tabbatar Iran ba ta taɓa mallakar makamin nukiliya ba."

   Da yake magana kan ƙarin matsin tattalin arziki da ake kakabawa Iran, Mista Hegseth ya jaddada cewa Amurka na da iko a mashigin Hormuz, yana mai cewa

3. Sa'o'i 2 da suka wuceGwamnatin Kaduna za ta biya malaman KASU albashin da Najeriya ke biyan ASUU

   Gwamnan jihar Kaduna, Uba Sani, ya amince da fara aiwatar da sabon tsarin albashi da gwamnatin Najeriya da ƙungiyar malaman jami'o'i ta ASUU suka cimma a 2025 ga malaman Jami'ar jihar Kaduna (KASU), wanda zai fara aiki daga albashin watan Oktoban 2026.

   Cikin wata sanarwar da kwamishinan ilimin jihar, Farfesa Abubakar Sani Sambo,ya fitar ya ce amincewar na zuwa ne bayan shawarwarin kwamitin tattaunawa da gwamnati ta kafa tsakanin KASU da ASUU, inda sabon tsarin ya ƙunshi ƙarin albashi bisa tsarin CONUASS da alawus-alawus na aiki da sauran gyare-gyaren jin daɗin ma'aikata.

   Gwamnatin ta ce matakin wani ɓangare ne na manufofinta na bunƙasa ilimi, tana mai nuni da cewa ta ware aƙalla kashi 25 cikin 100 na kasafin kuɗin jihar ga fannin ilimi, tare da gina da gyara dubban azuzuwa da rage kuɗin makarantu na jami'o'i da sauran manyan makarantu da kashi 50 cikin 100, da kuma tsawaita shekarun ritayar malamai.

   A kwanakin baya ne dai ƙungiyar ASUU reshen jami'ar KASU ta sanar da shiga yajin aiki, sakamkon abin da ta kira gazawar gwamnatin Kaduna wajen aiwatar da yarjejeniyar da ƙungiyar ta cimma da gwamnatin Najeriya a 2025.

   Gwamnatin Kadunan ta buƙaci ƙungiyoyin ASUU da SSANU da NASU da kuma NAAT su rungumi tattaunawa wajen warware saɓani, maimakon matakin yajin aiki.

4. Sa'o'i 3 da suka wuceSu wane ne mayaƙan Houthi a Yemen, kuma me ya sa suke rikici da Saudiyya?

   A cikin ƴan makonnin nan, an sake samun ƙaruwar rikici tsakanin mayaƙan Houthi na Yemen da Saudiyya, lamarin da ya jawo tattaunawa kan rawar da ƙawancen tsaro na Pakistan da Turkiyya da Saudiyya ka iya takawa.

   Amma su waye Houthiyawan da ke Yemen, kuma mene ne musabbabin rikicinsu da Saudiyya?

   Jami'an Saudiyya sun ce Houthiyawan sun harba jirage marasa matuƙa da makamai masu linzami da dama kan cibiyoyin makamashi da sauran wuraren fararen hula a ƙasar, lamarin da ya jikkata mutum 73.

   Rundunar sojin Saudiyya da ma'aikatar makamashin ƙasar sun ce hare-haren da aka kai ranar Talata sun shafi birane huɗu a yankin kudu maso yammacin ƙasar. Hare-haren sun haddasa gobara a cibiyoyin man fetur da wasu wurare, lamarin da ya tilasta dakatar da ayyuka na ɗan lokaci a wasu yankuna.

   Ƙawancen sojojin da Saudiyya ke jagoranta a Yemen ya ce zai mayar da martani ga abin da ya bayyana a matsayin "wannan hatsarin rikici".

   Karanta cikakken labarin a nan

5. Sa'o'i 4 da suka wuce'Makaman linzami shida sun faɗa tashar ruwa ta Mocha'

   Wani jami'in gwamnatin Yemen ya shaida wa kamfanin dillancin labarai na AFP cewa makamai masu linzami shida sun faɗa tashar jiragen ruwa ta Mocha.

   Jami'in bai bayyana inda aka harba makaman ba, kuma har yanzu ba a fitar da ƙarin bayani kan lamarin ba.

   A jiya ne mayaƙan Houthi masu alaƙa da Iran suka ƙwace muhimmin tashar jiragen ruwan Mocha da ke gabar Tekun Maliya daga hannun dakarun gwamnatin Yemen da ke samun goyon bayan Saudiyya.

   Sa'o'i kaɗan da suka gabata kuma, kafafen yaɗa labaran Houthi sun ba da rahoton cewa Saudiyya ta kai hare-hare biyu kan filin jirgin saman Mocha.

6. Sa'o'i 5 da suka wuceLabarai da dumi-dumi, Mayaƙan Houthi sun ''kammala'' ƙwace iko da mashigar Bab al-Mandab

   Wani jami'in sojin gwamnatin Yemen ya shaida wa kamfanin dillancin labarai na AFP cewa mayakan tawayen Houthi masu samun goyon bayan Iran sun kammala karɓe dukkan yankunan da sojojin gwamnati ke iko da su a gaɓar yammacin Tekun Maliya.

   Kazalika, mayaƙan Houthi sun ƙwace tashar jiragen ruwa ta Dhubab da tsibirin Mayun mai muhimmanci ga ayyukan soji, da kuma tsibiran Greater Hanish da Lesser Hanish da ke mashigar Bab al-Mandab.

   Tuni dakarun gwamnatin Yemen da ke samun goyon bayan Saudiyya sun janye daga waɗannan wurare.

   A jiya ne kuma mayakan Houthi suka sanar da ƙwace tashar jiragen ruwa ta Mocha, lamarin da ya sa yanzu suke ikirarin mallakar mashigar Bab al-Mandab baki ɗaya.

   Bayan ƙwace Dhubab da Mayun (Brim) a yau, Houthi sun bayyana a cikin wata sanarwa cewa mashigar Bab al-Mandab a buɗe take ga dukkan jiragen ruwa, sai dai waɗanda ke da alaƙa da Saudiyya.

   Ƙungiyar ta Houthi ta ce matakin wani martani ne ga takunkumin da Saudiyya ta ƙaƙaba wa yankunan da suke iko da su, inda ta bayyana hakan a matsayin "takunkumin ramuwar gayya" domin karya katangar takunkumin da aka yi musu.

7. Sa'o'i 5 da suka wuceEbola ta ƙara bazuwa a DR Congo

   Jami’ai a Jamhuriyar Dimokuraɗiyyar Kongo sun ce barkewar cutar Ebola ta bazu zuwa wani lardi, wanda shi ne na bakwai. Gwamnan Sud-Ubangi ya ce an tabbatar da samun cutar a yankin da ke iyaka da Jamhuriyar Afirka ta Tsakiya da Jamhuriyar Kongo.

   An yi imanin cewa majinyacin ya bi ta wasu larduna da dama, ciki har da wasu wuraren da ba a tabbatar da samun cutar ba.

   Sud-Ubangi ba shi da iyaka da ko ɗaya daga cikin wuraren da cutar ta riga ta shafa. An samu rahoton sama da mutum 6,000 da suka kamu da cutar a wannan zagayen ɓarkewar, ciki har da sama da mutum 3,000 da suka mutu.

8. Sa'o'i 6 da suka wuceSojojin Uganda sun musanta zargin katsalandan a zaɓen Sarkin Tooro

   Rundunar sojin Uganda ta musanta zargin cewa ta tsoma baki a rikicin da ya kunno kai kan wanda zai gaji marigayi Sarki Oyo Nyimba na Tooro.

   Mai magana da yawun rundunar ya ce sojojin ba su janye masu gadin masarautar ba, kuma ba su tsare iyalan sarkin a gida ba.

   Ya ce an ƙara tsaurara matakan tsaro a fadar sarkin ne gabanin jana’izarsa da za a yi ranar Asabar, saboda ana sa ran jama’a da dama za su halarta, sannan kuma fadar tana kusa da gabashin Jamhuriyar Dimokuraɗiyyar Kongo.

   Sai dai tun da farko mahaifiyar tsohon sarkin ta yi zargin cewa sojoji sun hana mutane shiga da fita daga fadar, lamarin da a cewarta ya yi daidai da tamkar an tsare ta a gida ne.

9. Sa'o'i 6 da suka wuceZa a miƙa ƴan Najeriya da ake zargi damfara zuwa Amurka

   Za a miƙa wasu ƴan Najeriya shida da hukumomin Amurka ke nema ruwa a jallo bisa zargin damfarar sama da mata 100 ta hanyar zambar soyayya a intanet daga Afirka ta Kudu zuwa Amurka a yau.

   Masu gabatar da ƙara a Amurka sun ce ana tuhumar mutanen da laifin damfara da kuma halatta kuɗaɗen haram.

   An yi sama da faɗi da sama da dala miliyan shida daga hannun waɗanda lamarin ya shafa, ciki har da ƴan fansho da ƴan kasuwa, waɗanda aka yi wa karyar alaƙar soyayya a intanet.

   An kama waɗanda ake zargin shekara biyar da suka wuce a wani babban samame da aka kai kan wannan ƙungiyar masu aikata laifuka. Za a mika su ga jami’an tsaron Amurka a Cape Town

10. Sa'o'i 7 da suka wuceHarin ƴan tawaye ya sa an dakatar da aiki a filin jirgi na biyu mafi girma a Myanmar

    Rahotanni daga Myanmar na cewa an dakatar da ayyukan filin jirgin sama na biyu mafi girma a ƙasar na wani ɗan lokaci, bayan wani harin jirgi mara matuƙi da ƙungiyoyin ƴan tawaye suka kai.

    Kamfanin dillancin labarai na Faransa ya ce filin jirgin saman Mandalay International ya dakatar da ayyukansa na tsawon kwana biyu.

    Matakin ya biyo bayan hare-haren jirage marasa matuƙa da dama da aka kai wa filin jirgin a ranar Alhamis.

    Ba a san ko harin ya yi sanadin lalacewar wani abu ko jikkata ko mutuwar mutane ba.

    Filin jirgin saman yana amfani da wasu daga cikin kayayyakin aiki tare da sansanin sojin sama na Tada-U.

11. Sa'o'i 8 da suka wuceA karon farko tun bayan yaƙin Ukraine, Putin zai halarci taron Brics a India

    Babban birnin Indiya, Delhi, yana cikin shirin ko-ta-kwana gabanin taron shekara-shekara na ƙungiyar ƙasashen BRICS.

    A karon farko tun bayan mamayar da Rasha ta fara yi wa Ukraine gaba ɗaya, Shugaba Vladimir Putin zai halarci taron BRICS da za a gudanar a wajen Rasha.

    Rahotanni daga Delhi sun ce za a kafa matakan tsaro masu matakai huɗu domin kare Mista Putin, baya ga jami’an tsaron da ke tare da shi.

    An jibge dubban jami’an ’yan sanda da sojoji a babban birnin, yayin da aka girke na’urorin gano jirage marasa matuƙa a kewayen wurin da za a gudanar da taron.

12. Sa'o'i 9 da suka wuceMajalisar Najeriya ta dakatar da zuwa Afirka ta Kudu

    Majalisar Dokokin Najeriya ta dakatar da wasu ziyarce-ziyarcen aiki zuwa Afirka ta Kudu, tare da cewa za ta kaurace wa duk wasu ayyukan majalisa da za su kasance a Afirka ta Kudu har zuwa wani lokaci.

    Matakin ya biyo bayan rahotannin kisan kai, hare-hare, tsoratarwa da lalata kadarorin da suka shafi ƴan Najeriya da sauran ƴan Afirka a Afirka ta Kudu. Mahukuntan Afirka ta Kudu sun musanta wasu daga cikin waɗannan ikirari, tare da cewa suna gudanar da bincike kan abubuwan da aka ruwaito.

    A cikin wata sanarwa, Majalisar Dokokin Najeriya ta ce ana “kashewa da rauna ƴan Najeriya da muhallansu, tare da tilasta wa wasu barin sana’o’insu da gidajensu.

    Ƴan majalisar sun kuma buƙaci gwamnatin Afirka ta Kudu ta kare baƙin da ke zaune a ƙasar, ta gudanar da bincike kan hare-haren da aka ruwaito tare da gurfanar da waɗanda aka samu da hannu a cikinsu.

    A watan Yuni, Najeriya ta fara kwashe ƴan ƙasarta daga Afirka ta Kudu saboda fargabar tsaro. A cewar gwamnatin Najeriya, sama da ƴan Najeriya 1,500 ne suka dawo ƙasar tun daga lokacin.

    Wasu ƙasashen Afirka, ciki har da Ghana, Malawi da Zimbabwe, su ma sun taimaka wa ƴan ƙasarsu barin Afirka ta Kudu saboda damuwar da ake da ita kan tashin hankalin.

    Majalisar Dokokin Najeriya ta ce matakin da ta ɗauka ba yana nufin kawo ƙarshen dangantakar diflomasiyya tsakanin ƙasashen biyu ba.

    Jihohin arewacin Najeriya 8 da zaɓen gwamnansu zai ɗauki hankali a 2027

13. 11 Satumba 2026Yadda gobara ta kashe yara 20 a makaranta a DRC

    Mahukunta sun tabbatar da mutuwar yara ƴan makaranta aƙalla 24, a lokacin da suke ƙoƙarin tserewa daga gobarar da ta tashi a cikin wasu makarantu biyu, a birnin Bukavu da ke gabashin Jamhuriyar Dimokuraɗiyyar Congo, lamarin da ya janyo ruɗani sosai.

    An kuma bayar da rahoton mutuwar wasu manya a wajen, yayin da hukumomi ke bayyana fargabar ƙaruwar yawan mutanen da za gobarar ta kashe saboda akwai wasu da aka garzaya da su asibiti domin duba lafiyar su.

    Hotunan da aka yaɗa na wajen da abin ya faru sun nuna ƙananan yara a kwance a ƙasa, a cikin asibiti, suna kuka saboda tsananin azabar ƙunar wuta.

    Gidaje 300 wutar ta ƙona, kuma har yanzu ba a gano abin da ya tayar da ita ba.

    Mahukunta sun ce lamarin ya faru ne a birnin Bukavu da ke gabashin Jamhuriyar Dimokuraɗiyyar Congo da ke ƙarƙashin ikon ƴan tawaye, inda ake fama da cunkoson jama'a.

    Bayanan da mayaƙan ƴan tawaye da ke iko da wajen suka fitar sun nuna cewa mutanen da suka rasu sun kai 24, amma akwai fargabar adadin zai ƙaru.

    Hotunan da aka yaɗa a kafafen sada zumunta sun nuna ƙananan yara kwance a ƙasa, kuma da alama gawarwaki ne.

    Shaidun da kamfanin dillanci labarai na Reuters ya zanta da su sun ce tun da rana aka kashe wutar, amma ana ci gaba da ganin hayaƙi da ke ɓullowa daga ƙarƙashin gine-ginen da aka rusa domin kashe gibarar.

    Bukavu, babban birnin kudancin lardin Kivu kuma yankin da ya fi cunkoson jama'a a Jamhuriyar Dimokuraɗiyyar Congo ya faɗa a ƙarƙashin ikon mayaƙan tawaye na M23 ne a watan Faburairun bara.

    Amma gwamnati a Kinshasa ta wallafa sanarwa a shafin X, ba tare da ta bayyana yawan mutanen da gobarar ta kashe ba.

    Sanarwar ta ce "Ma'aikatar ilimi da kula da ƴan ƙasa ta bayyana damuwa matuƙa kan mummunar gobarar da ta tashi,''

    "An yi asarar rayuka da yawa kuma wasu da dama sun ji rauni. Ministan Ilimi na aikewa da ta'aziya ga iyalan waɗanda lamarin ya ritsa da su, kuma ya bayar da umarnin tantance halin da makarantun da abin ya shafa suke ciki, tare da tabbatar da ganin an ci gaba da harkokin karatu.''

    Gobarar biyu sun faru ne bayan wata gobarar ta daban a ƙarshen makon da ya gabat a Kinshasa, inda aka samu asarar rayuka wajen turereniyar neman guduwa daga gobarar da ta tashi a wajen wani ɗakin taro ana tsakiyar biki.

    Gwamnatin ƙasar ta bayar da umarnin tsaurara matakan rigakafi, kuma ta tura jami'ai a sannan ƙasar domin sanya ido da tabbatar da kaucewa tashin gobara a wuraren da mutane ke taruwa.

    Jihohin arewacin Najeriya 8 da zaɓen gwamnansu zai ɗauki hankali a 2027

    Mene ne hijabi, kuma mene ne asalinsa a Musulunci?

14. 11 Satumba 2026Ƙungiyar JNIM ta ɗauki alhakin kashe soja a Benin

    Ƙungiyar Jama’at Nusrat al-Islam wal-Muslimin (JNIM), reshen ƙungiyar Al-Qaeda a yankin Sahel, ta yi ikirarin kashe wani soja a wani hari da ta kai a Benin, wanda shi ne harin farko da ƙungiyar ta yi ikirari a ƙasar cikin watanni.

    JNIM ta fitar da ikirarin ne ta kafar watsa labaranta ta al-Zallaqa, a tasharta ta musamman da ke ChirpWire, a ranar 10 ga Satumba.

    A cikin taƙaitacciyar sanarwar, ƙungiyar ta ce a ranar 9 ga Satumba ta kashe wani soja a wani hari da ta kai kan wani sansanin sojoji a ƙauyen Kantoro, kusa da garin Guene, a sashen Alibori.

    Wannan shi ne harin farko da JNIM ta yi ikirarin kai wa a Benin tun bayan wasu hare-hare da suka faru a watan Mayu.

    Hare-haren ƙungiyar a Benin sun fi faruwa ne a arewacin ƙasar, musamman a yankunan da ke kusa da iyakar Benin da Nijar.

15. 11 Satumba 2026Mayaƙan Houti sun ƙwace garin Dhubab na gabar tekun Yemen

    Wasu majiyoyi biyu daga gwamnatin Yemen sun shaida wa kamfanin dillancin labarai na Reuters a ranar Juma’a cewa mayaƙan Houti sun isa Dhubab, wani gari da ke arewacin mashigar ruwan Bab al-Mandab, kuma shi ne wuri mafi kusa da tsibirin Mayun.

    Garin yana yammacin lardin Taiz, a gaɓar tekun yammacin Yemen.

    Majiyoyin Yemen sun kuma bayar da rahoton cewa jiragen yaƙin Saudiyya sun kai hari kan filin jirgin saman Mocha.

    Haka kuma, tashar jiragen ruwa ta Mocha ta faɗa hannun mayaƙan na Houti, waɗanda Iran ke mara wa baya, a cikin ƴan kwanakin nan.

    Samun iko da Dhubab da tsibirin Mayun na da matuƙar muhimmanci wajen mamaye mashigar ruwan Bab al-Mandab.

    Hakan na nufin cewa kusan gaba ɗaya Houthis sun mallaki iko da mashigar ruwan Bab al-Mandab.

    Ƙaruwar ikon mayaƙan a mashigar Bab al-Mandab, da kuma ƙaruwar hare-hare kan jiragen dakon mai a mashigar ruwan Hormuz cikin makon da ya gabata, sun jefa kasuwar mai da makamashi cikin garari. Farashin dizal a Amurka ya kai dala shida kan galan ɗaya a karon farko.

16. 11 Satumba 2026An saki Turawa mata biyu da aka yi garkuwa da su a Nijar

    Wata ƴar ƙasar Austria da wata ƴar ƙasar Switzerland da aka yi garkuwa da su a lokuta daban-daban a arewacin Nijar a shekarar 2025, sun shaƙi iskar ƴanci, kamar yadda kamfanin dillancin labarai mai zaman kansa na Air Info Agadez ya ruwaito a ranar 11 ga Satumba.

    Sai dai har zuwa yanzu babu wata sanarwa a hukumance da ta tabbatar da sakin Eva Gretzmacher, ƴar Austria, da Claudia Abbt, ƴar Switzerland.

    An yi garkuwa da matan biyu ne daga gidajensu a Agadez a watan Janairu da Afrilu na 2025, yayin da wasu majiyoyi suka danganta sace su da ƙungiyar IS.

    Rahoton ya ce tun bayan da aka yi garkuwa da su, an yi ƙoƙarin ganin an sake su, amma ba a samu nasara ba.

    Wani ɗan uwan ɗaya daga cikin matan da aka yi garkuwa da su ya shaida wa Air Info Agadez cewa ba su da wani cikakken bayani da ke tabbatar da sakin ta, duk da cewa sun shafe kwanaki suna jiran samun labari mai daɗi.

    Abbt ta shafe shekaru da dama tana zaune a Agadez tare da mijinta ɗan Nijar. Babu wata ƙungiya da ta fito ta ɗauki alhakin sace ta.

    Gretzmacher, mai shekara 73, ta shafe shekara 28 tana zaune a Agadez kafin a yi garkuwa da ita. Ita ce ta kafa ƙungiyar Amanay, kuma ta kasance mai ruwa da tsaki a ayyukan da suka shafi ilimi da ƙarfafa mata da kare muhalli da al'adu da fasaha.

    Yadda Rasha ta taimaka wajen murƙushe boren sojoji a Nijar

17. 11 Satumba 2026MDD ta yi gargaɗi kan yaƙin basasar Yemen

    Wakili na musamman na Majalisar Ɗinkin Duniya kan Yemen ya yi gargaɗin cewa wajibi ne ƙasashen duniya su tunkari wani abin da ya kira sabon mataki mafi haɗari na yaƙin basasar ƙasar.

    Hans Grundberg ya ce kwace tashar jiragen ruwa ta Mokha ya bai wa ƙungiyar Houthi mai samun goyon bayan Iran damar kasancewa kai-tsaye a wata muhimmiyar hanya da jiragen ruwa ke bi a duniya.

    Tashar jirgin ruwan ta Mokha na kan Mashigar Bab al-Mandeb, wadda muhimmiyar mashigar ruwa ce da ke da matuƙar tasiri ga safarar mai daga Saudiyya da kuma kasuwancin duniya.

    Su wane ne mayaƙan Houthi a Yemen, kuma me ya sa suke rikici da Saudiyya?

18. 11 Satumba 2026Me ya faru a harin 11 ga Satumba, kuma mutum nawa ne suka mutu?

    Shekara 25 ke nan tun bayan harin da aka kai a ranar Talata, 11 ga Satumba, 2001, lokacin da wasu maharan ƙunar baƙin-wake suka yi juya akalar jiragen fasinja na Amurka, tare da yi musu dirar-mikiya a kan manyan gine-gine biyu a birnin New York, lamarin da ya yi sanadiyar mutuwar dubban mutane.

    A yau ne za a gudanar da bikin tunawa da waɗanda suka rasa rayukansu a harin a Amurka, inda ake sa ran gudanar da bukukuwa da wasu shirye-shirye daban-daban.

    Karanta cikakken labarin a nan

19. 11 Satumba 2026Trump ya ƙi amincewa da buƙatar Saudiyya ta kai wa mayaƙan Houti hari

    A cewar Axios, Yariman Saudiyya mai jiran gado, Mohammed bin Salman, ya kira Shugaban Amurka Donald Trump sau biyu a ranar Alhamis, inda ya buƙaci shugaban na Amurka ya kai hari kan mayaƙan Houti.

    A lokaci guda, ƴan Houtin da Iran ke mara wa baya suna ci gaba da kutsawa tare da ƙwace iko da tashar jiragen ruwa ta Mocha, lamarin da ke ƙara musu iko a yankin mashigar ruwan Bab al-Mandab.

    Rahoton ya ce Mista Trump bai amince da wannan buƙata ba, yayin da jami'an Amurka suka jaddada cewa a halin yanzu gwamnatin Amurka ba ta da wani shiri na shiga yaƙi kai tsaye da mayaƙan Houti.

    A safiyar yau kuma, Ma'aikatar Harkokin Wajen Iran ta fitar da wata sanarwa inda ta yi kira da a kawo ƙarshen katange hanyoyin shiga Yemen ta soji, sannan a fara tattaunawa.

    Su wane ne mayaƙan Houthi a Yemen, kuma me ya sa suke rikici da Saudiyya?

20. 11 Satumba 2026Farawa

    Masu bibiyarmu a wannan shafi na kai tsaye daga BBC Hausa muna muku barka da safiyar ta Juma'atu babbar rana.

    Za ku iya ziyartar shafukanmu na sada zumunta domin kallon wasu hotuna da bidiyon hirarraki da muke wallafawa tare da yin tsokaci a kai.