પેપર લીક મામલે નડ્ડાએ વિપક્ષ પર પ્રહાર કર્યા, રાહુલ ગાંધીના ઇરાદા પર ઉઠાવ્યા સવાલ
ઇમેજ સ્રોત, JP NADDA
ભારતીય જનતા પાર્ટીના નેતા અને કેન્દ્રીય આરોગ્ય મંત્રી જગત પ્રકાશ નડ્ડાએ બુધવારે સાંજે એક પ્રેસ કૉન્ફરન્સમાં કૉંગ્રેસ અને અન્ય વિપક્ષી પક્ષો પર આકરા પ્રહારો કર્યા.
તેમણે કહ્યું કે ભૂતકાળમાં પણ ઘણાં રાજ્યોમાં ઘણી વખત પેપર લીક થયાં છે.
તેમણે કહ્યું, "જો હું જમ્મુ અને કાશ્મીરમાં સર્વિસ સિલેક્શન બોર્ડ પરીક્ષાના પેપર લીક વિશે વાત કરું, જ્યાં કૉંગ્રેસ અને નૅશનલ કૉન્ફરન્સ સત્તામાં છે, તો તેવી જ રીતે હિમાચલ પ્રદેશમાં, હિમાચલ પ્રદેશ સ્કૂલ પરીક્ષા બોર્ડ પરીક્ષાનું પેપર લીક થયું હતું, જ્યાં કૉંગ્રેસ પણ સત્તામાં છે. ઝારખંડમાં, જેએસી હિન્દી અને વિજ્ઞાન પરીક્ષાના પેપર લીક થયાં હતાં, જ્યાં કૉંગ્રેસ અને ઝારખંડ મુક્તિ મોરચા સત્તામાં છે."
તેમણે વધુમાં કહ્યું, "તેલંગાણામાં ઇન્ટરમીડિયેટ ભાષા પરીક્ષાનું પેપર લીક થયું હતું અને ત્યાંની સરકારને કૉંગ્રેસ અને સીપીઆઈનું પણ સમર્થન છે. તેલંગાણામાં પણ એસએસસી ભાષા પરીક્ષાનું પેપર લીક થયું હતું અને ત્યાંની સરકારને કૉંગ્રેસ અને સીપીઆઈનું પણ સમર્થન છે."
નડ્ડાએ કહ્યું, "તમે રાજકીય લાભ મેળવવા માંગો છો, જે દુર્ભાગ્યપૂર્ણ છે. આ એક ગંભીર મુદ્દો છે. એવી ઘણી લાંબી યાદી છે જ્યાં યુપીએ સરકાર સત્તામાં હતી અને પેપર લીક થયાં હતાં."
તેમણે કહ્યું, "અમે ચર્ચા માટે તૈયાર છીએ. ઊંડાણપૂર્વક ચર્ચા થવી જોઈએ. સંસદ એકમાત્ર યોગ્ય સ્થળ છે જ્યાં ઊંડાણપૂર્વક ચર્ચા થઈ શકે છે. આપણે એક નક્કર નીતિ સાથે આવવું જોઈએ કારણ કે બાળકો દેશનું ભવિષ્ય છે. આ સરકારની સાથે સાથે વિપક્ષની પણ જવાબદારી છે."
જે.પી. નડ્ડાએ જણાવ્યું હતું કે તેઓ પ્રદર્શનકારીઓ સાથે ચર્ચા કરવા તૈયાર છે, અને સરકાર જ્યારે પણ કહેશે ત્યારે વાટાઘાટો કરશે. જોકે, આજે કોઈ ચર્ચા થઈ નથી.
