Rwanda: Umukuru w'ikigo cy'ubuziranenge bw'ibiribwa n'imiti yatawe muri yombi bijyanye n'inzoga 'zitujuje ubuziranenge'
Ahavuye isanamu, RWANDA FDA
- Umwanditsi, Didier Bikorimana
- Igikorwa, BBC Gahuzamiryango
- Yatangajwe
- Igihe co gusoma: iminota 3
Urwego rw'ubugenzacyaha mu Rwanda (RIB) ku bufatanye na polisi batangaje ko bataye muri yombi abantu 17 barimo n'umuyobozi mukuru w'ikigo cy'igihugu kigenzura ubuziranenge bw'ibiribwa n'imiti (Rwanda Food and Drugs Authority, FDA), bijyanye n'ifungwa ry'inganda zakoraga inzoga abategetsi bavuga ko zitujuje ubuziranenge.
Profeseri (Prof) Emile Bienvenu ni umwe muri abo berekanywe ku wa kane i Kigali ku cyicaro cya RIB.
RIB ivuga ko barimo abakozi 10 b'ikigo Rwanda FDA, batatu bo mu kigo cy'igihugu gitsura ubuziranenge (RBS) n'"abayobozi bo mu nzego z'ibanze batandukanye" bo mu turere twa Gisagara, mu majyepfo y'igihugu, na Karongi mu burengerazuba. Ntihatangajwe igihe batawe muri yombi.
Mu butumwa yatangaje ku mbuga nkoranyambaga, RIB yavuze ko abo bakozi b'ibyo bigo "bakurikiranyweho icyaha cyo gukoresha ububasha bahabwa n'itegeko mu nyungu zabo bwite aho bakekwa kuba baragize uruhare mu itangwa ry'ibyangombwa ku nganda zikora ibiribwa n'ibinyobwa mu buryo bunyuranije n'amategeko".
RIB ivuga ko abayobozi mu nzego z'ibanze bo "bakekwaho kuba ibyitso ku cyaha cyo guha umuntu ikintu gishobora kwica cyangwa gushegesha ubuzima".
Amafoto RIB yatangaje uko bigaragara yerekana Prof Bienvenu ari ku mapingu ahagararanye n'irindi tsinda ry'abantu mu nzu.
Ibi bibaye mu gihe ibikorwa bya leta byo guhashya izo nzoga zivugwa ko zitujuje ubuziranenge byakajije umurego kuva mu bihe bya vuba aha bishize, aho inganda zirenga 100 zakoraga izo nzoga zamaze gufungwa, n'abantu babarirwa muri za mirongo batabwa muri yombi.
Prof Bienvenu ni umuyobozi mukuru wa Rwanda FDA guhera muri Kanama (8) mu mwaka wa 2021. Mbere yaho yari umwarimu mu ishami ry'ibijyanye n'imiti kuri Kaminuza y'u Rwanda.
RIB na polisi bashimiye "abakomeje gutanga amakuru y'ahakigaragara ibinyobwa bitujuje ubuziranenge", abaturage na bo basabwa "kwirinda kubinywa".
Abategetsi bavuga ko inzoga zitujuje ubuziranenge, zizwi mu Rwanda nk'ibyuma, zimaze kwica abantu bagera kuri 50 kuva mu ntangiriro y'uyu mwaka kandi ko umubare nyawo ushobora kuba ari munini kurushaho.
Mu ntangiriro y'uku kwezi, Minisitiri w'ubuzima Dr Sabin Nsanzimana yabwiye igitangazamakuru cya leta ko ikibazo cy'izo nzoga asanga ari "icyorezo mu bindi", yongeraho ko amavuriro yo mu gihugu yari amaze kwakira abantu barenga 500 bayagannye kubera ibibazo bifitanye isano n'izo nzoga n'ibindi binyobwa.
Benshi bakomeje kwibaza ukuntu izo nganda zashoboye kumara imyaka zikora zifite ibyangombwa byemewe n'ubutegetsi, bagacyeka ko hashobora kuba hari izindi mpamvu zishobora kuba zihishe inyuma y'ifungwa ryazo.
