Cwblhau 100 marathon ultra mewn 100 diwrnod yn 'hollol boncyrs'
Fe fydd cyfanswm milltiroedd David erbyn diwedd yr her bron iawn yr un fath â'r pellter rhwng Llundain ac Efrog Newydd
- Cyhoeddwyd
Mae cyn-chwaraewr rygbi proffesiynol yn gobeithio cwblhau her gorfforol "anhygoel" yng Nghaernarfon ddydd Sadwrn - ei 100fed marathon ultra mewn 100 niwrnod.
Fe ddechreuodd her David Jackson, 44, sy'n dod o ardal Nottingham ond sydd bellach yn byw yng ngogledd Cymru, yng Nghastell Caernarfon ym mis Mai.
Y nod yw codi arian ar gyfer elusennau sy'n cefnogi pobl sydd wedi dioddef anafiadau i'r pen - a hynny wedi iddo orfod ymddeol o rygbi ar ôl cael anaf ei hun.
Wedi wythnosau o redeg mewn lleoliadau ar hyd Yr Alban, Lloegr a Chymru fe ddaw'r cyfan i ben yn yr un man a ddechreuodd y cyfan brynhawn Sadwrn.
Ymchwil i effaith ergydion i'r pen ar ferched yn 'gam pwysig' ymlaen
- Cyhoeddwyd8 Mehefin
Cyhoeddi canllawiau ar anafiadau pen mewn chwaraeon
- Cyhoeddwyd28 Ebrill 2023
Mae David eisoes wedi gosod record byd yn ystod yr her, am redeg marathon ultra ar y nifer fwyaf o ddyddiau yn olynol (81, ar 17 Awst), ac mae'n parhau i ymestyn y record honno yn ddyddiol.
Yn hytrach na rhedeg cyrsiau hir ar hyd a lled Prydain, mae David wedi bod yn rhedeg pellter marathon ultra (50km, neu thua 30milltir) ar gyrsiau pump a 10 cilomedr.
Y rheswm am hynny oedd sicrhau bod cyfle i bobl yn y 25 lleoliad i gwblhau rhywfaint o'r her gydag ef.
Mae dros 800 o bobl wedi ymuno - yr ieuangaf yn wyth, a'r hynaf yn ei 80au.
Mae gwraig David, Catherine wedi bod yn ei gefnogi ar bob cymal o her - sy'n cael ei alw'n Mission IN-possible
Un o'r rhai sydd wedi ymuno â David yn ystod y daith yw Steve Magee, 61 o Gaernarfon.
Mae'n un o sylfaenwyr grŵp 'Rhedeg Gyda'n Gilydd' yn y dref, ac fe aeth o a sawl aelod arall o'r clwb i gefnogi ar ddiwrnod cynta'r her 'nôl ym mis Mai.
"Gweld fideo ar social media nes i o'r boi 'ma yn rhedeg drwy Gaernarfon - heibio'r castell, draw at Morrisons, fel 'dan ni'n 'neud yn aml - a meddwl fyswn i'n holi os oedd rhywun yn gwybod pwy oedd o," meddai Steve.
"Dyna sut ddes i glywed am yr her, ac ar ôl dod i wybod mwy amdano fo 'nath criw ohono' ni benderfynu mynd lawr i redeg efo fo.
"'Oedden ni'n bwriadu rhedeg 10k, tra bod o'n rhedeg 80... Gan bo' fi'n mwynhau nes i ail 10k efo fo, a thrydydd a pedwerydd.
"Ond dwi'n cofio codi'r diwrnod wedyn a meddwl 'waw meddylia gorfod gwneud hynny eto heddiw', ond mi oedd o'n rhedeg mwy na dwbl hynny bob dydd... mae o'n hollol boncyrs!"
Mae sawl aelod o Rhedeg Gyda'n Gilydd yn gobeithio mynd draw i redeg gyda David unwaith eto ddydd Sadwrn
Roedd Steve yn gweld hi'n anodd disgrifio pa mor anodd yw'r her y mae David wedi'i osod iddo'i hun.
"Dwi'n trio cadw'n ffit - dwi'n mynd i'r gym, dwi'n 'neud ambell i ras weithia - ond y mwyaf dwi wedi'i redeg mewn wythnos ydi 50-60k, o'dd o'n 'neud 80k bob dydd.
"Mae o wir yn anhygoel a dydi pobl ddim yn gallu coelio sut ma'n neud o.
"Ma'r entourage pan ma' pobl yn 'neud petha' fel hyn fel arfer yn massive -physios, nutritionists a ballu - ond i fo a Catherine allu 'neud hyn ben ei hunain mwy neu lai, mae o'n anhygoel.
"Ma'n hawdd anghofio bod o wedi 'neud yr holl redeg 'ma yn ystod yr haf poethaf ar gofnod hefyd!"
Esboniodd Steve ei fod wedi gobeithio rhedeg y cymal olaf gyda David ddydd Sadwrn, ond oherwydd anaf mae o wedi gorfod tynnu 'nôl.
David Jackson yn chwarae i Nottingham mewn gêm gyfeillgar yn erbyn London Irish yn 2013
Daeth gyrfa rygbi David i ben yn sydyn yn 2013 wedi iddo ddioddef anaf i'r ymennydd yn ystod sesiwn ymarfer.
Am fisoedd wedi hynny bu'n profi symptomau fel blinder, sensitifrwydd i olau a phroblemau gwybyddol - ond mae'n dweud ei fod yn ddiolchgar iawn ei fod wedi gallu gwella ar ôl derbyn cefnogaeth dros y blynyddoedd.
"Dydi Mission IN-possible ddim wedi bod yn hawdd, ac mae wedi gadael ei oel ar fy nghorff - ond dydi hyn ddim byd i'w gymharu â'r anaf ges i yn 2013," meddai.
"Dydi o chwaith ddim byd i'w gymharu â sefyllfa rhywun fydd, o bosib, byth yn adfer yn llawn o'u hanaf.
"Mae'r elusennau hyn [Headway UK a Head for Change] yn cefnogi unigolion a'u teuluoedd ac yn gweithio'n galed i wella safon byw ar ôl anaf."
Ychwanegodd mai'r peth y mae fwyaf balch ohono yw'r ffaith bod cymaint wedi dod i'w gefnogi ar hyd y ffordd.
"Mae gweld dros 800 o bobl yn ymuno â ni wedi gwneud y profiad yn arbennig iawn, ac mae hynny wedi cadw ni fynd bob dydd.
"Y gôl yn y pendraw yw newid bywydau, helpu'r rhai sy'n cael eu heffeithio gan anafiadau i'r pen, a gwella prosesau adfer yn y dyfodol."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
