ቀጥታ, አሜሪካ ለተመታባት ሄሊኮፕተር አጸፋ በኢራን ላይ ጥቃት መፈጸሟን ሠራዊቷ አስታወቀ

የቀጥታ ሽፋን

1. ከ 58 ደቂቃዎች በፊትአሜሪካ ለተመታባት ሄሊኮፕተር አጸፋ በኢራን ላይ ጥቃት መፈጸሟን ሠራዊቷ አስታወቀ

   ፕሬዝዳንት ትራምፕ ቴህራን የአሜሪካ ሄሊኮፕተርን በሆርሙዝ ወሽመጥ ላይ መትታ ጥላለች በማለት ከከሰሱ በኋላ ሠራዊታቸው በኢራን ላይ ጥቃት ፈጸመ።

   የአሜሪካ ጦር ማዕከላዊ ዕዝ (ሴንትኮም) እንዳስታወቀው ለተመታው አፓቼ ሄሊኮፕተር አጸፋ ማክሰኞ ሌሊት በኢራን ላይ ጥቃት መፈጸም ጀምሯል።

   ዕዙ "ዘመቻው በኢራን ለተፈጸመው ተቀባይነት የሌለው ጠብ አጫሪነት ተመጣጣኝ ምላሽ ነው" ያለ ሲሆን፣ በባሕረ ሰላጤው ዳርቻዎች እና በሆርሙዝ ወሽመጥ ላይ ፍንዳታዎች መሰማታቸው ተዘግቧል።

   የተመታው ሄሊኮፕተር ሁለት አብራሪዎች በአሜሪካ የባሕር ላይ ድሮን አማካይነት መትረፋቸው እና ምንም ጉዳት እንዳልደረሰባቸው ፕሬዝዳንት ትራምፕ ገልጸዋል።

   ኢራን ሄሊኮፕተሩን በድሮን መምታቷን የአሜሪካ ባለሥልጣናት የተናገሩ ሲሆን፣ ነገር ግን ጥቃቱ ሆን ተብሎ የተፈጸመ ስለመሆኑ ግልጽ አይደለም ብለዋል።

   ክስተቱ ማጋጠሙ የኢራን መገናኛ ብዙኃን ቢዘገብም የአገሪቱ መንግሥት ግን ተመትቶ ለወደቀው የአሜሪካ ሄሊኮፕተር ኃላፊነቱን አለመውሰዳቸውን ሜህር የተባለው የኢራን ዜና አገልግሎት ዘግቧል።

   የአሜሪካው የዜና ድረ ገጽ አክሲዮስ እንደዘገበው በጥቃቱ ዒላማ የሆኑት የኢራን የአየር መከላከያ እና የራዳር ሥርዓቶች ናቸው። የኢራን መንግሥት መገናኛ ብዙኃን ፍንዳታዎች በፋርስ ባሕረ ሰላጤው አካባቢ በሚገኙ የአገሪቱ ግዛቶች ላይ ፍንዳታዎች መሰማታቸውን ዘግበዋል።

   ከኤቢሲ ኒውስ ጋር በስልክ ቃለ ምልልስ ያደረጉት ፕሬዝዳንት ትራምፕ ጦራቸው ለፈጸመው ጥቃት ኢራንን ተጠያቂ አድርገው ከስሰዋታል።

   የኢራን የውጭ ጉዳይ ሚኒስትር አባስ አራግቺ ጥቃቱን ተከትሎ በኤክስ ገጻቸው ላይ “አሜሪካ በጦር ሜዳው ላይ ሽንፈት ቢገጥማትም ቁርጠኝነታችንን እየተፈታተነች ነው” በማለት አገራቸውለሚፈጸምባት ጥቃት አጸፋ እንደምትሰጥ ዝተዋል።

   ሚኒስትሩ ጨምረውም "ሰላም የምትፈልጉ ከሆነ ቀጣናውን ለቅቃቸው ውጡ” በማለት ለአሜሪካ መልዕክት አስተላልፈዋል።

   ፕሬዝዳንት ትራምፕ ተመትቶ የወደቀውን የሠራዊታቸውን አፓቼ ሄሊኮፕተርን በተመለከተ አስተያየት ከመስጠታቸው ቀደም ብሎ የኢራን ዋነኛ ተደራዳሪ እና የአገሪቱ ፓርላማ አፈ ጉባኤ ሞሐመድ ባጊር ጋሊባፍ በማኅበራዊ ሚዲያ ላይ መልዕክት አስተላልፈው ነበር።

   "እኛ የዲፕሎማሲ ቋንቋን ነው የምንርጠው፣ ነገር ግን ሌሎች ቋንቋዎችንም አቀላጥፈን እንናገራለን። ቃላችሁን የማታከብሩ ከሆነ በደምብ ወደምንችለው የንግግር መድረክ ፊታችንን እናዞራለን” በማለት አሜሪካን በምትፈልገው መልኩ እንደሚያስተናግዷት አስጠንቅቀዋል።

2. 9 ሰኔ 2026ፈረንሳይ የእስራኤል ፋይናንስ ሚኒስትር ወደ አገሯ እንዳይገቡ አገደች

   ፈረንሳይ ማክሰኞ ዕለት ቀኝ አክራሪው የእስራኤል የፋይናንስ ሚኒስትር ባዛሌል ስሞትሪች ወደ አገሯ እንዳይገቡ አግዳ ጋዛን “ዳግም ቅኝ የመግዛት” አጀንዳን ያራምዳሉ ስትል ኮነነች።

   የፈረንሳይ ውጭ ጉዳይ ሚኒስትር ማዕቀቡ የተጣለው ከሌሎች አገራት ጋር በመተባበር መሆኑን ገልጸው በፍልስጤማውያን ሰፋሪዎች ላይ በሚደርስ ጫና የተነሳ እገዳው መጣሉን ገልጸዋል።

   ፈረንሳይ ማዕቀቡን የጣለችው ከብሪታኒያ፣ ካናዳ፣ አውስትራሊያ፣ ኖርዌይ እና ኒው ዚላንድ ጋር በመተባባር ነው።

   “የሰፈራ እንቅስቃሴዎችን እና በዌስት ባንክ ግጭትን በማቀጣጠል ረገድ ተጠያቂ የሚሆኑ” አካላት ላይ ማዕቀቡ መጣሉን የፈረንሳይ ውጭ ጉዳይ ሚኒስትር ዣን ኖኤል ባሮት በኤክስ ገጻቸው ላይ ጽፈዋል።

   ሚኒስትሩ፣ ስሞትሪች “ዌስት ባንክን ወደ እስራኤል መጠቅለልን በይፋ ይደግፋሉ፣ በዌስት ባንክ ተጨማሪ ሰፈራዎች እንዲካሄዱ በይፋ ይንቀሳቀሳሉ” ሲሉ ኮንነዋቸዋል።

   አክለውም “ጋዛን ዳግም ቅኝ መግዛት፣ የፍልስጤም ባለሥልጣን ኢኮኖሚያዊ ድቀት እንዲገጥመው፣ እንዲሁም በፍልስጤም ሕዝብ ላይ ጎጂ ተግባራትን “ በመፈጸም ከስሰዋቸዋል።

   ስሞትሪች ወደ ፈረንሳይ እንዳይገቡ ከተከለከሉ የእስራኤል ባለሥልጣናት መካከል ሁለተኛው ናቸው።

   ከአዚህ ቀደም የብሔራዊ ደህንነት ሚኒስትሩ ኢታማር ቤን ግቪር ወደ ፈረንሳይ እንዳይገቡ ታግደዋል።

   ፈረንሳይ አራት የሰፋሪዎች ድርጅት መሪዎችን እና 21 አመጸኛ ሰፋሪዎችን ላይ እገዳ ትላለች።

3. 9 ሰኔ 2026የኢራን የቀድሞው ጠቅላይ መሪ የቀብር ሥነ ስርዓት በሰኔ ወር አጋማሽ እንደሚካሄድ ተገለጸ

   የኢራን የቀድሞ ጠቅላይ መሪ አያቶላህ አሊ ኻሜኒ የቀብር ሥነ ስርዓት ሰኔ 18 ወይንም 19 2018 ዓ.ም. ሊካሄድ እንደሚችል የአገሪቱ መገናኛ ብዙኃን ዘገቡ።

   መገናኛ ብዙኃኑ የበዓሉ አዘጋጆችን በመጥቀስ ስለ ቀብር ስነ ሥርዓቱ ሂደት ዝርዝሮችን ማውጣት ጀምረዋል።

   ኻሜኒ የተገደሉት የኢራን ጦርነት በተጀመረበት ዕለት የካቲት 21 2018 ዓ.ም. ነው።

   ኢራን እስካሁን ድረስ የቀብር ሥነ ስርዓታቸውን አልፈጸመችም። ልጃቸው ሞጅታባ ኻሜኒ የእርሳቸውን ሥልጣን እንዲረከቡ በመጋቢት ወር ተመርጠዋል።

   ከዚህ ቀደም የኢራን መገናኛ ብዙኃን የቀብር ሥነ ስርዓታቸው የሚከናወነው በትውልድ ስፍራቸው ማሻድ እንደሚሆን ዘግበው ነበር።

   ከዚያ ውጪ በዋና ከተማዋ ቴህራን፣ በሃይማኖታዊ ከተማዋ ቆም እና በትውልድ ስፍራቸው ለሟች መታሰቢያ በዓላት ይከናወናሉ ተብሏል።

   የኻሜኒ የቀብር ሥነስርዓት ከጸጥታ ስጋት ጋር በተያያዘ በተደጋጋሚ ሲተላለፍ ቆይቷል። የካቲት 21 እርሳቸው በተገደሉበት ሕንጻ ላእ በተፈጸመው ጥቃት በርካታ ወታደራዊ አዛዦች ተገድለዋል።

4. 9 ሰኔ 2026በሆርመዝ አቅራቢያ የተከሰከሰውን የአሜሪካ ሄሊኮፕተር አብራሪዎች በድሮን ማውጣት መቻሉ ተገለጸ

   በሆርሙዝ ወሽመጥ አካባቢ ሰኞ ዕለት የተከሰከሰው የአሜሪካ ጦር ሂሊኮፕተር ሁለት አብራሪዎችን በድሮን ማውጣት መቻሉን የቢቢሲ አጋር የሆነው ሲቢኤስ ባለሥልጣናትን ጠቅሶ ዘገበ።

   የአሜሪካ ጦር የባሕር ላይ ድሮኖችን ተጠቅሞ እንዲህ ዓይነት ዘመቻ ሲያካሄድ ይህ የመጀመርያው ነው ተብሏል።

   የአሜሪካ ማዕከላዊ ዕዝ (ሴንትኮም) ኤች-64 የተሰኘው ሂሊኮፕተር ከተከሰከሰ በኋላ “ወታደሮቹ በሁለት ሰዓት ውስጥ ማውጣት የተቻለ ሲሆን በደህና ሁኔታ ላይ ናቸው” ብሎ ነበር።

   ሂሊኮፕተሩ “የቀጣናውን ውሃ ቅኝት በሚያደርጉበት ወቅት በኦማን ባሕር ዳርቻ አቅራቢያ” መከስከሱን ዕዙ ጨምሮ አስታውቋል።

   ሂሊኮፕተሩ የተከሰከሰው በብልሽት ምክንያት ስለመሆኑ ወይም በኢራን ተመትቶ ለጊዜው ግልጽ አልሆነም።

   የአደጋው መንስዔ ላይ ምርመራ እየተደረገ መሆኑ ተገልጿል።

   ለሲቢኤስ መረጃ የሰጡ ወታደራዊ ባለሥልጣናት አብራሪዎቹ በሰው አልባ አውሮፕላን አማካኝነት ማውጣት እንደተቻለ ተናግረዋል።

5. 9 ሰኔ 2026የተባበሩት መንግሥታት ዋና ፀሐፊ በመካከለኛው ምሥራቅ ግጭት እንዲቆም ጥሪ አቀረቡ

   የተባበሩት መንግሥታት ድርጅት (ተመድ) ዋና ጸሐፊ አንቶኒዮ ጉታሬዝ በመካከለኛው ምሥራቅ ዳግም ባገረሸው ግጭት “በጣም እንዳሳሰባቸው” በመግለጽ እስራኤል የዘጋችውን የጋዛ መተላለፊያ እንድትከፍት ጠይቀዋል።

   “ሁሉም ጥቃቶች አሁኑኑ መቆም አለባቸው። በሊባኖስ፣ በኢራን፣ በጋዛ ያለው የተኩስ አቁም ሙሉ በሙሉ መከበር አለበት” ሲሉ በኤክስ ገጻቸው ላይ አጋርተዋል።

   በሚያዚያ ወር የተኩስ አቁም ከተደረሰ በኋላ ቴህራን ወደ እስራኤል ሚሳዔሎችን ካስወነጨፈች በኋላ በኢራን የሚገኙ ወታደራዊ ዒላማዎችን ለመጀመርያ ጊዜ ደብድባለች።

   እስራኤል እና ኢራን ሰኞ ዕለት የአሜሪካው ፕሬዚዳንት መታኮሳቸውን እንዲያቆሙ ከነገሯቸው በኋላ ተኩስ ማቆማቸውን አስታውቀዋል።

   ዋሺንግተን ሦስት ወር በሞላው የኢራን ጦርነትን ለማስቆም ከስምምነት ለመድረስ የምታደርገውን ጥረት የሁለቱ አገራት ዳግም ወደ ግጭት መግባት አደጋ ላይ ጥሎታል።

   ጉታሬዝ እስራኤል የዘጋችውን የጋዛ መተላለፊያ በመክፈት የሰብዓዊ እርዳታ ፍሰቱ እንዲቀጥል ጠይቀዋል።

   "በተጨማሪም እስራኤል ወደ ጋዛ የሚወስዱትን መተላለፊያዎች ለመዝጋት መወሰኗ በጣም አሳስቦኛል። በመላው ጋዛ የሚደርሰውን ፈጣን እና ደህንነቱ የተጠበቀ የሰብዓዊ ርዳታ መጓጓዙን ለማረጋገጥ ሁሉም መተላለፊያዎች በአስቸኳይ እንዲከፈቱ ጥሪዬን በድጋሚ አቀርባለሁ" ብለዋል።

6. 9 ሰኔ 2026እስራኤል ሊባኖስ ውስጥ የምትፈጽመውን ጥቃት መቀጠሏ ተነገረ

   እስራኤል በደቡባዊ ሊባኖስ የምትፈጽመዋን ጥቃት ዛሬም መቀጠሏን ተከትሎ ሦስት ሰዎች መገደላቸውን የአገሪቱ መገናኛ ብዙኃን ዘገቡ።

   የአገሪቱ ብሔራዊ ዜና አገልግሎት የእስራኤል ጦር በታየር ምሥራቃዊ አካባቢ በርካታ ሕንጻዎች ላይ ጥቃት ከፈጸመ በኋለ የአደጋ ጊዜ ሠራተኞች ከፍርስራሽ ውስጥ የሰዎችን አስከሬን ማውጣታቸውን ዘግቧል።

   ሎሪየንት የተባለው ድረ ገጽ በበኩሉ ሁለት ተጨማሪ ሰዎች ከጥቃቱ በኋላ ያሉበት አለመታወቁን ጽፏል።

   ብሔራዊ የዜና አገልግሎቱ እስራኤል በታየር ተራራማ አካባቢ በማለዳ በፈጸመችው የድሮን ጥቃት ሁለት ሰዎች መገደላቸውን አስታውቋል።

   የተኩስ አቁም ስምምነት በአሜሪካ እና በኢራን መካከል ከተደረሰ በኋላ ለመጀመሪያ ጊዜ እሁድ ዕለት ቴህራን እና እስራኤል የተኩስ ልውውጥ አድርገዋል።

   የእስራኤል ጦር በሄዝቦላህ መሠረተ ልማቶች ላይ የሚፈጽማቸውን ጥቃቶች ዛሬም መቀጠሉን አስታውቋል።

   በእስራኤል እና በሊባኖስ መካከል እንደ አውሮፓውያኑ ከሚያዝያ 16 ጀምሮ የተኩስ አቁም ቢደረስም በሁለቱ አገራት መካከል የሚካሄደው ውጊያ አልቆመም።

   በኢራን የሚደገፈው ሄዝቦላህ ወደ እስራኤል ሮኬቶችን እና ድሮኖችን ማስወንጨፉን ቀጥሏል።

   እስራኤል በደቡባዊ ሊባኖስ የምትፈጽምመውን ድብደባ በመቀጠል የእግረኛ ጦሯ መጀመሪያ ከነበረበት የሊታኒ ወንዝ ይዞታውን እያሰፋ የተለያዩ አካባቢዎችን መቆጣጠር ቀጥሏል።

   በዚህ ወር መጀመሪያ ላይ ለተኩስ አቁሙ ተፈጻሚነት ለመሥራት ቢስማሙም ይህ የሚሆነው ግን ሄዝቦላህ የሚፈጽማቸውን ጥቃቶች የሚያቆም ከሆነ ብቻ መሆኑ ተገልጿል።

   ሰኞ ዕለት የሊባኖስ ጤና ሚኒስቴር በደቡባዊ ሊባኖስ በተፈጸመ የአየር ድብደባ ቢያንስ 14 ሰዎች መገደላቸውን አስተውቋል።

7. 9 ሰኔ 2026የአሜሪካ የጦር ሄሊኮፕተር በሆርሙዝ ወሽመጥ አቅራቢያ ተከሰከሰ

   የአሜሪካ ሄሊኮፕተር በሆርሙዝ ወሽመጥ አቅራቢያ መከስከሱን፤ ሆኖም አብራሪዎቹ መትረፋቸውን ትራምፕ ተናገሩ።

   ፕሬዝዳንት ዶናልድ ትራምፕ “ አብራሪዎቹ ደኅና ናቸው፤ በጥሩ ሁኔታም ላይ ይገኛሉ” ብለዋል።

   ኒው ዮርክ ታይምስ እንደዘገበው ሄሊኮፕተሩ በሆርሙዝ ወሽመጥ አቅራቢያ የተከሰከሰው ሰኞ ሲሆን አብራሪዎቹን መታደግ ተችሏል።

   የአደጋው ምክንያት እስካሁን አልታወቀም።

   ሆኖም ትራምፕ ክስተቱን በተመለከተ ዛሬ ሪፖርት እንደሚቀርብ ተናግረዋል።

   በተጨማሪም ፕሬዚደንቱ ከኢራን ጋር እየተካሄደ ያለው የሰላም ስምምነት “የመጨረሻው ደረጃ” ላይ መድረሱን ተናግረዋል።

   ቀደም ብሎ በተባበሩት መንግሥታት የኢራኑ አምባሳደር የሆኑት አሚር ሳኢድ ኢራቫኒ በስምምነት ለማጠናቀቅ ከአሜሪካ ጋር እየተደረጉ ያሉ ውይይቶች መቀጠላቸውን ተናግረው ነበር።

8. 9 ሰኔ 2026አሜሪካ ኢራንን በተመለከተ ከእስራኤል የተለየ ፍላጎት እንዳላት ምክትል ፕሬዚደንቷ ተናገሩ

   አሜሪካ እና እስራኤል የጋራ ፍላጎት ቢኖራቸውም ዋሽንግተን ከኢራን ጋር ያላት ግንኙነት ዶናልድ ትራምፕ ለአገራቸው ጥሩ ይሆናል ባሉት ሃሳብ እንደሚመራ የአሜሪካው ምክትል ፕሬዚደንት ጄዲ ቫንስ ሰኞ ዕለት ለፎክስ ኒውስ ተናገሩ።

   “እስራኤል እና አሜሪካ ብዙ የጋራ ፍላጎት አላቸው” ያሉት ምክትል ፕሬዚደንቱ፤ ነገር ግን “ፍላጎቶቻችን የሚለያዩበት ሁኔታዎችም አሉ” ብለዋል።

   ኢራንን በተመለከተ አሜሪካ ያላት ፖሊሲ ዋነኛ ግብ ኢራን የኒውክሌር መሣሪያ እንዳይኖራት ማረጋገጥ እንደሆነም ቫንስ አስታውሰዋል።

   ምክትል ፕሬዚደንቱ “ ባለፈው አንድ ዓመት ከመንፈቅ አስፈላጊ የሆነ ሁኔታን ፈጥረናል ብለው ፕሬዚደንቱ ያምናሉ፤ ትክክል ናቸው ብዬ አስባለሁ። ስለዚህ የኢራን ኒውክሌርን ጉዳይ በተመለከተ የረዥም ጊዜ ስምምነት ላይ መድረስ እንችላለን” ብለዋል።

   “አሁን እስራኤል ይህንን ልትወደው ወይም ላትወደው ትችላለች፤ ሆኖም በመሠረታዊነት ይህ የአሜሪካ ፍላጎት እንደሆነ እናስባለን”

   ምክትል ፕሬዚደንቱ ጄዲ ቫንስ ጨምረውም ዋሽንግተን ይህንን ግቧን ለማሳካት ሥራዋን ትቀጥላለች፤ ምክንያቱም የአሜሪካው ፕሬዚደንት የተመረጡት ይህንን ለማሳካት ነው” ሲሉ ተናግረዋል።

9. 9 ሰኔ 2026አሜሪካ እና ኢራን ለስምምነት “የመጨረሻው ጥረት” ላይ እንደሆኑ ትራምፕ ተናገሩ

   አሜሪካ እና ኢራን የስምምነት “የመጨረሻው ጥረት” ላይ እንደሆኑ እና ስምምነቱ “በማንኛውም መንገድ፣ ቅርጽ ወይም ሁኔታ የኒውክሌር መሣሪያን እንደማይፈቅድ” ፕሬዝዳንት ዶናልድ ትራምፕ ተናገሩ።

   ሁለቱ አገራት የተኩስ አቁም ካደረጉ በኋላ በነበሩ የተለያዩ የግጭቱ ምዕራፎች ወቅት ስምምነት ላይ ለመድረስ መቃረባቸውን የሚጠቁም አስተያየት መስጠታቸው ይታወሳል።

   በጄኤፍኬ አውሮፕላን ማረፊያ ከጋዜጠኞች ለቀረበላቸው ጥያቄ ምላሽ የሰጡት ፕሬዝዳንቱ ስምምነቱ “በጣም ድንቅ ይሆናል” ብለዋል።

   ኢራን የኒውክሌር መሣሪያ እንደማይኖራት በድጋሚ ያስረገጡት ትራምፕ፤ ስምምነት ከተፈረመ በኋላ የሆርሙዝ ወሽመጥ “በአፋጣኝ እንደሚከፈት” ጠቁመዋል።

   “በሁለት ወይም በሦስት ቀናት ውስጥ” የሆርሙዝ ወሽመጥ ሊከፈት እንደሚችልም ተናግረዋል።

   ኢራን እና እስራኤል አንዳቸው ሌላቸው ላይ ጥቃት ማድረስ ለማቆም መስማማታቸውን አስታውቀዋል።

   ትራምፕ የእስራኤሉ ጠቅላይ ሚኒስትር ቤንያሚን ኔታንያሁን ካነጋገሩ በኋላ ኢራን ላይ ጥቃት ማድረስ ለማቆም መስማማታቸውን ተናግረዋል።

   “ለተጨማሪ አንድ ሳምንት ገደማ አይተነኳኮሱም” ሲሉም አክለዋል።

10. 9 ሰኔ 2026ኢራን እና እስራኤል የተኩስ አቁም ካልተጣሰ በስተቀር ጥቃት እንደማይሰናዘሩ አስታወቁ

    ኢራን እና እስራኤል አንዳቸው በሌላቸው ላይ የሚሰነዝሩትን ጥቃት እንደሚያቆሙ አስታውቀዋል።

    ባለፈው ሚያዝያ የተኩስ አቁም ስምምነት ከተደረሰ ወዲህ ለመጀመሪያ ጊዜ ግጭት ውስጥ የገቡት ሁለቱ አገራት ጥቃት መሰንዘር እንደሚያቆሙ ይፋ አድርገዋል።

    ሆኖም ግን የተኩስ አቁም የሚጣስ ከሆነ ጥቃት ማድረስ እንደሚጀምሩ ኢራንም እስራኤልም አስጠንቅቀዋል።

    የእስራኤል ጠቅላይ ሚኒስትር ቤንያሚን ኔታንያሁ አገራቸው “ለአሁኑ” ጥቃት ከመሰንዘር እንደምትቆጠብ ጠቅሰው፤ ከኢራን እና ሄዝቦላህ ጋር የሚደረገው ትግል ግን “አላከተመም” ብለዋል።

    የኢራን ጦርም ለእስራኤል “የሚያም የአጸፋ ምላሽ” ከሰጠ በኋላ ጥቃት ማድረስ ማቆሙን አስታውቋል።

    ነገር ግን እስራኤል ጥቃት የምታደርስ ከሆነ “የከፋ እርምጃ” እንደሚወስድ ጦሩ አክሏል።

    እስራኤል በቤሩት ላይ ጥቃት በማድረሷ ኢራን እሑድ ዕለት እስራኤል ላይ የአጸፋ እርምጃ ወስዳለች። እስራኤልም በምላሹ ትናንት ሰኞ የኢራን ወታደራዊ መቀመጫዎች ላይ ጥቃት አድርሳለች።

    የአሜሪካው ፕሬዝዳንት ዶናልድ ትራምፕ ከቢቢሲ ጋር ባደረጉት ቆይታ የእስራኤሉ ጠቅላይ ሚኒስትር “ከትዕዛዛቸው እንዳልወጡ” ተናግረዋል።

11. 8 ሰኔ 2026የእስራኤሉ ጠቅላይ ሚኒስትር በኢራን ላይ የሚፈጸመውን ጥቃት ለጊዜው ማቆማቸውን አስታወቁ

    የእስራኤሉ ጠቅላይ ሚኒስትር ቤንያሚን ኔታኒያሁ በኢራን ላይ የሚያካሂዱትን ጥቃት “ለአሁን” መግታታቸውን ባደረጉት ንግግር አስታወቁ።

    በቴሌቪዥን በተላለፈው የጠቅላይ ሚኒስትሩ ንግግር የእስራኤል ሠራዊት በወሰዳቸው እርምጃዎች ኢራን እና ሄዝቦላህ ከመቼውም ጊዜ በላይ መዳከማቸውን አመልክተዋል።

    ኢራን እሁድ ሌሊት በእስራኤል ላይ የፈጸመችውን የሚሳዔል ጥቃት ተከትሎ በአጸፋው የቴህራንን ወታደራዊ ዒላማዎች መምታቷ ተዘግቧል።

    ይህ የእስራኤል ጥቃት በአሜሪካው ፕሬዝዳንት ጠያቂነት እንደሚቆም ከተነገረ በኋላ ጠቅላይ ሚኒስትሩ ባረድጉት ንግግር ላይ ጥቃታቸውን ለጊዜው እንዲቆም ማድረጋቸውን ነገር ግን ውጊያው ገና አለማብቃቱን ገልጸዋል።

    ለኢራን ጥቃት ምላሽ በመሰጠቱ "አሁን ተኩሱ ተገትቷል” ሲሉ ኔታኒያሁ ተናግረዋል።

    ነገር ግን “ኢራን በድጋሚ ስህተት በመፈጸም ጥቃት የምትፈጽም ከሆነ በከፍተኛ ኃይል ምላሽ እንሰጣለን” ሲሉ ያስጠነቀቁት ጠቅላይ ሚኒስትሩ “እስራኤል እራሷን ለመከላከል ሙሉ መብት ያላት ሲሆን፣ ይህንንም አስፈላጊ አስከሆነ ድረስ ሙሉ ለሙሉ እንጠቀምበታለን” ብለዋል።

    ኔታኒያሁ በተጨማሪም በኢራን እና በእስራኤል መካከል የጥቃት መመላለስ መከሰቱን ተከትሎ ከአሜሪካው ፕሬዝዳንት ዶናልድ ትራምፕ ጋር ውይይት ማድረጋቸውን አረጋግጠዋል።

12. 8 ሰኔ 2026“የመጨረሻው ግብ ሊሳካ ስለሆነ” ሁሉም ወገኖች ከጥቃት እንዲቆጠቡ ፓኪስታን አሳሰበች

    ኢራን እና አሜሪካን የምታሸማግለው የፓኪስታን የውጭ ጉዳይ ሚኒስትር ሻባዝ ሻሪፍ ሰላም እንዲሰፍን “ሁሉም ወገኖች” ከጥቃት እንዲቆጠቡ አሳሰቡ።

    “በተለይም የመጨረሻው ግብ ሊሳካ በመሆኑ” ሁሉም ወገኖች ጥቃት ከማድረስ እንዲቆጠቡ በማኅበራዊ ሚዲያ ገጻቸው ጠይቀዋል።

    የኢራን ከፍተኛ ወታደራዊ ዕዝ የሆነው ኻታም አል-አንቢያ፤ እስራኤል ላይ የሚፈጽመውን ጥቃት እንደሚያቆም ቢያስታውቅም፤ በደቡብ ሊባኖስ የሚፈጸመው ጥቃት የሚቀጥል ከሆነ ኢራን “ከዚህ ቀደም ከነበረው በባሰ ሁኔታ ምላሽ ትሰጣለች” ሲል አስጠንቅቋል።

    እስራኤልም በኢራን ላይ እየፈጸመችው ያለውን ጥቃት በአሜሪካው ፕሬዝዳንት ዶናልድ ትራምፕ ጥያቄ መሠረት እንደምታቆም የእስራኤል ቴሌቪዥን ዘግቧል።

    የፓኪስታን የውጭ ጉዳይ ሚኒስትር በኤክስ ገጻቸው “በቅርቡ በመካከለኛው ምሥራቅ የተባባሰው ጥቃት የደካማ ተኩስ አቁም አደገኛነትን ያሳያል” ብለዋል።

    “ከወንድሞቻችን እና ከአጋሮቻችን ጋር በቀናነት እና በጥንቃቄ በመተባበር በዲፕሎማሲ ሰላም ለማምጣት እየሠራን ነው። በተለይም የመጨረሻው ግብ ሊሳካ በመሆኑ ሁሉም ወገኖች ተቆጥበው ለሰላም ዕድል እንዲሰጡ እናሳስባለን” ሲሉም አክለዋል።

    ፓኪስታን ኢራን እና አሜሪካን በማሸማገል ዋነኛዋ አገር ናት። ያለፈው ሚያዝያ በኢስላማባድ የሁለቱን አገራት ልዑካን እንዲወያዩ አድርጋለች። በዚያው ወር ተጨማሪ ውይይቶች ለማካሄድ ብትሞክርም አልተሳካም።

13. 8 ሰኔ 2026ኢራን የሆርሙዝ ወሽመጥ እንቅስቃሴን በመገደቧ በአውሮፓ ኅብረት ማዕቀብ ተጣለባት

    ኢራን በሆርሙዝ ወሽመጥ “የባሕር ላይ እንቅስቃሴን በመገደቧ” የአውሮፓ ኅብረት አባል አገራት ማዕቀብ እንደጣሉባት የኅብረቱ የውጭ ጉዳይ ፖሊሲ ኃላፊ ካጃ ካላስ አስታወቁ።

    በኤክስ ገጻቸው “መካከለኛው ምሥራቅ በሰላም ንግግሮች እና በስሱ የተኩስ አቁሞች አጣብቂኝ ውስጥ ይገኛል” ብለዋል።

    “የቴህራን ድሮኖች በሆርሙዝ ወሽመጥ የባሕር እንቅስቃሴን አደጋ ውስጥ መጣላቸውን ቀጥለዋል። የኢራን ድርጊት ተቀባይነት እንደሌለው ሚኒስትሮች በግልጽ ተናግረዋል” ሲሉም አክለዋል።

    ለዚህም ምላሽ እንዲሆን የአውሮፓ ኅብረት አባል አገራት ዛሬ ሰኞ በብራሰልስ ባሳለፉት ውሳኔ መሠረት ኢራን ላይ ማዕቀብ መጣሉን የኅብረቱ የውጭ ጉዳይ ፖሊሲ ኃላፊ ካጃ ካላስ ተናግረዋል።

    የአውሮፓ ኅብረት እንደ ሆርሙዝ ወሽመጥ ያሉ ቁልፍ የሆኑ ዓለም አቀፍ መተላለፊያዎችን በተመለከተ ውሳኔ የሚያሳልፍበት የሕግ ማዕቀፍ ሲተገበር የአሁኑ የመጀመሪያው መሆኑን ኃላፊዋ አክለዋል።

14. 8 ሰኔ 2026እስራኤል በኢራን ላይ የምትፈጽመውን ጥቃት ‘በትራምፕ ጠያቂነት’ እንደምታቆም ተዘገበ

    እስራኤል በኢራን ላይ እየፈጸመችው ያለውን ጥቃት በአሜሪካው ፕሬዝዳንት ዶናልድ ትራምፕ ጥያቄ መሠረት እንደምታቆም የእስራኤል ቴሌቪዥን ዘገበ።

    የእስራኤሉ ቻናል 12 ኒውስ የተባለው የቴሌቪዥን ጣቢያ አንድ የእስራኤል መንግሥት ከፍተኛ ባለሥልጣንን ጠቅሶ እንደዘገበው “በትራምፕ ጠያቂነት” ጥቃቱ እንደሚቆም አመልክተዋል።

    ዘገባው ጨምሮም ሄዝቦላህ ጥቃቱን የሚቀጥል ከሆነ በደቡባዊ ሊባኖስ ውስጥ የምትፈጽመውን ወታደራዊ ጥቃት የምትቀጥል መሆኑን ገልጿል።

    ምንም እንኳን ዝርዝር መረጃ ባይወጣም የአሜሪካ እና የእስራኤል መገናኛ ብዙኃን በሁለቱ መሪዎች መካከል ዛሬ የስልክ ውይይት መደረጉን ዘግበዋል።

    ባለፈው ሳምንት ትራምፕ እና ኔታኒያሁ ባደረጉት የስልክ ምልልስ ላይ እስራኤል ሊባኖስ ውስጥ በምትፈጽመው ጥቃት ምክንያት ትራምፕ ጠንከር ያሉ ቃላት መጠቀማቸው በስፋት ተዘግቦ ነበር።

15. 8 ሰኔ 2026የኢራን ጦር በእስራኤል ላይ የሚፈጽመውን ጥቃት እንደሚያቆም አስታወቀ

    የኢራን ከፍተኛ ወታደራዊ ዕዝ የሆነው ካሀታም አል-አንቢያ፤ እስራኤል ላይ የሚፈጽመውን ጥቃት እንደሚያቆም ይፋ አደረገ።

    ዕዙ ባወጣው መግለጫ “የጦር ኃይሎቻችን የሚያካሂዱት ዘመቻ መቆሙን እናሳውቃለን” ብሏል።

    ነገር ግን በደቡብ ሊባኖስ የሚፈጸመው ጥቃት የሚቀጥል ከሆነ ኢራን “ከዚህ ቀደም ከነበረው በባሰ ሁኔታ ምላሽ ትሰጣለች” ሲል አስጠንቅቋል።

    እስራኤል በደቡባዊ ቤይሩት ላይ ጥቃት ማድረሷን ተከትሎ ኢራን የአጸፋ ምላሽ መስጠት የጀመረችው ትናንት እሑድ ሲሆን፤ የእስራኤል ጦርም በኢራን ላይ ጥቃት ፈጽሟል።

    የቴህራን ከፍተኛ የፖለቲካ እና ወታደራዊ ባለሥልጣናት ትናንት ምሽት በሰጡት ማስጠንቀቂያ ኢራን የተኩስ አቁሙ በመጣሱ የአጸፋ ምላሽ እንደምትሰጥ ዝተዋል።

    በሊባኖስ እና በእስራኤል መካከል ተደርሶ የነበረውን የተኩስ አቁም፤ ኢራን ከአሜሪካ እና እስራኤል ጋር የተደረሰው አጠቃላይ የተኩስ አቁም አካል አድርጋ ትወስደዋለች።

16. 8 ሰኔ 2026ትራምፕ እስራኤል እና ኢራን አሁኑኑ ‘መታኮስ’ ማቆም አለባቸው አሉ

    የአሜሪካው ፕሬዚዳንት ዶናልድ ትራምፕ እስራኤል እና ኢራን አሁኑኑ ’መታኮስ’ ማቆም አለባቸው አሉ።

    ፕሬዚዳንቱ በማኅበራዊ ሚዲያ ገጻቸው ላይ ባጋሩት ጽሑፍ አገራቱ እርስ በእርሳቸው መታኮስ እንዲያቆሙ ጠይቀዋል።

    እስራኤል የአጸፋ ምላሽ ከመስጠቷ ቀድም ብሎ ለአሜሪካ መገናኛ ብዙኃን የእስራኤል ጠቅላይ ሚኒስትር ቤንያሚን ኔታንያሁ በኢራን ላይ የአጸፋ ምላሽ እንዳይሰጡ አስጠንቅቀው ነበር።

    እስራኤል ትናንት በቤይሩት ላይ የፈጸመችውን ድብደባ ተከትሎ ኢራን ወደ ሰሜን እስራኤል ሚሳዔል አስወንጭፋለች።

    ይህንን ተከትሎ እስራኤል በመካከለኛው እና ምዕራብ ኢራን በሚገኙ ወታደራዊ ተቋማት ላይ ድብደባ መፈጸሟን አስታውቃለች።

    በቴህራን በርካታ ፍንዳታዎች መሰማታቸው ከተገለጸ በኋላ የኢራን አየር መካላከያ በቴህራን ላይ እየበረረ የነበረ ድሮንን መትቶ መጣሉን ሜኸር የዜና ወኪል አስታውቋል።

    የእስራኤል ውጭ ጉዳይ ሚኒስትር ቃል አቀባይ ኢስማኤል ባጋይ ለእስራኤል ጥቃት አሜሪካ ኃላፊነት ትወስዳለች ሲሉ መግለጫ በሰጡበት ወቅት ተናግረዋል።

    ባጋይ በመግለጫቸው የእስራኤል አቋም ከአሜሪካ ባለሥልጣናት ጋር እንደሚቃረን በመጥቀስ “በድርድሩ ላይ ጥላውን ያጠላል” ብለዋል።

17. 8 ሰኔ 2026ኢራን እና አሜሪካ መልዕክት መለዋወጥ “አላቋረጡም” - የኢራን ውጭ ጉዳይ ሚኒስቴር

    የኢራን ውጭ ጉዳይ ሚኒስቴር ቃል አቀባይ ኢስማኤል ባጋይ አገራቸው ከአሜሪካ ጋር መልዕክት መለዋወጥ “አለማቋረጧን” ተናገሩ።

    ቃል አቀባዩ በጋዜጣዊ መግለጫ ላይ ይህንን ቢሉም የመልዕክት ልውውጡ እስከ ትናንት ድረስ መቀጠል አለመቀጠሉን አላረጋገጡም።

    አክለውም የፓኪስታን የአገር ውስጥ ጉዳይ ሚኒስትር ሞሺን ናቅቪ ከሁለት ቀን በፊት ቴህራን የመጡት “ንግግሮች እንዲቀጥሉ ለማገዝ እና ከድርድር ጋር ያሉ ጉዳዮችን ለመነጋገር” ነው ብለዋል።

    ፓኪስታን በአሜሪካ እና ኢራን መካከል በሚደረገው ድርድር ውስጥ ቁልፍ ሚና ትጫወታለች።

    ናቅቪ ወደ ቴህራን የሄዱት ከፓኪስታኑ መሪ ለኢራኑ ጠቅላይ መሪ ሞጅታባ ኻሜኒ የተላከ ደብዳቤ ይዘው ነበር።

    አንዳንድ የኢራን መገናኛ ብዙኃን ከሳምንት በፊት እስራኤል በሊባኖስ የምታደርገውን ድብደባ በመቃወም ቴህራን ከዋሺንግተን ጋር የመልዕክት ልውውጧን አቋርጣለች በሚል ዘግበው ነበር።

    ቴህራን አና ዋሺንግትን የተኩስ አቁም ካደረጉ እአአ ከሚያዚያ 8 ጀምሮ የመልዕክት ልውውጥ እያደረጉ መሆናቸው ሲገልጽ ቆይቷል።

    ሚያዚያ 11 እና 12 የሁለቱ አገራት ልዑካን በኢዝላማባድ ተገናኝተው ውይይት ማድረጋቸው ይታወሳል።

18. 8 ሰኔ 2026ሁቲ እስራኤል በቀይ ባሕር ላይ የምታደርገውን እንቅስቀሴ "ማገዱን" አስታወቀ

    በኢራን የሚደገፈው የየመን ታጣቂ ቡድን ሁቲ እስራኤል በቀይ ባሕር ላይ የምታደርገውን ማንኛውንም እንቅስቃሴ ማገዱን አስታወቀ።

    ቡድኑ የእስራኤል መርከቦች በቀይ ባሕር ላይ የሚቀዝፉ ከሆነ ጥቃት እንደሚፈጽም አስጠንቅቋል።

    ከዚህ ቀደም ሁቲዎች የእስራኤል መርከቦች በቀይ ባህር ላይ ሲንቀሳቀሱ ጥቃት ሲፈጽሙ ቆይተዋል።

    የቡድኑ ቃል አቀባይ ያህያ ሳሬአ በሰጡት መግለጫ የሁቲ ታጣቂዎች ወደ እስራኤል ሚሳዔሎችን መተኮሳቸውን ገልጸዋል።

19. 8 ሰኔ 2026የኢራን ብሔራዊ እግር ኳስ ቡድን ሜክሲኮ ገባ

    በ2026 የዓለም ዋንጫ ላይ የሚሳተፈው የኢራን ብሔራዊ እግር ኳስ ቡድን ሜክሲኮ መግባቱ ተገለጸ።

    ቡድኑ ከቪዛ እና በአሜሪካ ከሚገኙ ስታዲየሞችን ከመጠቀም ጋር በተነሳ ውዝግብ ውስጥ ገብቶ ነበር።

    የኢራን ሦስቱም ጨዋታዎች የሚካሄዱት በአሜሪካ ቢሆንም፣ ተጫዋቾቹ እና የድጋፍ ሰጪዎች በጨዋታው ዕለት አሜሪካ ገብተው መውጣት ይጠበቅባቸዋል።

    ኢራን 15 የቡድኑ ልዑካን አባላት እና ባለሥልጣናት ቪዛ መከልከላቸውን አስታውቃለች። እርምጃውንም በስፖርቱ ላይ የሚካሄድ ፖለቲካዊ ጣልቃ ገብነት ስትል ኮንናዋለች።

    ቡድኑ ለዓለም ዋንጫ ማለፉን ያረጋገጠው የኢራን ጦርነት ከመጀመሩ አንድ ዓመት ቀድም ብሎ ነበር።

    የኢራን ቡድን ቲዋና የደረሰው በአገሬው አቆጣጠር እሁድ ማለዳ ሲሆን የልምምድ ሜዳቸውን ከአሪዞና ወደ ሜክሲኮ ያዞሩት በግንቦት ወር ላይ ነበር።

    የዘንድሮው የዓለም ዋንጫን አሜሪካ ከሜክሲኮ እና ካናዳ ጋር በመሆን በጥምረት ታዘጋጃለች።

20. 8 ሰኔ 2026ትራምፕ፣ ኔታንያሁ ስምምነቱን ከመቀበል ውጭ አማራጭ የላቸውም አሉ

    የአሜሪካው ፕሬዚዳንት ዶናልድ ትራምፕ ከኢራን ጋር የሚያደርጉትን ማንኛውም ስምምነት ኔታንያሁ ከመቀበል ውጭ አማራጭ የላቸውም ሲሉ ለፋይናንሻል ታይምስ ተናገሩ።

    ትራምፕ ለፋይናንሻል ታይምስ “አማራጭ የለውም” ሲሉ በስልክ ባደረጉት ቃለ መጠይቅ ወቅት ተናግረዋል። “እኔ ነኝ ውሳኔውን የምሰጠው። እኔ ነኝ ሁሉንም ውሳኔ የምሰጠው። እርሱ [ኔታንያሁ] አይደለም ውሳኔ ሰጪው” ብለዋል።

    ትራምፕ ከአክሲዮስ ጋር በነበራቸው ቃለ ምልልስ ወቅት ኔታንያሁ የሰላም ስምምነቱ እንዳይከሽፍ ለማድረግ ለኢራን ጥቃት የአጸፋ ምላሽ እንዳይሰጡ እንደሚነግሯቸው ገልጸው ነበር።

    ትራምፕ ከፋይናንሻል ታይምስ ጋር በነበራቸው ቃለ መጠይቅ ላይ ደግሞ የተፈጸመው ጥቃት “በስምምነቱ ላይ ምንም ተጽዕኖ አይኖረውም” ብለዋል።

    አክለውም “እንዴት ሆኖ እንደሚጠናቀቅ እናያለን። ላለፉት 3000 ዓመታት 47 ዓመታት ሲሆን የነበረው ነገር ነው፤ ወይም እንደምትቆጥርበት መንገድ ይወሰናል” ብለዋል።