EFCC arraign Blessing CEO for fresh alleged 69.1m naira fraud - all cases against Nigerian influencer
Wia dis foto come from, EFCC/X
Popular Nigerian social media influencer Okoro Blessing Nkiruka AKA Blessing CEO don land for fresh trouble as di Economic and Financial Crimes Commission (EFCC) drag her go court again on top accuse of N69,150,000 ($50,858.30) magomago.
EFCC on dia official X account on Tuesday, 9 June say dem carry Blessing CEO go court again on two-count charge wey border on accuse say "she obtain money by false pretence and stealing wey amount to N69,150,000 (Sixty-Nine Million, One Hundred and Fifty Thousand Naira).
Di Nigerian corruption police announce di informate di same day one Federal High Court for Lagos grant di celebrity bail on top accuse of rental fraud wey reach N36 million naira ($26,000) wey EFCC bin earlier gbab her for.
Dem drag her for fraud bifor Justice R.A. Oshodi of di Special Offences Court wey sit for Ikeja, Lagos state.
EFCC lawyer, C.C.Okezie bin ask di court to go ahead wit di arraignment, as dem argue say dem don duly serve di defendant wit di charge.
And for im ruling, Justice Oshodi rule say make di arraignment go ahead in accordance wit di law, so dem read di read to di defendant, EFCC tok for di statement.
However, Blessing CEO plead "not guilty" to dis fresh charges.
Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.
End of X post
Wetin be di fresh charges
According to di corruption police, Blessing CEO dey face fresh two count charges for alleged N69,150,000 fraud.
Di first count charge na say she lease one house for Lagos wey she allege say na her property give one company, and di property no be her own, but she claim to be di owner.
Di first count read: "Say you, OKORO BLESSING NKIRUKA, on or about March 21, 2025, for Lagos, within di jurisdiction of dis Honourable Court, by false pretence plus wit intent to do wayo, persuade Hope Chiropractic Health Clinic Limited to transfer one benefit of N69,150,000 (Sixty-Nine Million, One Hundred and Fifty Thousand Naira) give you under di representation say di property wey dey located at No. 1 Tunbosun Osobu Street, Lekki, belong to you and you lease am give di company for a period of five years, representation wey you no say na false, thereby committing an offence wey dey contrary to Section 1(2) and punishable under Section 1(3) of di Advance Fee Fraud and Other Related Offences Act."
Di second count charge na say she use wayo collect money wey make am commit offence of stealing wey dey contrary to di law.
Count two read: "Say you, OKORO BLESSING NKIRUKA, on or about March 21, 2025, for Lagos, within di jurisdiction of dis Honourable Court, use wayo covert to your own use di sum of N69,150,000 (Sixty-Nine Million, One Hundred and Fifty Thousand Naira), wey be di property of Hope Chiropractic Health Clinic Limited, thereby committing an offence of stealing wey dey contrary to Section 280(2) and punishable under Section 287 of di Criminal Law of Lagos State, 2015."
Di defendant plead not guitly to di charges wen dem read am to her.
EFCC lawyer bin ask for a trial date and ask di court to keep Blessin CEO for EFCC custody pending her scheduled arraignment bifor di Federal High Court, Ikoyi, Lagos, on June 10, 2026, for anoda alleged fraud case.
For im ruling, Justice Oshodi say make di defendant remain for EFCC custody and e adjourn di matter till 16 July 2026 for di hearing of di bail application and wen trial go start.
Dis fresh charges come di same day Justice Dipeolu of di Federal High Court, Ikoyi, Lagos grant bail to celebrity social media influencer Blessing CEO to di tune of 10 million naira ($7,349) and two sureties.
Na last month, EFCC sama Blessing CEO wit two count charges ova rental fraud wey reach 36 million naira ($26,000). Dem allege say she collect money by false pretence and steal to di tune of N36million
Di conditions of di bail na say; One of di sureties must be a family member and e dey required to provide proof of employment, Bank Verification Number (BVN), National Identification Number (NIN), plus valid phone number.
Di sureties must also submit one valid international passport, tax clearance certificates for di last two years, and six passport photographs.
